ހޯމަ ދުވަހާ ހަމައަށް ފުއްގިރި މައްސަލަ ކްރިމިނަލް ކޯޓުގައި މަޑުޖައްސާލަން ސުޕްރީމް ކޯޓުން އަމުރުކޮށްފި
ދަށު ކޯޓުގައި މި މައްސަލަ މިހާރު އޮތީ ހެކިބަސް ނެގުމުގެ މަރުޙަލާގައި
ސުޕްރީމް ކޯޓް
ރ. ފުއްގިރި މައްސަލައިގައި އުފުލާފައިވާ ދައުވާތަކުގެ އަޑުއެހުންތައް މަޑުޖައްސާލުމަށް ސުޕްރީމް ކޯޓުން އަމުރުކޮށްފިއެވެ.
ރ. ފުއްގިރި މައްސަލައިގައި ޔާމީނުގެ އިތުރުން އިތުރު ފަރާތްތަކެއްގެ މައްޗަށް ދައުވާ ކޮށްފައިވާއިރު، މި މައްސަލަ މިހާރު އޮތީ ހެކިބަސް ނެގުމުގެ މަރުޙަލާގައެވެ.
މި މައްސަލައިގައި ކްރިމިނަލް ކޯޓުން އެންމެ ފަހުން އަޑުއެހުމެއް ބާއްވާފައިވަނީ މެއި މަހުގެ 3 ވަނަ ދުވަހުއެވެ. އެއީ އަޑުއެހުމަކީ ޔާމީނުގެ ފަރާތުން އިފްތިތާޙީ ބަޔާން އިއްވުމަށް ބޭއްވި އަޑުއެހުމެކެވެ.
ޔާމީނަށް ކުރާ ރިޝްވަތު ޤަބޫލު ކުރުމާއި މަނީ ލޯންޑަރިންގ ގެ ދައުވާއާއި ގުޅިގެންވެސް އިފްތިތާޙީ ބަޔާން އިއްވާފައިވާއިރު، ދެން މި މައްސަލައިގައި އޮންނާނީ ދައުލަތުގެ ހެކިންގެ ހެކިބަސް ނެގުންކަމަށް ދަށު ކޯޓުގެ ގާޒީ އަލީ ނަދީމް ވިދާޅުވިއެވެ. އެގޮތުން އަހުމަދު ސިޔާމް މުހައްމަދު ހިމެނޭހެން 6 ހެއްކެއްގެ ހެކިބަސް ނެގުމަށް ވަނީ ތާވަލުކޮށްފައެވެ.
އާދިއްތަ ދުވަހު ސުޕްރީމް ކޯޓުގައި ކުރިއަށް ދިޔަ އަޑުއެހުމަކީ މި މައްސަލައިގެ ޝަރީއަތުގެ ކުރީގެ ހުށަހެޅުންތަކަކާ ގުޅިގެން ޔާމީނުގެ ފަރާތުން ސުޕްރީމް ކޯޓުގައި އިސްތިއުނާފު ކޮށްފައިވާ މައްސަލައިގެ ފުރަތަމަ އަޑުއެހުމެވެ.
މި އަޑުއެހުމުގައި ޔާމީނުގެ ފަރާތުންނާއި ކްރިކް ރިޒާގެ ފަރާތުންވެސް ވަނީ ސުޕްރީމް ކޯޓުން ގޮތެއް ކަނޑައެޅެންދެން ދަށު ކޯޓުގެ އަޑުއެހުންތައް މަޑުޖައްސާލުމަށް އެދިފައެވެ.
ފަނޑިޔާރު ހުސްނުއްސުއޫދު ވިދާޅުވީ، އަންނަ ހޯމަ ދުވަހާ ހަމައަށް ފުއްގިރި މައްސަލަ ކްރިމިނަލް ކޯޓުގައި މަޑުޖައްސާލަން އަމުރު ކުރަައްވަން ފަނޑިޔާރުންގެ ބެންޗުން ނިންމަވާފައިވާ ކަމަށެވެ.
