މުރާލިކަމެއް ހުރީވިއްޔާ ފަށުއި ފަނިންވެސް ތަނަވަސް ވިޔަފާރިވެރިއަކަށް ވެވިދާނެ!

ބިނާކުރަނިވި ޚިޔާލުތަކާއި އުފެއްދުންތެރި އީޖާދުތަކަކީ އެކަމެއް ޙާޞިލު ކުރުމަށް ގަދަ އަޅާ މަސައްކަތް ކުރާ މީހެއްގެ އަތުނުޖެހި ނުދާނެ އެއްޗެކޭ ދަންނަވަން ޖެހެނީ ސަބަބެއް ނެތިއެއް ނޫނެވެ. ދިރިއުޅުމުގެ މައިދާނުގައި ކިތަންމެ ގިނަ ގޮންޖެހުންތަކަކާ ކުރިމަތިލާން ޖެހުނު ކަމުގައި ވީ ނަމަވެސް، ލިބެން ހުރި ފުރުޞަތުތައް ހޯދާ، ބަލާ، ކުރިއަރާ ދެވެން އޮތް ރާސްތާއަކުން ފަސް ބެލުމެއް ނެތި ދިއުމަކީ ނަޞީބު އަތުލަން އޮތް ގޮތެވެ. އެފަދަ ގޮތަކަށް މުޅި ދުނިޔެއަށް މިސާލު ދައްކަމުންދާ އެއް ބަޔަކީ ތޫނިސްގެ ހީވަގި އަންހެނުންގެ ޓީމެކެވެ.

ތޫނިސްގެ ހުޅަނގުއުތުރުގެ ސިޓީއެއް ކަމަށް ވާ ބަނީ މިތިރުގެ އަންހެންވެރިން އަވަދިނެތި އުޅެމުން އެދަނީ ފަށުއިފަނީގެ ޅަ ފަނިތައް ހިމާޔަތް ކުރަން އެ މަޚުލޫޤުތައް ދޫކުރާ ފަށުއިދަވައިން އުފެދިފައިވާ ތޮށިގަނޑު ސާފު ކުރުމުގެ މަސައްކަތުގައެވެ. މާ ޒާމާނީ ޢާލާތްތަކެއް ބޭނުމެއް ނުކުރެއެވެ.

ފަށުއިފަނީގެ ތޮށިގަނޑުން ފަނިތައް ނަގާ ސާފު ކުރުމުގެ މަސައްކަތް ކުރަނީ އަމިއްލަ 2 އަތުންނެވެ. މި ތޮށިގަނޑަކީ ފަންނުވެރި އެކި އުފެއްދުންތަކުގައި ޚިޔާލު ތަނަވަސް ގޮތް ގޮތަށް ބޭނުން ކުރާ އެއްޗެކެވެ.

ހާލިން ނަގާ ރޯ ފަށުއި ބޭނުން ކުރަނީ 'ފަށުއި ބޭންޑް' ތައްޔާރު ކުރުމަށެވެ. ވިޔަފާރީގެ ވެރިޔާ، އަހުމަދު ޒަޣަލް ކިޔައިދިން ގޮތުގައި ރޯ ފަށުއި ނެގުމުގެ މަސައްކަތް ކުރަން ބޭނުން ކުރާ އުކުޅުތަކަކީ ވެއްޓާ ރައްޓެހި އުކުޅުތަކެކެވެ. ރޯ ފަށުއި ނަގާ ސާފުކޮށް ނިމުމުން، ތޮށިގަނޑުގެ ބޭނުންވެސް ކުރެއެވެ. އެ ތޮށިގަނޑު ބޭނުން ކުރަނީ ބައްތީގެ ބޭރުގައި އެކި ކަހަލަ ފަރުމާތައް ކުރުމަށެވެ.

'އަލްބާ'ގެ ނަމުގައި ޒަޣަލް ހިންގާ ވިޔަފާރީގެ ތެރެއިން، ތޫނިސްގެ ވެރިރަށުގައިވެސް ވަނީ ޝޯރޫމެއް ހުޅުވާފައެވެ. އޭނާގެ ވިޔަފާރީގެ ތެރެއިން އުފައްދާ އަތްތެރި މަސައްކަތްތަކުގެ ސާމާނު ހުންނަނީ އެ ޝޯ ރޫމްގައެވެ.

ޒަޣަލްގެ ފިހާރައިން ލިބެން ހުރި ކޮންމެ އުފެއްދުމަކީވެސް ފަންނުވެރިއެއް ނުވަތަ ފަންނުވެރިންތަކެއްގެ ބުރަ މަސައްކަތެވެ. ޒަމާނީ މެޝިނަރީއާއި ޢާލާތްތައް ބޭނުންކޮށެއް ނުއުޅެއެވެ. އެންމެ އުފެއްދުމެއް ފުރިހަމަކޮށްލަންވެސް 21 އަކަށް ދުވަސް ހޭދަ ކުރެއެވެ.