އަދީބުގެ ދެ ވަކީލުންގެ މައްޗަށް ޖިނާއީ ތުހްމަތުތަކެއް ކޮށް، ފޯނު ހިފަހައްޓައިފި

ކުރީގެ ނައިބު ރައީސް އަހްމަދު އަދީބުގެ ދެ ވަކީލުން ކަމަށްވާ މަހްފޫޒު ސައީދާއި މޫސާ ސިރާޖުގެ މައްޗަށް ޖިނާއި ތުހްމަތުތަކެއް ކޮށް ތަހްގީގު ފަށައިފި އެވެ.

އެ ދެ ވަކީލުން ހޮނިހިރު ދުވަހުގެ ރޭ ފުލުސް އޮފީހަށް ހާޒިރުކޮށް ކޯޓު އަމުރެއްގެ ދަށުން ފޯނު ތިން މަސްދުވަހަށް ވަނީ އަތުލާފަ އެވެ.

ރާއްޖެއެމްވީއަށް މައުލޫމާތު ދެއްވަމުން މަހްފޫޒާއި ސިރާޖު ވިދާޅުވި ގޮތުގައި އަދީބު އަވަހާރަކޮށްލަން ރާވަމުންދާ ކަމަށް ލިބުނު މައުލޫމާތުގެ މައްޗަށް ބިނާކޮށް އެ މައްސަލަ ބަލާދޭން ފުލުހަށް ހުށައެޅުއްވުމާ ގުޅިގެން ޖިނާއީ ތިން ތުހްމަތެއް ވަނީ ކޮށްފައިވެ އެވެ. އެއީ

• ކަނޑައެޅިގެން ސައްހަ ނޫން މައުލޫމާތުތަކެއް ފެތުރުން
• ގާނޫނީ އިދާރާއެއްގެ މަސައްކަތަށް ހުރަސްއެޅުން
• ގާނޫނުގެ ބާރު ހިންގަން ހުރަސް އެޅުން

ސިރާޖާއި މަހްފޫޒު ހޮނިހިރު ދުވަހުގެ ރޭ ފުލުސް އޮފީހަށް ހާޒިރުކޮށް އެ ދެމީހުންގެ މައްޗަށް ޖިނާއީ ތުހްމަތުކޮށް ތަހްގީގު ކުރަމުންދާ ކަމަށް ވަނީ އަންގާފަ އެވެ. އެހެން ނަމަވެސް އެ ދެމީހުންވެސް މައްސަލާގައި އެއްޗެއް ބުނަން ބޭނުންވަނީ ވަކީލަކާއެކު ކަމަށްވާތީ ބަޔާނެއް ނަގާފައެއް ނުވެއެވެ.

ފުލުސް އޮފީހުން ނިކުމެވަޑައިގެން ރާއްޖެއެމްވީއަށް މައުލޫމާތު ދެއްވަމުން މަހްފޫޒު ވިދާޅުވި ގޮތުގައި އަދީބު އަވާހަރަ ކޮށްލަން އުޅޭ ކަމުގެ މައުލޫމާތު ލިބިގެން އެކަން ބެލުމަށް ހުށަހެޅި މައްސަލައާ ގުޅިގެން ފުލުހުން ބޭނުންވަނީ އެ މައުލޫމާތު ލިބުނު ގޮތް ހޯދަން ކަމަށެވެ.

''ނަމަވެސް އަޅުގަނޑުމެންވާނެ އެ މައުލޫމާތު ސާފުކުރަން ހާޒިރުކުރި ދުވަހުވެސް ދަންނަވާފަ އަޅުގަނޑުމެނަކަށް އެ މައުލޫމާތު ދެވޭކަށްނެތޭ.،"

މަހްފޫޒު ވިދާޅުވީ އަދީބު އަވަހާރަކޮށްލަން އުޅުނު ކަމުގެ މައުލޫމާތު ލިބުނުގޮތް ހޯދުމަށްވުރެ އެފަދަ ކަމެއް ވިޔަ ނުދިނުމަށް އަޅަން ޖެހޭ ފިޔަވަޅުތައް އެޅުން ރަނގަޅުވާނެ ކަމަށެވެ.

ސިރާޖު ވިދާޅުވީ އަދީބު އަވަހަރާ ކޮށްލަން އުޅޭ ކަމުގެ މައުލޫމާތު ލިބުނީ ފުލުހުންގެ ތެރެއިން ކަމަށާއި އެހެންކަމުން މައުލޫމާތު ދިން ފަރާތާއި އަދީބުގެ ރައްކާތެރިކަމަށްޓަކައި މައުލޫމާތު ދިން ފަރާތް ބުނެދިނުމަށް އިންކާރު ކުރާ ކަމަށެވެ.

އަދި މަހްފޫޒު ވިދާޅުވީ ފުލުހުންނަށް މައްސަލައެއް ހުށަހަޅާއިރު އެ މައުލޫމާތު ލިބުނު ގޮތް ބުނެދިނުމަށް އެއްވެސް ގާނޫނެއްގައި ލާޒިމް ނުކުރާ ކަމަށާއި އަދި މައުލޫމާތެއް ދިނުމަށްފަހު ސިއްރު ކުރުމަށް އެދިއްޖެ ނަމަ ސިއްރުވެސް ކޮށްދޭން ޖެހޭ ކަމަށެވެ.

މަހްފޫޒު ވިދާޅުވީ އަދީބު އަވަހާރަކޮށްލަން އުޅޭ ކަމުގެ މައުލޫމާތު ފުލުހުންނަށް އެމީހުން ދިން ފަހުން އަދީބުގެ ކަންކަން ގާތުން ބަލަމުންދާ ކަމަށެވެ.