މެއި 6 ޙަމަލާ: މުއްދަތުގެ ތެރޭގައި ދިފާއީ ހެކި ހުށަހެޅިފައިނުވަނީ ތަހުމީނުގެ އިހުމާލަކުން ނޫން
ކްރިމިނަލް ކޯޓުގައި މިހާރު މި މައްސަލަ ބައްލަވަނީ ގާޒީ ސޮފްވަތު ޙަބީބް
ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް އަމާޒުކޮށް ޙަމަލާދިން ސަރަޙައްދު
ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް އަމާޒުކޮށް ދިން ހަމަލާއާއި ގުޅިގެން އުފުލާފައިވާ ދައުވާތަކުގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މެއި 6، 2021ގައި ނަޝީދަށް އަމާޒުކޮށް ބޮމެއް ގޮއްވާލި މައްސަލާގައި ދައުވާކުރަނީ ތަހުމީން އަހުމަދާއި، މުޖާޒް އަހުމަދާއި، އަލީ ހައިޝަމާއި، ފަހުމީ އަލީއާއި، އިސްހާގު އަދި މުހައްމަދު ނާޒިމްގެ މައްޗަށެވެ.
ކްރިމިނަލް ކޯޓުގައި މިހާރު މި މައްސަލަ ބައްލަވަނީ ގާޒީ ސޮފްވަތު ޙަބީބެވެ.
ބުދަ ދުވަހުގެ އަޑުއެހުމުގައި ތަހުމީނުގެ މިހާރުގެ ވަކީލު ވަނީ އޭނާގެ ފަރާތުން ހުށައަޅާފައިވާ ހެކިތައް ބަލައިގަތުމަށް އެދިލައްވާފައެވެ.
މި އަޑުއެހުމުގައި ގާޒީ ވިދާޅުވީ، މުއްދަތުގެ ފަހުން ހެކި ހުށައަޅާފައިވަނީ ތަހުމީނުގެ އިހުމާލަކުން ނޫން ކަމަށާއި، އެއީ އޭނާގެ އޭރުގެ ވަކީލުގެ އިހުމާލުން ވީ ކަމެއްކަމަށްވާއިރު، މައްސަލައިން ދިފާއުވުމުގެ ފުރުސަތު އޭނާއަށްވެސް ލިބިދޭންޖެހޭކަމަށެެވެ. އެގޮތުން ތަހުމީނުގެ ދިފާއީ ވަކީލު މިހާރު ވަނީ ބަދަލުވެފައެެވެ.
އޭގެ އިތުރުން، ކުރީގައި ހުށައަޅާފައިވާ ހެކިތައް ބަލައިގަތުމާމެދު ދައުލަތުންވެސް އިއުތިރާޒު ނުކުރާތީ ގާޒީ ވަނީ ތަހުމީނުގެ ފަރާތުން ހުށައަޅާފައިވާ ދިފާއީ ހެކި ބަލައިގެންނެވުމަށް ނިންމަވާފައެވެ.
އަދި ދައުލަތުން ވަނީ ވަކި ވަކި ހެކިންނާމެދު އިއުތިރާޒެއް އޮތްނަމަ 3 ދުވަސް ތެރޭގައި ކޯޓަށް އަންގާނެކަމަށް ބަޔާންކޮށްފައެވެ.
ގާޒީ ވިދާޅުވީ، އެ ހެކިތަކާއި ގުޅޭގޮތުން ދެފަރާތުން ވާހަކަ ދެއްކުމުގެ ފުރުސަތު ދެއްވުމަށްފަހު، އެކަންކަމާ ގުޅިގެން ދެން އޮންނަ އަޑުއެހުމެއްގައި ގޮތް ނިންމަވާނެކަމަށެވެ.
އެއަށްފަހު ދެން އޮންނަ އަޑުއެހުމެއްގައި އޮންނާނީ މި މައްސަލައިގެ ހެކިބަސް ނެގުމެވެ.
މި އަޑުއެހުމުގައި އިސްހާގުގެ ވަކީލު އަހުމަދު ޔާމީން ވިދާޅުވީ، ދިވެހި ފުލުހުންގެ ފަރާތުން އަމަލުކުރި ގޮތުން އިސްހާގުއަށް ހެކި ހާމަކުރަން ހުރަސް އެޅިފައިވާ ކަމަށެވެ. އަދި އެ ކަންބޮޑުވުން ޝަރީއަތަށް ހިއްސާ ކޮށްފައިވީނަމަވެސް، ޝަރީއަތުން ކުރިން ނިންމާފައިވާ ނިންމުމަށް ބަދަލު ގެނެސްފައެއް ނުވެއެވެ.
ނަމަވެސް ތަހުމީނުގެ ކުރީގެ ދިފާއީ ވަކީލު އަމަލުކޮށްފައިވާ ގޮތުން އޭނާއަށް ހެކި ހާމަކުރަން ހުރަސް އެޅިފައިވާވުން މުރާޖައާކޮށް އޭނާއަށް އެ ފުރުސަތު ޝަރީއަތުން ހުޅުވާދީފައިވާއިރު، އިސްހާގަށްވެސް އެ ފުރުސަތު ލިބިދޭން ޖެހޭކަމަށް ޤަބޫލު ކުރައްވާކަމަށް މި އަޑުއެހުމުގައި ވަކީލު ވިދާޅުވިއެވެ.
ވަކީލު އިތުރަށް ވިދާޅުވީ، އިސްހާގު ހައްޔަރު ކޮށްފައިވަނީ 2021 ވަނަ އަހަރުގެ މެއި މަހުގެ 25 ވަނަ ދުވަހު ކަމަށާއި، އެފަހަރު ހައްޔަރު ކުރުމަށްފަހު ކުރުމަށްފަހު ދޫކޮށްލީ ދެ މަސް ފަހުން ކަމަށެވެ.
އޭރު އޭނާ ހައްޔަރުކުރީ ހަރުކަށި ފިކުރު ފަތުރާ ކަމުގެ ތުހުމަތުގައެވެ.
ވަކީލު ވިދާޅުވީ، އޭރު ފުރަތަމަ އޭނާ ހައްޔަރުކުރިއިރު މެއި 6 ޙަމަލާ އާ ގުޅިގެން ތަހުގީގުގައި ސުވާލުކުރިނަމަ ޙާދިސާ ހިނގި ތަނުގައި ނެތްކަމުގެ ދިފާއުގައި ހެކި ހާމަކުރެވުނީސް ކަމަށެވެ.
އެހެންނަމަވެސް، ޝަރީއަތުން ކުރިން ނިންމާފައިވާ ނިންމުމަށް ބަދަލެއް ގެންނަންޖެހޭ ތަނެއް ނެތްކަމަށް މި އަޑުއެހުމުގައި ގާޒީ ވިދާޅުވިއެވެ.
