ދިރިއުޅުމުގެ މައިދާނަކީ ކޮންމެ މީހަކަށްވެސް އެތައް އިމްތިޙާނަކާ ކުރިމަތި ކުރުވާ މައިދާނެކެވެ. ގިނަ ފަހަރަށް މިފަދަ އިމްތިޙާނުތަކާ ކުރިމަތިވަނީ ވިސްނާވެސް ނުލެވި ތިއްބައެވެ. އެހެން ބަޔަކު ކުރާ ކަމެއްގެ ސަބަބުން، ކަމާ ނުވެސް ބެހޭ ބަޔަކަށް އެތައް ތަކްލީފެއް އުފުލަންޖެހޭ ފަހަރު އާދެއެވެ. މިއީވެސް އިމްތިޙާނެކެވެ. މިކަމުގައި އޮތީ ސާބިތުވެ، ދިރިއުޅުމައިގެން ކުރިއަށް ދިއުމެވެ. އެންމެންނަކީ އެންމެ އަރާމުގައި އުޅެވޭނެ ބައެއް ނޫނެވެ. ނަމަވެސް، އެ ޙާލަތުގައިވެސް އޮތީ ދިރިއުޅުމައިގެން ކުރިއަށް ދިއުމެވެ.

ތޫނިސްގެ އައްސޭރިފަށުގެ އަވަށެއް ކަމަށްވާ ޒާރާތުގެ އަންހެނުންނަކީ މިފަދަ ގޮތަކަށް ދިރިއުޅުން ނަގަހައްޓަމުން އަންނަ، ހީވާގި، އަދި އެހާމެ މުރާލި ބައެކެވެ. ކޮންމެ ދުވަހަކު، އެތައް ގަޑިއިރެއް ވަންދެން ގުދަށް އޮވެ، ޝެލްފިޝް، ނުވަތަ ހަރުތޮށި ލީ ސީފުޑްގެ ބާވަތްތައް ހޮވުން ނޫން ގޮތެއް، މިއަދު އެމީހުންނަކަށް ނެތެވެ. ޕްލާސްޓިކް ބޫޓުތަކަށް އަރައިގެން ތިބެ، ބާލިދީއާއި އެނޫންވެސް އެކި ކަހަލަ އާލާތްތައް ހިފައިގެން ގޮނޑުދޮށުގައި ޝެލްފިޝް ހޮވާ އަންހެނުންގެ ސަފުތައް ދަމާލާފައި ވާ އިރު، ކޮންމެ މީހެއްގެ ކިބައިންވެސް ފެނިގެންދަނީ ކެތްތެރި ކަމާއި ހިތްވަރެވެ.

ޝެލްފިޝް ހޮވާ، އޭގެ ވިޔަފާރި ކުރުމަކީ ތޫނިސްގެ އިރުމަތީ އައްސޭރިފަށުގެ ސަރަޙައްދުގައި ދިރިއުޅެމުންދާ އަންހެނުންގެ މެދުގައި އެތައް ޖީލަކަށް ދެމިގެން ގޮސްފައި ވާ މަސައްކަތެކެވެ. އެތައް ހާށް އަންހެނުންނެއް މި މަސައްކަތުން އާމްދަނީ ހޯދާފައި ވާ އިރު، މިހާރުވެސް އެކަން ދަނީ ކުރިއަށެވެ.

ޝެލްފިޝް ހޮވުމުގައި ހުރި ބުރައަކީ، އެކަމުގައި ނުއުޅޭ މީހަކަށް ވަޒަން ކޮށްލަންވެސް ނޭނގޭހާ އުނދަގޫ ކަމެކެވެ. ޖިސްމާނީ ގޮތުންވެސް އެތައް ބުރައެއް އުފުލަންޖެހެއެވެ. ޝެލްފިޝް ހޮވުމަކީ ވަކި ހާއްސަ ހުނަރުތަކެއް ދަސްކޮށްގެން ކުރެވޭ ކަމެކެވެ. އެކަމަށް، ވަކި އުކުޅުތަކެއް ފައްކާ ކުރުން، ކޮންމެހެން ބޭނުމެވެ.

ޝެލްފިޝް ހޮވުމުގެ މަސައްކަތުގައި އުޅޭ އަންހެންވެރިން ގޮނޑުދޮށަށް ދިއުމަށާއި، ޝެލްފިޝްކޮޅެއް ހޮވާލައިގެން އެނބުރި އެއްގަމަށް ދިއުމަށް އެތައް ގަޑިއިރެއް ހޭދަ ކުރެއެވެ. އެއްގަމަށް އެރުމަށްފަހު، ކޮންމެވެސް ވިޔަފާރިވެރިއަކަށް އެ ޝެލްފިޝްކޮޅު ވިއްކާލައެވެ.

ޢުމުރުން 50 އަހަރު ފުރިފައި ވާ ފާޠިމާ ބަހްރީއަކީ ކޮންމެ ދުވަހަކުހެން ޝެލްފިޝް ހޮވަން ދާ މީހެކެވެ. ކޮންމެ އަހަރަކު އެތައް މަހަކު އޭނާ އެ މަސައްކަތް ކުރެއެވެ. ހެނދުނު 06:00 ޖަހާއިރު މަސައްކަތް ފަށާ ގޮތަށް، މެންދުރުން އަނބުރާ 01:00 ޖަހަންދެން ފާޠިމާ އުޅެނީ ޝެލްފިޝް ހޮވުމުގެ މަސައްކަތުގައެވެ. ހުރިހާވެސް މަޤްޞަދަކީ، އޭނާގެ ދަރިންގެ ބޭނުންތައް ފުއްދައި ދިނުމެވެ.

އިޤްތިޞާދީ ހީނަރުކަމުގެ އަނދަވަޅެއްގެ ތުންފަތް މަތީގައި އޮތް ތޫނިސްގައި މިއަދު ފާޠިމާއަށް އެނޫން ގޮތެއް ނެތީއެވެ.

ކަން މިހެން އޮތް ޝެލްފިޝް ހޮވުމުގެ މަސައްކަތުގައި އުޅޭ އަންހެންވެރިން ވަނީ އިތުރު ކަމެއް ފާހަގަކޮށްފައެވެ. ޚައިރިއާ ދަބްކާއާއިއެކު ޝެލްފިޝް ހޮވުމުގެ މަސައްކަތުގައި އުޅޭ އެހެން މީހުންވެސް ފާހަގަ ކުރި ގޮތުގައި، ޝެލްފިޝް ލިބުން މިހާރު ވަނީ އިންތިހާއަށް ދަތިވެފައެވެ.

ޒާރާތު އަވަށުގައި އޮންނަ ޝެލްފިޝް ހޮވާ މީހުންގެ ޖަމިއްޔާގެ އިސްވެރިއެއްގެ ގޮތުގައި މަސައްކަތް ކުރާ މިސްބާހް ޒާބީ ފާހަގަ ކުރި ގޮތުގައި، ޝެލްފިޝް ލިބުން ދަތިވެފައި ވަނީ މޫސުމީ ނޭދެވޭ ބަދަލުތަކާއި، ތަޣައްޔަރު ކަމުގެ ސަބަބުންނެވެ.

ޝެލްފިޝް ހޮވުމުގެ މަސައްކަތުގައި 40 އަކަށް އަހަރު މަސައްކަތް ކޮށްފައި ވާ ޚައިރިއާ ބުނި ގޮތުގައި، ޝެލްފިޝް ލިބޭ މިންވަރު މަދުވެފައި ވަނީ މޫސުމީ ނޭދެވޭ ބަދަލުތަކާއެކު، ގޮނޑުދޮށަށް އަރާ ނޫ އިހިތައް ގިނަވެ، ޝެލްފިޝް ކާ މިންވަރު އިތުރުވުމުގެ ސަބަބުންނެވެ.

ކާބޯތަކެއްޗާއި ދަނޑުވެރިކަމާ ބެހޭ އދގެ ޖަމިއްޔާ (އެފްއޭއޯ) އިން މަޢުލޫމާތު ދޭ ގޮތުގައި ޠޫނިސްގައި ޝެލްފިޝް ހޮވުމުގެ މަސައްކަތް ކުރުމުގެ ހުއްދަ އޮންނަނީ އަހަރުގެ ވަކި ދުވަސްވަރެއްގައެވެ. އެއް އަހަރުގެ އޮކްޓޯބަރު މަހުން ފެށިގެން އަނެއް އަހަރުގެ މެއި  މަހުގެ ނިޔަލަށް އެ ފުރުޞަތު އޮންނައިރު، ބާކީ ދުވަސްތަކުގައި ޝެލްފިޝް ހޮވުމަކީ މަނާ ކަމެކެވެ.

ތޫނިސްގެ 17 ސަރަޙައްދެއްގައި ޝެލްފިޝް ހޮވާ، ވިއްކުމުގެ މަސައްކަތުގައި މިހާރުވެސް 4000 އަށް ވުރެ ގިނަ އަންހެނުން މަސައްކަތް ކުރާ ކަމަށް އެފްއޭއޯގެ ރިޕޯޓެއްގައި ވަނީ ފާހަގަ ކޮށްފައެވެ. އެންމެ ގިނަ މީހުން ހަރަކާތްތެރިވަނީ ޒާރާތު އަވަށް އޮންނަ ގޭބްސްއާއި އެސްފެކްސް ސަރަޙައްދުގައި ކަމަށް ވާ އިރު، އެ ސަރަޙައްދުތަކުން އެކަނިވެސް އަހަރެއްގެ މައްޗަށް އެވަރޭޖުކޮށް 700 ޓަނުގެ ޝެލްފިޝް ނަގައެވެ. މައިގަނޑު އަމާޒަކީ ބޭރުގެ އެކި ޤައުމުތަކަށް އެކްސްޕޯޓް ކުރުމެވެ.