ރެއާލް މެޑްރިޑުން ޖޫޑް ބެލިންގހަމް ހޯދުމުގެ މަޝްވަރާތައް ފަށައިފި

ސްޕެއިންއާއި ޔޫރަޕްގެ ޗެމްޕިއަން ރެއާލް މެޑްރިޑުން އިނގިރޭސި ޒުވާން މިޑްފީލްޑަރ ޖޫޑް ބެލިންގހަމް ހޯދުމުގެ މަޝްވަރާތައް ފަށައިފިއެވެ.

19 އަހަރުގެ މިޑްފީލްޑަރ ހޯދުމަށް 100 މިލިއަން ޔޫރޯ ހޭދަކުރަން ރެއާލް އޮތީ ތައްޔާރަށެވެ. އެކަމަކު ބެލިންގހަމް ކުޅެމުން އަންނަ ޖަރުމަނުގެ ބޮރޫޝިޔާ ޑޯޓްމަންޑުން ކިޔާ އަގަކީ 150 މިލިއަނަށްވުރެ ބޮޑު އަގެއްކަމަށް ރިޕޯޓްތައް ބުނެއެވެ. އެކަމަކު މިދިޔަ އަހަރުގެ ވަރލްޑްކަޕްގައި އިނގިރޭސި ޓީމުން އެންމެ ބޮޑަށް ފާހަގަވި ބެލިންގހަމްގެ ސޮއި ހޯދޭނެކަމަށް ރެއާލް އޮތީ އިތުބާރާއެކުއެވެ. ރެއާލްއަށް އޮތް ގޮންޖެހުމަކީ ޔޫރަޕްގެ އެހެން ކްލަބްތަކުންވެސް ބެލިންގހަމްއަށް ޝައުޤުވެރިވުމެވެ. އޭގެތެރޭގައި ރެއާލްއާ ދެކޮޅަށް ޗެމްޕިއަންސް ލީގު ސެމީފައިނަލްގައި ނިކުންނަ މެންޗެސްޓަރ ސިޓީވެސް ހިމެނެއެވެ. އަގު ބޮޑުވުމުން ލިވަޕޫލް ވަނީ އެރޭހުން ބޭރުވެފައެވެ.

ރެއާލް މެޑްރިޑްގައި މިހާރުވެސް ޒުވާން މޮޅު ކުޅުންތެރިންތަކެއް އެބަތިއްބެވެ. އޭގެތެރޭގައި މިޑްފީލްޑަރުން ކަމަށްވާ ކަމަވިންގާ, ޗުއަމެނީ, ފެޑެރީކޯ ވަލްވާޑޭ އަދި ފޯވާޑުން ކަމަށްވާ ވިނީޝިއުސް ޖޫނިއަރ, ރޮޑްރީގޯ, ޑިފެންޑަރ އެޑާ މިލިޓާއޯ ހިމެނެއެވެ.

ބެލިންގހަމްއަކީ 19 އަހަރުގައި ޑޯޓްމަންޑްގެ ކެޕްޓަނެވެ. އޭނާއަކީ އެކްލަބްގެ ތާރީޚުގަައިވެސް އެންމެ ޒުވާން ކެޕްޓަނެވެ. 2020 ވަނަ އަހަރު އޭނާ ޑޯޓްމަންޑާ ގުޅުނީ ބާމިންގހަމް ސިޓީންނެވެ. އަދި މިސީޒަންގައި ޑޯޓްމަންޑަށް ކުޅުނު 40 މެޗުން 11 ގޯލް ޖަހާ, ހަތް ގޯލް ޖަހަން އޭނާ ވަނީ ފުރުޞަތު ތަނަވަސްކޮށްދީފައެވެ.