ފާއިތުވި ހަތް އަހަރުގެ ތެރޭގައި ލިވަޕޫލުން ހޯދާފައިވާ ކާމިޔާބީތައް ގުޅިފައި ވަނީ މިލްނާއާ ކަމަށް އެ ޓީމުގެ ކޯޗު ޔާގަން ކްލޮޕް ބުނެފި އެވެ.

ކްލޮޕް މިހެން ބުނީ އަށް އަހަރު ދުވަހަށް ފަހު ލިވަޕޫލް ދޫކޮށް މިލްނާ ބްރައިޓަނަށް ބަދަލުވުމާ ގުޅޭ ގޮތުން ވާހަކަ ދައްކަމުންނެވެ. އޭނާ ބުނީ އަބަދުވެސް މިލްނާއާއެކު އޮންނާނީ ވަރަށް ގާތް އަދި ރަނގަޅު ގުޅުމެއް ކަމަށެވެ. އަދި އޭނާ މިލްނާ ރޭޓު ކުރާ މިންވަރު މިލްނާ އަށް އެނގޭނެ ކަމަށާއި، ކުލަބު ދޫކޮށްލަން ނިންމުމަކީ މިލްނާގެ އަމިއްލަ ނިންމުމެއް ކަމަށެވެ. އެހެންކަމުން ކޯޗުގެ ހައިސިއްޔަތުން އެ ނިންމުމަށް އިހުތިރާމް ކުރަން ޖެހޭނެ ކަމަށާއި، އަދި ކުރާނެ ކަމަށް ކްލޮޕް ބުންޏެވެ. މީގެ އިތުރުން ކްލޮޕް ސިފަ ކުރި ގޮތުގައި ފާއިތުވި ހަތް އަހަރު ލިވަޕޫލަށް މެދުވެރިވި ރަނގަޅު ކަންކަމާއި، ކާމިޔާބީ މިލްނާ ނެތް ނަމަ މެދުވެރި ނުވީހެވެ.

ވާދަވެރި މެންޗެސްޓަރ ސިޓީ ދޫކޮށް މިލްނާ ލިވަޕޫލަށް ބަދަލުވީ 2015 ވަނަ އަހަރު އެވެ. އޭގެ ފަހުން އެ އަހަރު އޭނާ ވަނީ ލިވަޕޫލްގެ ވައިސް ކެޕްޓަނަކަށް ހަމަޖައްސައިފަ އެވެ. މިލްނާ ވަނީ ލިވަޕޫލްގެ ކެޕްޓަން ބޭންޑު އަޅައިގެން ވެސް ކުޅެފަ އެވެ. އަށް އަހަރުގެ ތެރޭގައި އޭނާ ވަނީ މިހާތަނަށް ލިވަޕޫލަަށް 328 މެޗު ކުޅެދީ 26 ލަނޑު ޖަހައިފަ އެވެ. މީގެ އިތުރުން އެ ކުލަބާއެކު އޭނާ ވަނީ ހަތް ތައްޓެއް ކާމިޔާބުކޮށްފަ އެވެ. އެއީ އިނގިރޭސި ޕްރިމިއާ ލީގު، އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑު، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބް ވޯލްޑް ކަޕް އެވެ. މީގެ އިތުރުން ކަރަބޯ ކަޕްގެ ފައިނަލެއްގައި އެއް ފަހަރު، ޗެމްޕިއަންސް ލީގު ފައިނަލްގައި ދެ ފަހަރު އަދި ޔުއެފާ ޔޫރޮޕާ ލީގު ފައިނަލްގައި އެއް އަހަރު ވަނީ ކުޅެފަ އެވެ.