ޕެރަލިމްޕިކްގެ ފުރަތަމަ ރަން މެޑައްޔާއެކު މާޒިން ތާރީޚުގެ ތެރެއަށް

އިންޑިއަން އޯޕަން ޕެރަ އެތުލެޓިކްސްގެ އިންޓަނޭޝަނަލް ޗެމްޕިއަންޝިޕުގައި ރަން މެޑަލް ހާސިލްކޮށް ރާއްޖޭގެ މުޙައްމަދު މާޒިން ތާރީޚުން ޖާގަ ހޯދައިފި އެވެ.

އިންޑިއާގެ ބެންގަލޫރުގައި ކުރިއަށްދާ މުބާރާތުން މާޒިން ރަން މެޑަލް ހޯދީ ޓީ11 ކެޓަގަރީގެ 100 މީޓަރު ދުވުމުންނެވެ. މާޒިން ރަން މެޑަލް ހޯދީ 16.39 ސިކުންތުން ރޭސް ނިންމައިގެންނެވެ. މާޒިންގެ ގައިޑެއްގެ ގޮތުގައި ދުވުނީ ހުސައިން ޝިފާޒް  އެވެ.

އިންޓަރނޭޝަނަލް ޕެރަލިމްޕިކް ކޮމިޓީގެ ގްރާންޓްގެ ދަށުން ބައިވެރިވި މިމުބާރާތުގައި 12 ޤައުމަކުން ވާދަކުރެ އެވެ. ރީޖަނަލް ސްޕޯޓްސް ޓްރެއިނިންގ އާއެކު ކުރިއަށް ގެންދާ މިމުބާރާތުގައި ރާއްޖެއިން ޕެރަ އެތުލެޓިކްސް ކުޅުންތެރިއަކު، ޕެރަ އެތުލެޓިކްސް ކޯޗަކު، ޕެރަ އެތުލެޓިކްސް ޓެކްނިކަލް އޮފިޝަލެއްގެ އިތުރުން ޕެރަ ބެޑްމިންޓަން ކްލެސިފަޔަރަކު ތަމްރީނު ކުރެވިފައިވެ އެވެ.

މާޒިން އަންނަނީ ބައިނަލްއަޤުވާމީ މުބާރާތްތަކުގައި ވާދަކޮށް ރާއްޖެ އަށް ރަން މެޑަލް ހޯދައިދިނުމަށް ގިނަ މަސައްކަތް ތަކެއް ކުރަމުންނެވެ. އަދި މިވަނީ އެއުންމީދު ހާސިލް ވެފައެވެ.