ގަސްތައް މިލާމޯޅިވިއަސް، ސޯނިއާގެ ޢަޒުމުގައި ވަނީ ދިރުމާއި އާރޯކަން

އެ ހަތިޔާރެއްގެ ނުރައްކާ މިއަދު ދުނިޔެއަށް އެންމެ ބޮޑު ވެފައިވާ އެއް ހަތިޔާރަކީ ދެމިޔަލީ ކަނޑިއެއް ފަދަ މޫސުމީ ނޭދެވޭ ބަދަލުތަކެވެ. އެއްބައި ސަރަޙައްދުތަކަށް އާދަޔާ ޚިލާފު ގަދައަށް ވިއްސާރަ ކުރާއިރު، އަނެއް ބައި ސަރަހައްދުތައް ހަނަފަސް ސަހަރާތަކަށް ވަނީއެވެ. ދިރުންތައް ނެތިގޮސް، ޢުއްމީދުތައް ވިއްސިވިހާލިވެގެން ދަނީ ގަދަ އަވީގައި މިލާ މޯޅިވާ ދަނޑުބިންތަކާއެކީއެވެ.

ސޯނިއާ ޢާބިދީ އަކީ ތޫނިސްގައި ދަނޑުވެރިކަން ކުރަމުން އަންނަ މީހެކެވެ. މިއަދު އޭނާ ހިނގަމުން އެނދަނީ ގަދަ ހޫނާއެކު އަނދާ ހުލިވެފައި ވާ މާގަސްތަކުގެ ތެރެއިންނެވެ. ތޫނިސްއަކީ މިއަދު އާދަޔާ ޚިލާފު ގަދަ ހޫނާ ކުރިމަތިލާން ޖެހިފައި އޮތް ޤައުމެކެވެ. އެކަމުގެ އަސަރު، ތޫނިސްގެ ހުޅަނގު އުތުރު އައްސޭރިފަށުގެ އަވަށެއް ކަމަށްވާ ތަބަރުކާގައި  ސޯނިއާ ބަލަހައްޓަމުންދާ 2 ހެކްޓަރުގެ ދަނޑަށް ބަލާލުމުން ސާފުކޮށް ފެނެއެވެ.

ސޯނިއާ ކިޔައިދިން ގޮތުގައި މިދުވަސްވަރު ކުރިމަތިލާން ޖެހިފައިވާ އިންތިހާ ގަދަ ހޫނުގެ ސަބަބުން، އޭނާގެ ދަނޑުބިންތަކުގެ އުފެއްދުންތެރިކަމުގެ 2 ބައިކުޅަ އެއް ބަޔަށް ވުރެ ބޮޑު ބައެއް ވަނީ ނެތި ގޮސްފައެވެ.

ނޫސްވެރިކަމުގެ ހަލަބޮލި ދުނިޔޭގެ މަސައްކަތުން އަތް ދޫކޮށްލުމަށްފަހު، ދަނޑުވެރިކަމުގެ ތެރެއަށް ސޯނިއާ ވަނީ ފިނިފެންމަލާއި އެނޫންވެސް އެކި ބާވަތްބާވަތުގެ މާމެލާ މެއްޔާއި ޤުދުރަތީ ދިރުންތަކަށް އޭނާގެ ހިތުގައި ދެވިފައި އޮންނަ ޚާއްޞަ މަޤާމެއްގެ ސަބަބުންނެވެ. ޚާއްސަ ލޯތްބެއްގެ ސަބަބުންނެވެ. ނޫސްވެރިކަމުގެ ދޫކޮށް، ދަނޑުވެރިކަމުގެ ދާއިރާއިން އަމިއްލަ މަޝްރޫޢެއް ފެށީ 2018 ވަނަ އަހަރުގެ ތެރޭގައެވެ. މަޤްޞަދަކީ ކާބޯތަކެތި ތައްޔާރު ކުރުމަށާއި، ބޭސްވެރިކަމަށް ބޭނުން ކުރާނެ އެކި ކަހަލަ މާމެލާމެލި ހެއްދުމެވެ.

ބޮޑެތި ރެސްޓޯރަންޓްތަކާއި ހޮޓާތަކުގައި ވަރުގަދަ ކޭންތައް ތައްޔާރު ކުރުމަށާއި، އެކި ކަހަލަ ޖޫސްތަކާއި ފޮނިކާތަކެތި ތައްޔާރު ކުރުމަށްޓަކާ، ސޯނިއާގެ ދަނޑުބިމުން މާމެލާމެލި ގެންދެއެވެ.

ތޫނިސްގެ މޫސުމާ ބެހޭ އިދާރާއިން ޚަބަރު ދޭ ގޮތުގައި އެ ޤައުމަށް މިއަދު ކުރިމަތިލާން ޖެހިފައި ވާ އާދަޔާ ޚިލާފު ގަދަ ހޫނަކީ މާޒީ ދެކުނު ފަދަ ކަމެއް ނޫނެވެ.

މި ހުރިހާ ގޮންޖެހުންތަކަކާއެކުވެސް ސޯނިއާ ދަނީ އޭނާގެ ވިޔަފާރި ނަގަހައްޓާ، ފުޅާ ކުރުމަށް ގަދަ އަޅާ މަސައްކަތް ކުރަމުންނެވެ. އޭނާގެ ދަނޑުބިންތަކުން ނެރޭ އުފެއްދުންތަކުގެ އަގު ހިފެހެއްޓުމަކީ ސޯނިއާގެ ޢަޒުމެކެވެ.