އެންޗެލޮޓީގެ ފާޑުކިޔުންތައް ރެފްރީއަށް!

އަންގާރަ ދުވަހުގެ ރޭ ޔުއެފާ ޗެމްޕިއަންސް ލީގު ސެމީ ފައިނަލްގައި ރެއާލް މެޑްރިޑް އަދި މެންޗެސްޓަރ ސިޓީ ބައްދަލުކުރި މެޗުގައި ރެފްރީއަށް ގޯސްތަކެއް ހެދިފައިވާ ކަމަށް ރެއާލްގެ ކޯޗު ކާލޯ އެންޗެލޮޓީ ބުނެފިއެވެ.

އެންޗެލޮޓީގެ ފާޑުކިޔުން އެންމެ ބޮޑަށް ހުރީ ސިޓީ އިން ޖެހި ލަނޑާ މެދުގައެވެ. ރެއާލްގެ ވިނީޝިޔަސް ލަނޑެއް ޖަހާފައިވަނިކޮށް ސިޓީއަށް ނަތީޖާ ހަމަހަމަކޮށްދިނީ ޑިބްރައިނާއެވެ. ނަމަވެސް ޑިބްރައިނާ ލަނޑު ޖެހުމުގެ ކުރިން ބެނާޑޯ ސިލްވާ އަތުން ބޯޅަ ބޭރުވިކަމަށް އެންޗެލޮޓީ ބުންޏެވެ. އެންޗެލޮޓީ ބުނީ މިފަދަ ދަނޑިވަޅެއްގައި ވީއޭއާރު ބަލަންޖެހޭނެ ކަމަށެވެ. އަދި ވީއޭއާރު ނުބެލުމުން އެންޗެލޮޓީގެ ހިތްހަމަނުޖެހުން ރެފްރީއަށް އަމާޒުވިއެވެ. އެންޗެލޮޓީގެ އަމަލުތަކުގެ ސަބަބުން ރެފްރީ ވަނީ ރީންދޫ ކާޑެއް ދައްކާފައެވެ. މެޗުގައި ރެފްރީއަށް އިތުރު ގޯސްތައްވެސް ހެދިފައިވާކަމާއި، އެކަންކަމަށް ރެފްރީ ސަމާލުކަން ނުދޭކަމަށް އެންޗެލޮޓީ ބުންޏެވެ.

ސިޓީގެ ލަނޑާ ގުޅިގެން ވީއޭއާރު ބަލަންޖެހޭކަމަށް އާސެނަލްގެ ކުރީގެ ކޯޗު، އާސެން ވެންގާވެސް ވަނީ ބުނެފައެވެ.

ފުރަތަމަ ހާފުގައި ރެއާލްއަށް އެދެވޭ ކުޅުމެއް ނުދެއްކުނު ނަމަވެސް، ދެވަނަ ހާފުގައި ރެއާލްއިން ކުޅުން ރަނގަޅުކޮށް ލަނޑު ޖަހާނެ ގިނަ ފުރުސަތުތަކެއް ވަނީ ހޯދާފައެވެ. ފައިނަލަށް ދަތުރުކުރުމަށް ރެއާލްއިން ޖެހޭނީ ސިޓީގެ ދަނޑުގައި ކުޅޭ މެޗުން މޮޅުވާންށެވެ. މި ސީޒަނުގައި މިހާތަނަށް އިއްތިހާދު ސްޓޭޑިއަމްގައި ސިޓީ ބަލިކުރެވިފައިވަނީ ހަމަ އެކަނި ބްރެންޓްފޯޑަށެވެ.