ފައިނަލްގައި މާޒިޔާގެ ކުޅުންތެރިން ދެއްކި ކުޅުމަށް އިވާންގެ ތައުރީފު

ޕްރެޒިޑެންޓްސް ކަޕްގެ ފައިނަލްގައި ކުލަބު އީގަލްސްއާ ދެކޮޅަށް މާޒިޔާ ސްޕޯޓްސް އެންޑް ރެކްރިއޭޝަންގެ ކުޅުންތެރިން ދެއްކި ކުޅުމަށް އެ ޓީމުގެ ކޯޗު އިވާން ވެންކޯ ކޮލޭވް ވަރަށް ބޮޑަށް ތައުރީފުކޮށްފި އެވެ.

މެޗަށް ފަހު ވާހަކަ ދައްކަމުން އިވާން ބުނީ މާޒިޔާގެ ކުޅުންތެރިންނަށް އޭނާ މަރުޙަބާ ކިޔަން ބޭނުންވާ ކަމަށާއި، ކުޅުންތެރިން ދެއްކީ ވަރަށް ފުރިހަމަ ކުޅުމެއް ކަމަށެވެ. އޭނާ ބުނީ ދަނޑު މަތީގައި މާޒިޔާ އިން ބޯޅަ ހިފަހައްޓައިގެން މުޅި މެޗު ކޮންޓްރޯލް ކޮށްގެން ކުޅުނު ކަމަށެވެ. މެޗުގައި މާޒިޔާ އިން ލަނޑު ޖެހުމަށް ގިނަ ފުރުސަތު ތަކެއް ތަނަވަސްކުރިކަން ފާހަގަކޮށް އިވާން ބުނީ، 2-0 ގެ ނަތީޖާ އަކީ ވެސް ރަނގަޅު ނަތީޖާއެއް ކަމަށެވެ. މުބާރާތުގެ ގްރޫޕް ސްޓޭޖުގެ ފަހު މެޗުގައި ބުރު ސްޕޯޓްސް ކުލަބު އަތުން ބަލިވުމަކީ މާޒިޔާ އަށް އިތުރަށް ސަމާލުކަން ދޭން ޖެހުނުކަމެއްތޯ ސުވާލު ކުރުމުން އިވާން ވަނީ އެކަމާ އެއްބަސްނުވާ ކަމަށް ބުނެފަ އެވެ. އޭނާ ބުނީ މާޒިޔާ އިން ކުޅުނު ކޮންމެ މެޗެއްގައި ވެސް އެ ޓީމުން އައީ ރަނގަޅު ކުރިއެރުންތަކެއް ހޯދަމުން ކަމަށެވެ.

މީގެ އިތުރުން އިވާން ބުނީ މާޒިޔާ އަކީ ވިސްނުމަކީ މެޗަކަށްފަހު މެޗަކުން ކުރިއެރުން ހޯދައިގެން، ކުރިއަށް ދިޔުން ކަމަށެވެ. އަދި އެންމެ ފަހު މެޗަކަށް، އީގަލްސްއާ ދެކޮޅަށް ކުޅުނު ފައިނަލް މެޗުގައި ވެސް މާޒިޔާ އިން ގިނަ ކުރިއެރުންތަކެއް ހޯދާފައިވާ ކަމަށެވެ. މުބާރާތް ފށައިގެން އައިއިރު މާޒިޔާގައި އަނިޔާގެ މައްސަލަތަކެއް އުޅުނުކަން ފާހަގަ ކުރަމުން އައި ކަމަށާއި، ނަމަވެސް ކުޅުންތެރިންގެ ބުރަ މަސައްކަތުން ކުރިއަރައިގެން އައި ކަމަށެވެ. ކުރިއަށް އޮތް ދިވެހި ލީގާ ގުޅޭ ގޮތުން ސުވާލު ކުރުމުން އިވާން ބުނީ، މިވަގުތު އެއަށް ޖަވާބެއް ދެވެން ނެތް ކަމަށެވެ. ސަބަބެއްގެ ގޮތުގައި އޭނާ ބުނީ، ފުރަތަމަ ޖެހޭނީ އެހެން ޓީމުތަކާ ދެކޮޅަށް ވެސް ކުޅެން ކަމަށާއި، ޖަވާބެއް ދޭން އިނގޭނީ އެއަށްފަހު ކަމަށެވެ. އޭނާ ބުނީ މާޒިޔާ އިން ޕްރެޒިޑެންޓްސް ކާމިޔާބު ކުރުމުން މިވަގުތު ހުރީ އެކަމާ ވަރަށް އުފާވެފައި ކަމަށެވެ.

މީގެ އިތުރުން އިވާން ވަނީ މެެޗުގައި މާޒިޔާ އަށް ދެ ލަނޑު ޖަހައިދިން އިބްރާހީމް އައިސަމް އާއި ކެޕްޓަން ސަމޫހު އަލީ (ސަމުއްޓޭ)ގެ ކުޅުމަށް ވެސް ތައުރީފުކޮށްފަ އެވެ. އޭނާ ބުނީ އައިސަމް އަކީ ހުނަރުވެރި މޮޅު ކުޅުންތެރިޔެއް ކަމަށާއި، އެކި އެކި މަގާމުތަކަށް ކުޅުމަކީ ވެސް އައިސަމް އަށް އުނދަގޫ ކަމެއް ނޫން ކަމަށެވެ. އިވާން ބުނީ ފައިނަލް މެޗުގައި ސަމުއްޓޭ ކުޅުނީ އަނިޔާ އިން އެއްކޮށް ރަނގަޅު ވެގެން ނޫން ކަމަށެވެ. ނަމަވެސް ސަމުއްޓޭ އަކީ ވަރަށް ތަޖުރިބާ ކާރު، ވިސްނުން ރަނގަޅު ކުޅުންތެރިޔެއް ކަމަށާއި، ޓީމަށް އެންމެ ބޭނުންވާ ކުޅުން އޭނާ ދައްކައިދޭ ކަމަށެވެ.

މާޒިތާގެ ކޯޗުކަމާ އިވާން ހަވާލުވީ މިއަހަރު އެވެ. އޭނާގެ އިރުޝާދުގެ ދަށުން މާޒިޔާ އިން ޕްރެޒިޑެންޓްސް ކަޕް ކާމިޔާބު ކުރިއިރު، މުބާރާތުގައި ބަލިވެފައި ވަނީ އެންމެ މެޗަކުންނެވެ. އެއީ ބުރު އަތުންނެވެ.