ރެއާލުން ނުކުންނާނީ ހާލަންޑު ހުއްޓުވާކަށް ނޫން، މުޅި ސިޓީ ހުއްޓުވަން

ޔުއެފާ ޗެމްޕިއަންސް ލީގުގެ ސެމީ ފައިނަލް ފުރަތަމަ ލެގުގައި އެންމެ ފަހުގެ ޗެމްޕިއަން ރެއާލް މެޑްރިޑު ނުކުންނާނީ އާލިން ހާލަންޑު ހުއްޓުވުމަށް ނޫން ކަމަށާއި، މުޅި ސިޓީ ހުއްޓުވުމަށް ކަމަށް ރެއާލްގެ ކޯޗު ކާލޯ އަންޗެލޮޓީ ބުނެފި އެވެ.

އަންޗެލޮޓީ މިހެން ބުނީ ރެއާލްގެ އަމިއްލަ ދަނޑުގައި ސިޓީއާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. ޕްރެސް ކޮންފަރެންސް ފަށަމުން ވެސް އަންޗެލޮޓީ ބުނީ، ހާލަންޑަކީ ވަރަށް ނުރައްކާތެރި ކުޅުންތެރިޔެއް ކަމަށެވެ. އޭނާ ފާހަގަ ކުރި ގޮތުގައި ހާލަންޑަކީ މުޅިން އެހެން ފެންވަރެއްގެ ކުޅުންތެރިޔެއް ކަމަށެވެ. ޚާއްސަކޮށް ލަނޑު ޖެހުމުގައި ހާލަންޑު އެކަން ސާބިތުކޮށްދޭ ކަމަށާއި، އެހެންކަމުން އެއީ ނުރައްކަލެއް ކަމަށް ވެސް އަންޗެލޮޓީ ބުންޏެވެ. އެހެން ނަމަވެސް އޭނާ ބުނީ ހަމައެކަނި ހާލަންޑުގެ ވާހަކަ ދެއްކުމަކީ ސިޓީގައި އޮތް ވަރުގަދަ ސްކޮޑުގެ ވާހަކަ ދެއްކުން ނޫން ކަމަށެވެ. އޭނާ ފާހަގަ ކުރި ގޮތުގައި ސިޓީ އަކީ އެޓޭކުގައި ވެސް އަދި ޑިފެންސްގައި ވެސް ވަރަށް ވަރުގަދަ ޓީމެކެވެ. އެހެންކަމުން ރެއާލުން މެޗަށް ގެންގުޅޭ ވިސްނުމަކީ ހާލަންޑު ހުއްޓުވުން ނޫން ކަމަށާއި، ނަމަވެސް ވިސްނުމަކީ "ނުހުއްޓުވޭ" ފެންވަރުގައި އޮތް ޓީމެއް ހުއްޓުވުން ކަމަށެވެ. އެ ވިސްނުމުގައި ނިކުމެ ރެއާލަށް މެޗުން މޮޅުވެވޭނެ ގޮތްތަކެއް ހުރި ކަމަށް ވެސް އަންޗެލޮޓީ ޤަބޫލުކުރެ އެވެ.

މީގެ އިތުރުން އަންޗެލޮޓީ ބުނީ މެޗުގައި ރަނގަޅު ފެންވަރެއްގައި ޑިފެންސްކޮށްފި ނަމަ، އެންމެ ކުޑަ މިނުން ހަމަހަމަ ނަތީޖާއެއް ލިބޭނެ އެވެ. ނަމަވެސް އޭގެ މާނަ އަކީ މެޗުގައި ރެއާލުން އެޓޭކު ނުކުރާނެއޭ ނޫން ކަމަށާއި، ސަބަބަކީ ރެއާލްގައި އެކަން ކުރެވޭނެ ފެންވަރު ވެސް އޮތުން ކަމަށެވެ. އެކަން ފާހަގަކޮށް އަންޗެލޮޓީ ބުނީ އެންމެ ފަހުން މިދިޔަ އަހަރު ވެސް ރެއާލުން ކުރި ހޯދީ ލަނޑު ޖަހައިގެން ކަމަށާއި، މުބާރާތުގައި އޭރު ރެއާލް އިތުރަށް ކުރިއަށްދާނެ ކަމަށް ޤަބޫލު ކުރި މީހުން ވެސް މަދު ކަމަށެވެ. އެހެންކަމުން އެކަމުން ހިތްވަރު ލިބިގަނެގެން އެއީ ކުރިއަށްދާނެ މަގެއްގެ ގޮތުގައި އަންޗެލޮޓީ ފާހަގަ ކުރި އެވެ.

އިތުރަށް އޭނާ ބުނީ އެންމެ ވާދަވެރި ވާނީ ދެ ވަނަ ލެގު ކަމަށާއި، އެހެންކަމުން ފުރަތަމަ ލެގުގައި ރެއާލަށް ނެގެން އޮތް ކުޑަ އެޑްވާންޓޭޖު ނަގަން މަސައްކަތް ކުރާނެ ކަމަށެވެ. ރެއާލްގެ ދަނޑުގައި އެ ޓީމުން ސިޓީއާ ދެކޮޅަށް ނުކުންނާނީ އަންގާރަ ދުވަހުގެ ރޭ ދަންވަރު 12 ޖަހާއިރު އެވެ.