ލިވަޕޫލް އިން ހަރަދުކުރަން ޖެހިލުމެއް ނުވާނެ: ކްލޮޕް

ލިވަޕޫލް އިން ހަރަދުކުރަން ޖެހިލުމެއް ނުވާނެ ކަމަށް އެޓީމުގެ ކޯޗު ޔާގަން ކްލޮޕް ބުނެފި އެވެ.

ގޯލްޑޮޓްކޮމް އަށް ދިން އިންޓަވިއުއެއްގައި ކްލޮޕް ބުނީ ބޮޑެތި އަދަދުތަކަށް ލިވަޕޫލް އިން ފަސްނުޖެހޭނެ ކަމަށާއި، ހަރަދުތަކެއްކުރަން އެ ކްލަބު ޖެހިލުމެއް ވެސް ނުވާނެ ކަމަށެވެ.

އެހެންނަމަވެސް ކްލޮޕް ބުނީ ހަރަދުކުރާ އިރު، އެ ކުރާ ހަރަދަކީ އެންމެ އެންމެ ރަނގަޅު ހަރަދުތޯ ބަލަންޖެހޭ ކަމަށެވެ. އެގޮތުން އޭނާ ބުނީ ކުޅުންތެރިން ގެންނަ އިރު އެ ކުޅުންތެރިޔާގެ ފެންވަރު ބަލާ އަދި ކްލަބްގެ ފެން ވަރު ވެސް ބަލަންޖެހޭ ކަމަށެވެ.

މޮޅެތި ކުޅުންތެރިން ހޯދުމަކީ ފަސޭހަކަމެއް ނޫންކަން ފާހަގަކުރަމުން ކްލޮޕް ބުނީ ލިވަޕޫލްގައި މިވަގުތު ތިބީ ރަނގަޅު ކުޅުންތެރިން ކަމަށާއި، މިހާރު ތިބި ފެންވަރުގެ ކުޅުންތެރިން ކްލަބަށް ގެނެސްފި ނަމަ އެކަން އެހާ ފަސޭހަވެގެންނުދާނެ ކަމަށެވެ.

ކުރިޔަށް އޮތް ސީޒަނަށް ތައްޔާރުވުމުގެ ގޮތުން މިހާތަނަށް ލިވަޕޫލް އަށް ވަނީ ދެ ކުޅުންތެރިޔަކު ގެނެސްފައެވެ. އެއީ ރޯމާ އަށް ކުޅެމުން އައި މުހައްމަދު ސަލާހް އެވެ. ލިވަޕޫލް އިން އޭނާގެ ސޮއި ހޯދީ 34 މިލިއަން ޕައުންޑަށެވެ. ދެވަނަ އަށް އެޓީމަށް ގެނައީ ހަލް ސިޓީ އަށް ކުޅެމުން އައި އެންޑްރިއު ރޮބަޓްސަން އެވެ. އޭނާގެ ސޮއި ލިވަޕޫލް އިން ހޯދީ 10 މިލިއަން ޕައުންޑަށެވެ.

މިދިޔަ ސީޒަން ލިވަޕޫލް ނިންމާލީ އާސެނަލް އަށްވުރެ އިތުރަށް އެއް ޕޮއިންޓް ހޯދައިގެން ޕްރިމިއާ ލީގުގެ ހަތަރުވަނައާ އެކުގައެވެ. އެޓީމު ވަނީ ކުޅުނު 38 މެޗުގެ ތެރެއިން 22 މެޗު ކާމިޔާބުކޮށްފައެވެ. އަނެއް 10 މެޗުން އެޓީމު އެއްވަރުވެފައިވާއިރު، ހަ މެޗުން ވަނީ ބަލިވެފައެވެ.