ރަންތާޖު ޤުރުއާން މުބާރާތަކީ ބައިވެރިންނާއި ބެލުންތެރިންނަށްވެސް ގިނަ ފިލާވަޅުތަކެއް ލިބިގެންދިޔަ މުބާރާތެއް - އަލްގާރީ މުހްމަދު ތައުފީގް އަލީ

ރަންތާޖު ޤުރުއާން މުބާރާތަކީ ބައިވެރިންނާއި ބެލުންތެރިންނަށްވެސް ގިނަ ފިލާވަޅުތަކެއް ލިބިގެންދިޔަ މުބާރާތެއް ކަމަށް އަލްގާރީ މުހްމަދު ތައުފީގް އަލީ ވިދާޅުވެއްޖެއެވެ.

ރަންތާޖު ޤުރުއާން މުބާރާތުގައި ފަނޑިޔާރުކަން ވެސް ކުރެއްވި އަލްގާރީ މުހްމަދު ތައުފީގް އަލީ، ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ވިދާޅުވީ ރަނަތާޖު ޤުރުއާން މުބާރާތަކީ ވަރަށް ތަފާތު މުބާރާތެއް ކަމަށެވެ. އަދި ޝޯއެއްގެ ގޮތަށް ބެލިނަމަވެސް، ވަރަށް ވަރުގަދަ އަދި ގިނަ ބައެއްގެ ޝާމިލުވުން އޮތް ބޮޑު މަސައްކަތެއް ކަމަށެވެ.

އޭނާ ވިދާޅުވީ މި ޝޯ މެދުވެރިކޮށް ބައިވެރިންނަށާއި، ބެލުންތެރިންނަށް ގިނަ ފިލާވަޅުތަކެއް ލިބިގެން ގޮސްފައިވާ ކަމަށެވެ. އެންމެ ބޮޑަށް ފާހަގަކުރެވުނީ ހުނަރުވެރި ދަރިވަރުންތަކެއް ރާއްޖޭގައި ތިބިކަން އެނގިގެން ދިޔަކަމަށާއި، ރާއްޖެއިން ބޭރުގެ މުބާރާތްތަކުގައި ވެސް ބައިވެރިވެވޭނެ ވަރުގެ ދަރިވަރުން ރާއްޖޭގައި ތިބިކަން ހާމަވެގެން ދިޔަކަމަށެވެ.

ޕްރޮގްރާމުގައި ވާހަކަ ދައްކަމުން، އަލްގާރީ އިބްރާހިމް ޝިފާއު ވިދާޅުވީ މުބާރާތުގައި ގިނަ ފިލާވަޅުތަކެއް ދެވިއްޖެ ކަމަށާއި، ފިލާވަޅުތައް ބޮޑަށް އަމާޒުކުރީ ދަރިވަރުންނަށް އިތުރު ކުރިއެރުމެއް ލިބިގެންދާނެ ގޮތަކަށް ބައްޓަން ކުރުމަށްޓަކައި ކަމަށެވެ. އަދި ރާއްޖޭގައި ބޭއްވޭ މުބާރާތްތަކާއި ހިލާފަށް މި މުބާރާތް ގެންދިޔައީ ދަރިވަރުންނަށް އެ ދަރިވަރުންގެ ހުނަރުތައް ދެއްކޭނެ ގޮތަކަށް ކަމަށެވެ.

މި މުބާރާތަކީ ރާއްޖޭގައި ވެސް މިހާތަނަށް ބޭއްވި އެންމެ އަގު ބޮޑު ޤުރުއާން މުބާރާތް ކަމަށް ވާއިރު، މި މުބާރާތުން އެއްވަނައަށް ދިޔަ ފަރާތަށް 3 ލައްކަ ރުފިޔާގެ އިނާމެއް ދީފައިވެއެވެ. އަދި ދެވަނައަށް 1 ލައްކަ ރުފިޔާ، އަދި ތިންވަނައަށް 75000 ރުފިޔާ ދީފައިވެއެވެ.

16 އަހަރާ 45 އަހަރާ ދެމެދުގެ އުމުރުފުރާގެ ފަރާތްތަކަށް ހުޅުވާލައގެން ކުރިއަށްގެންދިޔަ މި މުބާރާތަކީ މިހާތަނަށް ރާއްޖޭގައި ބޭއްވި މިފަދަ އެންމެ ބޮޑު މުބާރާތެވެ. މި މުބާރާތަކީ ރާއްޖެ ޓީވީ، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަދި އިސްލާމިކް މިނިސްޓްރީ ގުޅިގެން ކުރިއަށްގެންދިޔަ މުބާރާތެކެވެ.