އާބިދަށް ކުރާ ދައުވާގެ ޚުލާސާ ބަޔާން އިއްވުން މިއަދު ކުރިއަށް ނުގެންދެވުނު
މި އަޑުއެހުމުގައި ތާވަލު ކޮށްފައި އޮތީ ހެތްކާގުޅޭގޮތުން ވާހަކަ ދެއްކުމާއި ޚުލާސާ ބަޔާން އިއްވުން
ބަންގްލަދޭޝްގެ ވެއިޓަރެއްކަމަށްވާ ޝަމީމްއަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ، މުހައްމަދު އާބިދު
ހުޅުމާލޭގައި ހުންނަ ޚާންޖީ ރެސްޓޯރަންޓްގައި ބަންގްލަދޭޝްގެ ވެއިޓަރެއްކަމަށްވާ ޝަމީމްއަށް ހަމަލާދީ މަރާލިކަމަށް ތުހުމަތުކުރެވޭ، ޕާކިސްތާނުގެ ކައްކާ، މުހައްމަދު އާބިދުގެ މައްޗަށް ކުރާ ދައުވާގެ އަޑުއެހުން ކެންސަލްވެއްޖެއެވެ.
މި އަޑުއެހުން ތާވަލުކޮށްފައި އޮތީ އަންގާރަ ދުވަހުގެ ހެނދުނު 09:30 އަށެވެ. ނަމަވެސް އަޑުއެހުން ކެންސަލްވެފައިވަނީ ދައުލަތާއި ދައުވާލިބޭ ފަރާތުންވެސް އަޑުއެހުން ފަސްކޮށްދިނުމަށް އެދިފައިވާތީއެވެ.
އާބިދަށް ކުރަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ.
މި އަޑުއެހުމުގައި ތާވަލު ކޮށްފައި އޮތީ ހެތްކާގުޅޭގޮތުން ވާހަކަ ދެއްކުމާއި ޚުލާސާ ބަޔާން އިއްވުމެވެ.
އެއަށްފަހު ދެން އޮންނާނީ މައްސަލައިގެ ހުކުމް ކުރެއްވުމެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއީލް ޝަފީއުއެވެ.
މި މައްސަލާގައި އެންމެ ފަހުން އަޑުއެހުމެއް ބާއްވާފައިވަނީ 29 ޖެނުއަރީގައެވެ. އެ އަޑުއެހުމުގައި އޮތީ މި މައްސަލައިގެ ޑީއެންއޭ ތަހުލީލު ރިޕޯޓު ތައްޔާރުކުރެއްވި އޮފިސަރުގެ ހެކިބަސް ނެގުމެވެ.
ހެކިވެރިޔާ ވިދާޅުވިގޮތުގައި 5 ވަޅިއަކާއި އަންނައުނުގެ އިތުރުން، ޑީއެންއޭ ތަހުލީލަށް ބޭނުންވާ ސްވޮބްތަކެއް އޭނާ ވަނީ މި މައްސަލައާ ގުޅިގެން ތަހުލީލުކޮށްފައެވެ.
މި މައްސަލާގައި ދައުލަތުގެ ޝަފަހީ ހެކިންގެ ތެރެއިން 2 ހެތްކެއްގެ ހެކިބަސް އަދި ނެގިފައެއް ނުވެއެވެ. އެއީ ޑެތު ސަމަރީ ތައްޔާރުކުރެއްވި ޑޮކްޓަރާއި އިތުރު ފަރާތެކެވެ. އެ ދެ ހެކިންނަކީވެސް ރާއްޖެއިން ބޭރުގައި ދިރިއުޅޭ ފަރާތްތަކެއް ކަމުން، ޝަރީއަތަށް ހާޒިރުކުރުމުގައި ވަނީ ގޮންޖެހުންތައް ކުރިމަތިވަމުންނެވެ. ނަމަވެސް އެ ހެކިންގެ ރިޕޯޓު ޝަރީއަތަށް ބަލައިގަތުމަށް ގާޒީ ވަނީ ނިންމަވާފައެވެ.
އޭގެ އިތުރުން، އެ ދެފަރާތުގެ ހެކިބަސް އިތުރަށް ކުރިއަށް ނުގެންދެވުމަށްވެސް ގާޒީ ވަނީ އެކަށީގެންވާ ސަބަބާއެކު ނިންމަވާފައެވެ. ދައުލަތުންވެސް އެކަމަށް އިއުތިރާޒެއް ނުކުރެއެވެ.
އާބިދު ވަނީ ގަސްތުގައި މީހަކު މެރުމުގެ ކުށުގެ ދައުވާއަށް އިންކާރު ކޮށްފައެވެ. އޭނާ ބުނާ ގޮތުގައި އޭނާއާ ކައްކާއާ ދެމެދު ހިނގި ހަމަނުޖެހުމުގައި އޭނާ އަތް ހޫރާލީ އަމިއްލަ ނަފްސުގެ ދިފާއުގައެވެ. އޭރު އެއީ ވަޅިއެއްކަންވެސް ނޭނގޭކަމަަށާއި، ގަސްދު މަރުގެ ދައުވާއަށް އިންކާރުކުރާކަމަށް އޭނާ ބުނެއެވެ.
