ސޫދާނުގެ ވެރިރަށް ޚާރްތޫމްގައި އޭނާ ދިރިއުޅެމުން ދިޔަ ސަރަހައްދުގެ ބުރިޖުތަކުގައި ބަންދު ބޯޑު އެޅުވުމުން، އެއީ ކޮންމެވެސް މުޒާހަރާއަކާ ހެދި ވީ ކަމެއް ކަމަށް ނޫރު ގުއްލާބު ނިންމިއެވެ. މެޑިސިންގެ ރޮނގުން މަތީ ތައުލީމުގެ ހާސިލުކުރަމުންދާ، ފަލަސްތީނުގެ މި ޒުވާނާއަށް އެއީ މާ ބޮޑުކަމަށް ނުވިއެވެ.

ވެގެން އުޅެނީ ކިހާ ވަރެއްގެ ކަމެއްކަން ރޭކާނުލައި އުޅެނިކޮށް ފެނާއި ކަރަންޓުގެ ޚިދުމަތް ކެނޑިއްޖެއެވެ. އިވެމުން ދިޔައީ ބަޑިއާއި ރޮކެޓް ހަމަލާތަކުގެ އަޑުފަށްގަނޑު ކަމަށް، ނޫރު ކިޔައިދެމުން ދިޔައީ ޣާއްޒާގެ ޚާން ޔޫނިސްގައި އޭނާގެ އާއިލާއިން ދިރިއުޅެމުންދާ ގޭގައި އިނދެގެންނެވެ. ސޫދާން ދޫކޮށް، ޚާން ޔޫނިސްއަށް އެނބުރި ދިޔަތާ އަދި ވީ އެންމެ 4 ވަރަކަށް ދުވަހެވެ.

ސޫދާނުގެ އަސްކަރިއްޔާއާ އެ ގައުމުގެ ޕެރަމިލިޓްރީ ރެޕިޑް ސަޕޯރޓް ފޯރސަސް (އާރްއެސްއެފް)ގެ ފައުޖުތަކާ ދެމެދު އޭޕްރިލް 15 ވަނަ ދުވަހު ފެށި ހަމަލާ ބަދަލުކުރުންތަކުގައި އެތައް ސަތޭކަ ބަޔަކު މަރުވެ، އެތައް ބަޔަކު ޒަޚަމްވެއްޖެއެވެ. އެތައް ބައެއްގެ ގެދޮރު ގެއްލި، އާންމު ދިރިއުޅުން ހުއްޓިއްޖެއެވެ.

ސޫދާނުގައި ދިރިއުޅެމުން ދިޔަ ފަލަސްތީނުގެ ރައްޔިތުން އެ ގައުމުން ބާލައި، އަނބުރައި ފަލަސްތީނަށް ގެނައުމުގެ މަސައްކަތް ކުރިއަށް ގެންދިޔައީ؛ މިސްރު، އުރުދުން އަދި ސައޫދީ އަރަބިއްޔާގެ އެހީތެރިކަމާއެކުކަން، ފަލަސްތީނުގެ ފޮރިން މިނިސްޓްރީއިން ވަނީ ހޯމަ ދުވަހު ހާމަކޮށްފައެވެ.

ޣައްޒާއަކީވެސް އިޒްރޭލާ ފަލަސްތީނާ ދެމެދު އޮންނަ ޒަމާންވީ އަދާވާތްތެރިކަމާއި ތަޅާފޮޅުމާއި ހަނގުރާމައިގެ ހަމަލާ ބަދަލުކުރުންތަކުގެ މައިދާނެކެވެ. އޭގެ އިތުރުން ދާޚިލީ ހަނގުރާމައެއްގައި އޮތް ސަރަހައްދެކެވެ. އިޒްރޭލާއި މިސްރުން ކުރިމަތިކުރަމުންދާ ފިއްތުންތަކުގެ ސަބަބުން، އާންމު ދިރިއުޅުމުގެ ހަރަކާތްތައް އިންތިހާއަށް މަޑުޖެހިފައި އޮތް، އަނގަމަތި ހާ ޖަލެކެވެ.

އެ ހުރިހާ ކަމެއްވެސް ތަޖުރިބާކޮށްފައި ހުރި، އުމުރުން 25 އަހަރުގެ ނޫރު ކިޔައިދިންގޮތުގައި ސޫދާނުގައި އެފަދަ ހާލެއްގައި ޖެހުމުން އޭނާ ބަދަލުވީ އެކުވެރިއެއްގެ ގެއަށެވެ. ނަމަވެސް ކާނެ އެއްޗެއް ނެތްތަނުގައި ސާފު ފެންފޮދެއްވެސް ނުލިބޭކަމަށް ނޫރު ބުންޏެވެ.

ލޫޓުވުމުގެ ޖަރީމާ އޭގެ އިންތިހާއަށް އިތުރުވަމުންދާ ދިއުމުގެ ސަބަބުން، ފިހާރަތައް ވަނީ ބަންދުކޮށްފައެވެ.

ބޭސްވެރިކަމުގެ ރޮނގުން މަތީ ތައުލީމު ފުރިހަމަކުރުމަށް، ނޫރުގެ ދިރިއުޅުން ސޫދާނަށް ބަދަލުކުރީ 2015 ވަނަ އަހަރުއެވެ. ނަމަވެސް، އެކަން ކާމިޔާބުކުރުމަށް ގިނަ ހުރަސްތަކެއް ކުރިމަތިވިއެވެ. ދާޚިލީ ހަނގުރާމައެވެ. ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމެވެ. ފަހުގެ ހަނގުރާމަގަނޑު ފެށުނުއިރު، ނޫރު ދަސްވެނިވުމަށް ބާކީ އޮތީ ކުޑަ ދުވަސްކޮޅެކެވެ. ފުރިހަމަ ނުކޮށް އޮތީ މަދު އިމްތިހާނެކެވެ.

ނޫރުގެ މަންމަ ރުވައިދާ ސިފަކުރިގޮތުގައި، އުފާވެރިކަން ހިތާމައަކަށް ބަދަލުވީއެވެ.

ފަލަސްތީނާއި މިސްރު ހިއްސާކުރާ ބޯޑަރު ސަރަހައްދުން މިދިޔަ ހުކުރު ދުވަހު ނޫރުގެ އާއިލާއިން އޭނާއަށް މަރުހަބާކީ ކަރުނައިން ފުރިފައިވާ ލޯތަކަކާއެކުގައެވެ. މެއި މަހުގެ ފަހުކޮޅު ކިޔެވުން ނިންމައިލުމަށްފަހު އެނބުރި އުފަން ވަޒަނަށް އައުމުން އޭނާއަށް ކިޔަން އުޅުނު މަރުހަބާއާ ޚިލާފަށް، ހިތާމައިގެ ކަރުނައާއެކީގައެވެ.