ޗާގޯސްއަކީ ރާއްޖޭގެ ސަރަހައްދެއް ނޫން، ނޫންނަމަ ދިވެހި ދައުލަތުން އޮންނާނީ ކްލެއިމްކޮށްފަ - ޑރ. މުނައްވަރު
3 މެއި 2023 | ބުދަ 17:38އިޓްލޮސްއިން ނިންމި ނިންމުމުގައި ވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށްފައި
ޗާގޯސްގެ މައްސަލައިގައި އިދިކޮޅުން ބޭއްވި ނޫސްވެރިންގެ ބައްދަލުވުމުގެ ތެރެއިން
ޗާގޯސްއަކީ ރާއްޖޭގެ ސަރަހައްދެއް ނޫންކަމަށާއި، އެހެން ނޫންނަމަ ދިވެހި ދައުލަތުން އޮންނާނީ ކްލެއިމްކޮށްފައި ކަމަށް، ކުރީގެ ބަންޑާރަ ނައިބު ޑރ. މުހައްމަދު މުނައްވަރު ވިދާޅުވެއްޖެއެވެ.
ޗާގޯސްއާ ދިވެހިރާއްޖެއާ ދެމެދުގައިވާ ކަނޑުގެ ސަރަހައްދުގެ މައްސަލާގައި އިޓްލޮސްއިން އޭޕްރީލް 28ގައި އިއްވި ހުކުމަކީ އިގްތިސާދީ ނަފާ ހޯދުމަށް ދިވެހިންނަށް ލިބެން އޮތް 200 ނޯޓިކަލް މޭލުގެ ބޮޑު ސަރަހައްދު ހޯދުމަށް އޮތް ފުރުސަތު ގެއްލުވައިލުން ކަމަށް، އިދިކޮޅު ފަރާތްތަކުން ދަނީ ބުނަމުންނެވެ. އަދި ޗާގޯސްއަކީ ރާއްޖޭގެ ތަނެއްކަމަށާއި، އެތަނުގެ މިލްކުވެރިކަމަށް ދައުވާކުރުމަށް އޮތް ފުރުސަތު ގެއްލުވައިލާފައިވާކަމަށް ބުނެ އެފަދަ ފަރާތްތަކުން ދަނީ އެކަމާ ދެކޮޅަށް އެކި ޕްލެޓްފޯމްތަކުގައި އަޑުއުފުލަމުންނެވެ.
އެހެންނަމަވެސް ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި މުނައްވަރު ވިދާޅުވީ، އެއްވެސް ތަނެއްގެ މިލްކުވެރިކަމަށް ވަކާލާތުކުރަން ދައުލަތަށް ފެންނަނަމަ އެކަން މިހާހިސާބަށް އައިއިރު އޮންނާނީ ކޮށްފައިކަމަށެވެ. ޗާގޯސްގެ މިލްކުވެރިކަމާމެދު ވާހަކަދެކެވި، އެއީ މައުލޫއެއްގެ ގޮތުގައި ނަގަންފެށީ، މިހާރު ސުވާލު އުފެދިފައިވާ ޗާގޯސްގެ ކަނޑުގެ ސަރަހައްދުގެ މައްސަލައާ ހިސާބުން ކަަމަށްވެސް އޭނާ ވިދާޅުވިއެވެ. މުނައްވަރު ވިދާޅުވީ ޗާގޮސްއަކީ ރާއްޖޭގެ ބައެއް ކަމަށް ދެކޭނަމަ އިކޮނޮމިކް ޒޯން އޮންނަންވާނީ ޗާގޯސްގެ ދެކުނުގައި ކަމަށެވެ.
އެ ނޫސްވެރިންގެ ބައްދަލުވުމުގައި، ކުރީގެ ބަންޑާރަ ނައިބުކަން ކުރައްވާފައިވާ ގާނޫނީ ވަކީލާ އާޒިމާ ޝަކޫރްވެސް ވަނީ، ޗާގޯސްއަކީ ރާއްޖޭގެ ތަނެއް ނޫންކަމަށް ވިދާޅުވެފައެވެ. އެހެންނަމަވެސް އެ ވާހަކައަކީ ރާއްޖެއިން ގެއްލުނު ސަރަހައްދު ހޯދުމާ ގުޅުންހުރި ވާހަކައެއް ނޫންކަމަށް އާޒިމާ ވަނީ ވިދާޅުވެފައެވެ. އާޒިމާ ވަނީ ރާއްޖޭގެ ސަރަހައްދުގެގޮތުގައި ގާނޫނުން ކަނޑައަޅާފައިވާ އިމުން ބައެއް ސަރުކާރުން ދޫކޮށްލާފައިވާކަމަށް ތުހުމަތުކުރައްވާފައެވެ.
އިޓްލޮސްއިން ނިންމި ނިންމުމުގައި ވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށްފައެވެ. އިޓްލޮސްގެ ސްޕެޝަލް ޗެމްބަރުން އިއްވި ނިންމުމުގައި ވަނީ، ތިލަ ދިޔަވަރުގައި ފެންނަން އޮންނަ ފަރަކުން އިން ވަކިކުރުމަށްޓަކައި އިކުއިޑިސްޓަންސް ރޮނގު ދެމޭނެ އެއްވެސް ހަމައެއް ނެތްކަމަށެވެ. އެއާއެކު މޮރިޝަސްއާ ދެކޮޅަށް މައްސަލަ ނިމުމުން، ދެގައުމުގެ ފުށުއަރާ ސަރަހައްދުން ރާއްޖެއަށް ވަނީ 4،687 އަކަކިލޯމީޓަރުގެ އިތުރު ސަރަހައްދެއް ކަށަވަރުވެފައެވެ.
