މެސީ މައާފަށް އެދެފި!
މެސީ ބުނީ، ޕީއެސްޖީގެ އެންމެހައި ކުޅުންތެރިންގެ ކިބައިން މައާފަށް އެދޭ ކަމަށާއި، މިހާރު އިންތިޒާރު ކުރަމުން އަންނަނީ ކުލަބުން ދެން ނިންމާނެ ނިންމުމަކަށް ކަމަށް
ޕީއެސްޖީން ލޮރިއެންޓާ ދެކޮޅަށް ކުޅުނު މެޗުގައި މެސީ
ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ މައާފަށް އެދެފި އެވެ.
މެސީ މައާފަށް އެދިފައި ވަނީ ޕީއެސްޖީގެ ހުއްދަ ނުހޯދައި އޭނާ ސައުދީ އަރަބިއްޔާ އަށް ދަތުރު ކުރި މައްސަލައިގައި އެ ކުލަބުން އޭނާ ދެ ހަފްތާ އަށް ސަސްޕެންޑު ކުރުމަށް ނިންމުމުންނެވެ. އެކަމާ ގުޅިގެން މެސީ އޭނާގެ އިންސްޓްގްރާމް ސްޓޯރީގައި އާންމު ކުރި ވީޑިއޯއެއްގައި ބުނީ، އާންމު ގޮތެއްގައި މެޗަށް ފަހު ޖެހިގެން އަންނަ ދުވަހަކީ އޮފު ދުވަހެއް ކަމަށެވެ. އެހެންކަމުން ލޮރިއެންޓު އަތުން ބަލިވި މެޗަށް ފަހު ޖެހިގެން އައި ދުވަހަކީ އޮފް ދުވަހެއް ކަމަށް ބެލެވުނު ކަމަށެވެ. މެސީ ބުނީ މާކުރިން ވެސް އޭނާ އޮތީ ސައުދީ ދަތުރު ރާވާފައި ކަމަށާއި، އަދި އެ ދަތުރު ކެންސަލް ކުރެވެން ނެތް ކަމަށެވެ. ސަބަބަކީ މީގެ ކުރިން ވެސް އެ ދަތުރު ކެންސަލްކޮށްފައި އޮތުމުން ކަމަށެވެ. މީގެ އިތުރުން މެސީ ބުނީ، ޕީއެސްޖީގެ އެންމެހައި ކުޅުންތެރިންގެ ކިބައިން މައާފަށް އެދޭ ކަމަށާއި، މިހާރު އިންތިޒާރު ކުރަމުން އަންނަނީ ކުލަބުން ދެން ނިންމާނެ ނިންމުމަކަށް ކަމަށެވެ.
ޕީއެސްޖީއާއެކު މެސީ ހަދާފައިވާ އެއްބަސްވުމުގެ މުއްދަތު ހަމަވާނީ މިއަހަރުގެ ޖޫން މަހުގެ ނިޔަލަށެވެ. އެހެންކަމުން ޕީއެސްޖީން އޮތީ މެސީ އަށް އެއްބަސްވުން އައު ކުރުމަށް ހުށަހަޅައިފަ އެވެ. ނަމަވެސް މީގެ މަސް ދުވަސް ކުރިން މެސީ ވަނީ އެއްބަސްވުން އައު ކުރަން ބޭނުންނުވާކަން އެ ކުލަބަށް އަންގާފައި ކަމަށް ރިޕޯޓުތައް ބުނެ އެވެ. މެސީ އާއި ޕީއެސްޖީއާ ދެމެދު މައްސަލަ ޖެހުނުއިރު، ކުލަބުގެ އިސްވެރިން ތިބީ މެސީގެ އަމަލާމެދު ވަރަށް ބޮޑަށް ހިތްހަމަނުޖެހިފައި ކަމަށް ވެސް ރިޕޯޓުތައް ބުނެ އެވެ.
