އާޓެޓާ އެދެނީ އާސެނަލްގެ ކުޅުންތެރިން "ކަށިން" ހިތްވަރު ނެރެގެން މަސައްކަތް ކުރަން

އާސެނަލްގެ ކުޅުންތެރިން އެންމެ ފަހު ވަގުތާ ހަމައަށް ވެސް "ކަށިން" ހިތްވަރު ނެރެގެން މަސައްކަތް ކުރަން އެދޭ ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

އާޓެޓާ މިހެން ބުނީ އާސެނަލުން ލީގުގައި ޗެލްސީ ބަލި ކުރި މެޗަށްފަހު އެވެ. އާޓެޓާ ބުނީ ބާކީ އޮތީ ހަތަރު މެޗު ކަމަށާއި، އާސެނަލްގެ ކުޅުންތެރިންނަށް އަދިވެސް ލީގު ހޯދޭނެ ކަމަށެވެ. އޭނާ ބުނީ ދިގު މުއްދަތަކަށްފަހު ލީގު ތާވަލްގެ އެއް ވަނަ މަގާމު ގެއްލުމަކީ އެއްވެސް ހާލެއްގައި ކޮށްގެން ވާނެ ކަމެއް ނޫން ކަމަށެވެ. އަދި ފާއިތުވި މުއްދަތުގައި އާސެނަލް އެެއް ވަނައިގައި އޮތީ ވެސް އެ ޓީމުގެ ފެންވަރު ދައްކައިގެން، މޮޅު ކުޅުން ދައްކައިގެން ކަމަށެވެ. އެހެންކަމުން ކުރިއަށް އޮތް މަދު ދުވަސްތަކުގައި ވެސް ލިބޭ ފުރުސަތުތަކުގެ ބޭނުން ހިފައިގެން ކުރިއަށް ދާން ޖެހޭނެ ކަމަށެވެ.

ޗެލްސީ މެޗާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، ކުޅެން ބޭނުންވީ ވެސް އުނދަގޫ މެޗެއް ކަމަށާއި، މެޗު ފަށައިގެން ކުރީކޮޅު ކޮންމެވެސް ވަރަކަށް އެކަން ދިމާވި ކަމަށެވެ. އާޓެޓާ ބުނީ ޗެލްސީ މެޗުގައި އާސެނަލުން ދެއްކީ އެ ޓީމުގެ ފެންވަރު ކަމަށާއި، މިހާރު އަނެއްކާ ވެސް އެ ޓީމުގެ އަސްލު ރޫހު އައިސްފައިވާ ކަމަށެވެ. އެގޮތުން ސާބިތުކޮށްދޭން ބޭނުންވަނީ ވެސް އާސެނަލް އަކީ އެންމެ އުނދަގޫ ވަގުތުގައި ވެސް އެ ދިމާވާ ކަންކަމާއެކު ކުރިއަށް ދާނެ ޓީމެއްކަން ކަމަށެވެ. އަދި ފާއިތުވި ދުވަސްތަކުގައި ކުޅުންތެރިން ފަރާތުން އެކަން ފެނުނު ކަމަށާއި، ޗެލްސީ މެޗަށް ތައްޔާރުވީ އެކަންކަމާއެކު ކަމަށް އޭނާ ބުންޏެވެ.

މެޗަށް ނުކުތްއިރު ނަފްސާނީ ގޮތުން ވެސް އާސެނަލް އޮތީ ވަރަށް ރަނގަޅަށް ކަމަށާއި، ފާއިތުވި މެޗުތަކުގެ ހިތްދަތިކަން ދުއްވާލުމަކީ ވެސް ބޮޑު ކަމެއް ކަމަށް އާޓެޓާ ބުންޏެވެ. އޭނާ ބުނީ ކުޅުންތެރިންގެ ފޯކަސް މިހާރު ހުރީ ކުރިއަށް ހުރި މެޗުތަކުގައި ރަނގަޅު ކުޅުމެއް ދައްކައިގެން، ފަހު ވަގުތާ ހަަމައަށް ވެސް ލީގު ހޯދުމަށް މަސައްކަތް ކުރުން ކަމަށެވެ. އަދި އާސެނަލަށް ދަށް ނަތީޖާތައް ލިބުނު މެޗަށްފަހު އޭނާ ބޭނުންވީ ޓީމުގެ ޙާލަތު ބަދަލު ކުރަން ކަމަށާއި، ވަރަށް ފަސޭހައިން އެކަން ކާމިޔާބު ވެސްވި ކަމަށެވެ. އެއީ މިވަގުތަށް ކުރެވުނު ވަރަށް މުހިންމު ކަމެއް ކަމަށް އާޓެޓޭ ވަނީ ފާހަގަކޮށްފަ އެވެ.

މީގެ އިތުރުން އާޓެޓާ ވަނީ އާސެނަލްގެ މާޓިން އޮޑެގާޑަށް ވަރަށް ބޮޑަށް ތައުރީފުކޮށްފަ އެވެ. އޭނާ ބުނީ، މި ސީޒަނުގައި އޮޑެގާޑު އަންނަނީ މޮޅު ކުޅުމެއް ދައްކަމުން ކަމަށާއި، ޓީމަށް އޭނާ ވަމުން އަންނަ އެހީތެރިކަމާއި، އޭނާގެ ހުނަރާމެދު ވަރަށް ހިތްހަމަ ޖެހޭ ކަމަށެވެ. އަދި އާސެނަލްގެ ކޮންމެ ކުޅުންތެރިޔަކީ ވެސް މޮޅު ކުޅުންތެރިޔެއް ކަމަށާއި، ކުޅުންތެރިންނަށް ފުރިހަމަ އަށް އިތުބާރު އޮންނާނެ ކަމަށެވެ.

ލީގުގައި އާސެނަލަށް ދެން އޮންނާނީ މި މަހުގެ ހަތް ވަނަ ދުވަހު ނިއުކާސަލް ޔުނައިޓެޑުގެ ދަނޑުގައި އެ ޓީމާ ދެކޮޅަށް ކުޅޭ މެޗެވެ. ނިއުކާސަލް އަކީ މިވަގުތު ފޯމުގައި އޮތް ވަރުގަދަ ޓީމެކެވެ.