ތޫނިސްއިން ހިޖުރަވެރިން ނެރެ، ލީބިޔާގެ ސަހަރާ ތެރެއަށް "އުކާލަނީ"؟

ގިސްލަ ގިސްލާފައި ރޯން އިން މާބަނޑު ޒުވާނާގެ މޫނު މަތިން ފެންނަމުން ދިޔައީ އިންތިހާ ވަރުބަލިކަމާއި މާޔޫސްކަމެވެ. ހަނަފަސް ސަހަރާއަށް، ދެމުން ދިޔަ ރަތްދަކަ އަވީގައި އިށީނދެލައިގެން އެ އިނީ ސޫދާނުގެ ނަރުހެކެވެ. އުމުރުން އެންމެ 26 އަހަރުގެ ތަފާވުލް އުމަރެވެ. ތަފާވުލްއާއެކު ދެން އެތިބަ މީހުންނަކީވެސް އޭނާ ފަދަ ހިޖުރަވެރިންތަކެކެވެ.

އެމީހުން ބުނާގޮތުގައި، އެއީ ތޫނިސްގެ ކަމާބެހޭ ފަރާތްތަކުން ހައްޔަރުކޮށް، ލީބިޔާގެ ބޯޑަރު ސަރަހައްދަށް އުކާލާފައި ތިބި މީހުންނެވެ. ތޫނިސްގެ ކަމާބެހޭ ފަރާތްތަކުން އެ ތުހުމަތުތަކަށް އިންކާރުކުރެއެވެ.

އަންހެނުންނާއި ފިރިހެނުންވެސް ހިމެނޭ އެ ގުރޫޕުގައި ތިބި މީހުން ނިސްބަތްވަނީ ސޫދާން، ސެނެގާލް، ޣާނާ އަދި މާލީއަށެވެ. ބައިނަލްއަގުވާމީ ޚަބަރުތައް ކަވަރުކުރުމުގައި ގިނަ ބައެއްގެ އިތުބާރު ހޯދާފައިވާ ރޮއިޓަރޒްއިންވެސް ބައިވެރިވަމުން ދިޔަ މިޝަނެއްގައި، ލީބިޔާގެ ބޯޑަރު ޕެޓްރޯލުން އެ ގުރޫޕާ ބައްދަލުވިއިރުވެސް، އެ މީހުން ވަނީ ހަތަރު ގަޑިއެއްހާއިރު ފައިމަގުގައި ހިނގާފައެވެ. ބޯނެ ފެންފޮދަކާއި ކާބޯތަކެތީގެ އެހީތެރިކަން ފޯރުކޮށްދިނީވެސް ލީބިޔާ ބޯޑަރު ޕެޓްރޯލް ޓީމާއި ރޮއިޓަރޒްގެ ގުރޫޕުން ކަމަށް ތަފާވުލްއާއި އޭނާއާއެކު އެތާ ތިބި މީހުން ކިޔައިދިނެވެ.

ހިޖުރަވެރިންނާއި، ލީބިޔާގެ ބޯޑަރު ބަލަހައްޓާ ފާރަވެރިންނާއި އިންސާނީ ހައްގުތަކަށް ވަކާލާތުކުރާ ގުރޫޕުތަކުން، ތޫނިސްގެ ކަމާބެހޭ ފަރާތްތަކަށް އަމާޒުކުރާ ވަރުގަދަ ތުހުމަތުތަކެއް އެބަހުއްޓެވެ. އެއީ ތޫނިސްގައި ތިބި ހިޖުރަވެރިން، ދާނެ މަންޒިލެއް ނެތީސް، އަވަށްތަކުން ބޭރުކޮށް، ހޫނު މޫސުމުގެ ގަދަ އަވިގަނޑުތެރެއަށް ނެރެ އުކާލާކަމުގެ ތުހުމަތެވެ. އެއީ އެތައް މަހެއް ވަންދެން އަތްފުނާ އެޅުމަށްފަހު ތޫނިސްގެ ކަމާބެހޭ ފަރާތްތަކުން ކުރާ ކަމެއް ކަމަށް ބުނެއެވެ.

ހަނަފަސް ސަހަރާގެ ތެރެއިން، މަރުވެފައިވާ ހިޖުރަވެރިންގެ ހަށިތައްވެސް ފެންނަމުން ދާކަމަށް ލީބިޔާއިން ވަނީ ރިޕޯޓްކޮށްފައެވެ.

ހަނަފަސް ސަހަރާގެ ތެރެއަށް، ހިޖުރަވެރިން އުކާލާފައި ވާކަމަށް ކުރާ ތުހުމަތުތަކަށް ތޫނިސްގެ ދާޚިލީ ވުޒާރާއިން އިންކާރު ކުރެއެވެ. އެ ތުހުމަތުތަކަކީ، ތޫނިސްގެ އަގު ވައްޓާލުމަށް ފަތުރަމުންދާ ދޮގު ޚަބަރުތަކެއް ކަމަށް، ރައީސް ގައީސް ސައީދު ވަނީ ވިދާޅުވެފައެވެ.

ހިޖުރަވެރިންގެ ވާހަކަތަކާއި ތޫނިސްގެ ވާހަކަތަކާއި ތޫނިސްގެ ކަމާބެހޭ ފަރާތްތަކުގެ ވާހަކަތަކުގައި ބޮޑެތި ފުށުއެރުންތަކެއް ހުރިއިރު، ހަގީގަތަކީ ކޮބައިކަން ކަށަވަރުކޮށްދޭން ނޭނގޭ ކަމަށް ރޮއިޓަރޒްއިން ބުނެއެވެ.