ރަންތާޖު ޤުރުއާން މުބާރާތަށް ތައްޔާރުވާން ސާއީގެ ހުރިހާ ވަގުތެއް ހުސްކުރި، ބައެއް ރޭރޭ 3 ޖަހަންދެން ގުރުއާން ކިޔަވާ

ރާއްޖޭގައި މިހާތަނަށް ބޭއްވި އެންމެ އަގުބޮޑު ޤުރުއާން މުބާރާތް ކަމަށްވާ، ''ރަންތާޖު ޤުރުއާން'' މުބާރާތުން އެއްވަނަ ހާސިލްކުރި ނ. ހޮޅުދޫއަށް ނިސްބަތްވާ މުހައްމަދު ސާއީ މުބާރިކް އަކީ ޤުރުއާނުގެ ދާއިރާ އަށް ޚާއްސަ ޝައުގެއް ހުރި ތޫނުފިލި ދަރިވަރެކެވެ. ޤުރުއާނުގެ އިލްމު އުނގެނުމާއި އުނގަންނައިދިނުމަށް ޝައުގުވެރިވާ ސާއީ އަކީ ބުރަ މަސައްކަތުން މިހިސާބަށް އައި ޒުވާނެކެވެ. އުމުރުން 20 އަހަރުގެ މުހައްމަދު ސާއީ މުބާރިކް އަކީ މި ދާއިރާއިން ކުރިއަށް ދާން ބޭނުންވާ އެންމެންނަށް ހުރި ނަމޫނާއެކެވެ.

ރާއްޖެޓީވީގެ ފަށާއިރު ޕްރޮގްރާމްގައި، އޭނާ އަށް ޤުރުއާން ކިޔަވަން ފެށުނު ގޮތާއި މެދު ވާހަކަދައްކަމުން ސާއީ ބުނީ ތަފާތު ރާގުތަކަށް ކިޔެވުމުގެ ޝައުގު ކުޑަ އިރު އޭނާގެ ކިބައިގައި އުފެދުނު ކަމަށެވެ. ގުރުއާން ކިޔަވަން ފެށި އިރު ގުރުއާން ކިޔަވަން ކޮށިކަމަށާއި، އެކަމުގެ ސަބަބުން އެއްވަރު ބައެއް ކުދިންގެ މަލާމާތާއި ކުރިމަތިލާން ޖެހުނު ކަމަށް ސާއީ ވަނީ ބުނެފައެވެ. އެހެންނަމަވެސް އުނދަނގޫތައް ދިމާވި ނަމަވެސް ގުރުއާން ކިޔެވުން ދޫކޮށްނުލާ ކުރިއަށް ގެންދިޔައީ ޤާރީއަކަށް ވާން ހުރި ޝައުގުގެ ބޮޑުކަމުން ކަމަށް އޭނާ ބުނެފައިވެއެވެ.

ސާއީ ބުނާގޮތުން ރަންތާޖު ޤުރުއާން މުބާރާތުގެ އިތުރުން އޭނާގެ ހަޔާތުގެ ހުރިހާ ކާމިޔާބީއެއްގެ ފަހަތުގައި ހުރީ އޭނާގެ މަންމައެވެ. އޭނާގެ ހުރިހާ ކުރިއެރުމެއްގެ ޝުކުރާއި ތައުރީފް އޭނާ އަމާޒުކުރީ އޭނާގެ ލޯބިވާ މަންމައަށެވެ. ތައުލީމް ހާސިލްކުރުމާއި އެހެނިހެން މުބާރާތްތަކުގައި ވެސް އޭނާގެ މަންމަ އަކީ އޭނާ އަށް ލިބޭ އެންމެ ބޮޑު ހިތްވަރުކަމަށް އޭނާ ވަނީ ބުނެފައެވެ. މީގެ އިތުރުން އޭނާގެ ބައްޕަ އާއި ދައްތަގެ އެހީތެރިކަން ވެސް އޭނާ އަށް ވަރަށް ފުރިހަމަ އަށް ލިބޭ ކަމަށް ސާއީ ވަނީ ބުނެފައެވެ.

ސާއީ ވަނީ ރަންތާޖު މުބާރާތުގެ ތަޖުރިބާ އާއި މުބާރާތަށް އޭނާ ވެފައިވާ ތައްޔާރީތަކާއި ގުޅޭގޮތުން ވާހަކަދައްކާފައެވެ. ރަންތަޖު މުބާރާތަށް ތައްޔާރުވުމުގެ ގޮތުން ހިފްޒުގެ ބައިން އަންނާނެ ކަމަށް އަންދާޒާކުރެވުނު ބައި ހިތުން ދަސްކޮށް މުރާޖަޢާކޮށްފައިވާ ކަމަށް އެނާ ބުންޏެވެ. މި މުބާރާތަކީ އޭނާ ބައިވެރިވި އެހެން މުބާރާތްތަކާއި ވަރަށް ބޮޑަށް ތަފާތު މުބާރާތެއް ކަމަށް ސާއީ ބުންޏެވެ. މުބާރާތް ލޯންޗްކުރި ހިސާބުން ފެށިގެން ސުވާލުތަކާއި، ބަލައިގެން ކިޔުމާއި އެހެނިހެން ބައިތަކަށް ވެސް އޭނާ ވަރަށް ބޮޑަށް ތައްޔާރުވިކަން އޭނާގެ ވާހަކައިން ފާހަގަވިއެވެ.

ރަންތާޖު މުބާރާތުގެ ބައިވެރިންނާއި މެދު އޭނާ ބުނީ އެ ބައިވެރިންނަކީ ވަރަށް ޤާބިލް ބައިވެރިންތަކެއް ކަމަށެވެ. އެ މުބާރާތުން ކާމިޔަބުކުރުމަށް އޭނާ ވަރަށް ބޮޑަށް މަސައްކަތް ކުރި ކަަމަށް ސާއީ ވަނީ ބުނެފައެވެ. ފައިނަލް އާއި ހަމައަށް ދާން ހިތްވަރު އެލުވާނުލާ މަސައްކަތް ކުރި ކަމަށް އޭނާ ބުންޏެވެ.

ސާއީގެ ކާމިޔާބީތަކުގެ ލިސްޓަށް ބަލާއިރު 2019 ވަނަ އަހަރު ބޭއްވި އަލްކައުން މުބާރާތް، ފަލާހް މުބާރާތް، އުފަވި މުބާރާތް އަދި ގައުމީ ޤުރުއާން މުބާރާތުން ބަލައިގެން ކިޔެވުމުގެ ބައިން އެއްވަނަ ހާސިލްކޮށްފައިވެއެވެ. އަދި 2021 އަދި 2022 ވަނަ އަހަރުގެ އުމުރުފުރާތަކުގެ ބައިންވެސް އޭނާ ވަނީ ގިނަ ކާމިޔާބީތަކެއް ހޯދާފައެވެ.

ސާއީ ވަނީ މަދަހަ ކިޔުމާއި، ލަވަ ކިޔުމުގައި ޝާމިލްވުމުގެ އިތުރުން އަދަބީ މުބާރާތްތަކާއި އެތްލެޓިކް އާއި ވޮލީ މުބާރާތުގައި ވެސް އޭނާ ވަނީ ބައިވެރިވެފައެވެ. މީގެ އިތުރުން އޭނާ އަކީ އިންސާނީ ހައްގުތައް ހިމާޔަތްކުރަން ޝައުގުވެރިކަން ހުންނަ ފަރާތެކެވެ. އެހެންނަމަވެސް އޭނާގެ އުންމީދުތައް ބޮޑަށް ގުޅިފައި ވަނީ ކީރިތި ޤުރުއާން އުނގަންނައިދިނުމާއި އުނގެނުމުގެ ދާއިރާ އާއިއެވެ. އޭނާގެ އުންމީދަކީ ގުރުއާނުގެ ދާއިރާއިން ކިޔެވުމަށް ރާއްޖޭން ބޭރަށް ގޮސް ތައުލީމް ހާސިލްކުރުމެވެ. އޭނާގެ އެންމެ އިސް ދުޢާއަކީ ކައިރި މުސްތަޤްބަލެއްގައި އެފަދަ ފުރުސަތެއް މިންވަރުކުރެއްވުމެވެ.