ހުއްދަނެތި ސައޫދީއަށް ދިއުމުން ޕީއެސްޖީން މެސީ ސަސްޕެންޑް ކޮށްފި

ލީގު ހޯދުމުގައި ޕްރެޝަރު ބޮޑުވެފައިވާ ޕެރިސް ސެއިންޓް ޖާމަން (ޕީއެސްޖީ) އިން އެ ޓީމަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ ދެ ހަފްތާ އަށް ސަސްޕެންޑުރަން ނިންމާފައިވާ ކަމަށް މީޑިއާ ތަކުގައި ރިޕޯޓުކޮށްފި އެވެ.

ސަބަބަކީ ކުލަބުގެ ހުއްދދަނެތި މެސީ އާއިލާއާއެކު ސައުދީ އަރަބިޔާ އަށް ދިއުމެވެ. މިމައްސަލައިގައި، ކުލަބާއި މެސީއާ ދެމެދު ވަނީ މައްސަލަ ޖެހިފަ އެވެ.

ލީގުގައި އެންމެ ފަހުން ޕީއެސްޖީން ލޮރިއެންޓު އަތުން ބަލިވި މެޗަށްފަހު ފަރިތަކުރުން ކުރިއަށް ގެންދިޔުމަށް އޮތީ ނިންމައިފަ އެވެ. އެންމެ ފުރަތަމަ ނިންމާފައި އޮތީ އެ މެޗަށްފަހު ކުޅުންތެރިންނަށް އޮފެއް ދިނުމަށެވެ. ނަމަވެސް ބައްޔާއެކު، ކޯޗު ކްރިސްޓޮފާ ގަލްޓިއޭ ނިންމީ ފަރިތަކުރުން ކުރިއަށް ގެންދިޔުމަށެވެ. ނަމަވެސް އެ ފަރިތަކުރުންތަކުގައި މެސީ ބައިވެރިވެފައެއް ނުވެ އެވެ. އޭގެ ބަދަލުގައި އޭނާ ދިޔައީ ސައުދީ އަރަބިޔާ އަށެވެ. ކުލަބުގެ ހުއްދަ ނެތި މެސީ ސައުދީ އަރަބިޔާ އަށް ދިޔަ މައްސަލައިގައި، ކުލަބާއި މެސީއާ ދެމެދު ވަނީ މައްސަލަ ޖެހިފަ އެވެ.

މިކަމާ ގުޅިގެން ޕީއެސްޖީން މިހާރު ނިންމާފައި ވަނީ މެސީ ދެ ހަފްތާގެ މުއްދަތަށް ސަސްޕެންޑު ކުރުމަށް ކަމަށް ރިޕޯޓުތައް ބުނެ އެވެ. ނަމަވެސް، މިހާތަނަށް އެކަން މެސީ އަށް ރަަސްމީކޮށް އަންގާފައި ނުވާ ކަމަށް ވެސް ރިޕޯޓުތައް ބުނެ އެވެ. މެސީ ސައުދީ އަށް ދިޔަކަން އެ ޤައުމުގެ ފަތުރުވެރިކަމާ ބެހޭ ވަޒީރު ރަސްމީކޮށް އިއުލާން ކުރީ ހޯމަ ދުވަހު އެވެ. މެސީ އަކީ ސައުދީގެ ފަތުރުވެރިކަން ކުރިއެރުވުމަށް ކަނޑަ އަޅާފައި ހުރި އެމްބެސެޑަރެވެ. މިއީ މެސީ ސައުދީ އަށް ދިޔަ ދެ ވަނަ ފަހަރެވެ.

ބާސެލޯނާ ދޫކޮށް ޕީއެސްޖީ އަށް ބަދަލު މެސީ އެކުލަބާއެކު ހަދާފައިވާ އެއްބަސްވުމުގެ މުއްދަތު ހަމަވާނީ މިއަހަރު އެވެ. އެެހެންކަމުން ޕީއެސްޖީން އަންނަނީ މެސީގެ އެއްބަސްވުން އައު ކުރުމަށް މަސައްކަތް ކުރަމުންނެވެ. އެކަމުގައި މިހާތަނަށް މެސީގެ ފަރާތުން ވަކި ގޮތެއް ނިންމާފައެއް ނުވެ އެވެ. އަނެއްކޮޅު މެސީގެ ކުރީގެ ކުލަބު ބާސެލޯނާ އިން އަންނަނީ އަލުން އޭނާ އެ ކުލަަބށް ގެންދިޔުމުގެ މަސައްކަތް ވެސް ކުރަމުންނެވެ.