ރ ފުއްގިރި ޚިޔާނާތުގެ މައްސަލައިގައި ދައުވާ އުފުލާފައިވާ މއ. ކުރިކީލަހިޔާ އަޙުމަދު ކްރިކް ރިޒާގެ މައްޗަށް ކުރާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލަ މަޑުޖައްސާލުމަށް އެދި ކްރިކް ރިޒާގެ ފަރާތުން ވަނީ ކޯޓަށް ސިޓީއެއް ހުށައަޅާފައެވެ. އެއީ ޝަރީއަތުގެ ކުރީގެ ހުށައެޅުންތަކާ ގުޅޭ ނިންމުން ސުޕްރީމް ކޯޓުގައި އިސްތިއުނާފު ކޮށްފައިވާތީއެވެ. ނަމަވެސް އަޑުއެހުން މަޑުޖައްސާލަން ޖެހޭފަދަ ސަބަބެއް ނެތްކަމަށް ގާޒީ އަލީ ނަދީމް ވިދާޅުވިއެވެ.

އެންމެ ފުރަތަމަ ދައުލަތުން ވަނީ އިފްތިތާޙީ ބަޔާން އިއްވާފައެވެ. އެގޮތުން މި މައްސަލައިގައި އޭނާގެ މައްޗަށް 2 ދައުވާއެއް އުފުލާފައިވެއެވެ. އެއީ މަނީލޯންޑަރިންގގެ ކުށުގެ ދައުވާއަކާއި ރިޝްވަތު ހިފުމުގައި މެދުވެރިއަކަށްވުމުގެ ކުށުގެ ދައުވާއެކެވެ. 

ދައުލަތުން ބުނެފައިވަނީ ޓޫރިޒަމް މިނިސްޓްރީއާއި އެމްއެމްޕީއާރުސީ މެދުވެރިކޮށް، ޓޫރިސްޓް ރިސޯޓެއްގެ ގޮތުގައި ތަރައްގީކުރުމަށް ރ. ފުއްގިރި ކުށްޔަށް ދޫކުރުމުގެ މުއާމަލާތާ ގުޅިގެން، ރައީސް ޔާމީން، މަގާމުގެ ނުފޫޒު ބޭނުންކޮށްގެން، ކ. މާލެ، މއ. ކުރިކީލަހިޔާ، އަޙުމަދު ކްރިކް ރިޒާ، މެދުވެރިކޮށް ރިޝްވަތުގެ ގޮތުގައި، 1،117،000 (އެއް މިލިއަން އެއް ލައްކަ ސަތާރަ ހާސް) ޑޮލަރު ހޯދައި، ސަން ކޮންސްޓްރަކްޝަން އެންޑް އިންޖިނިއަރިންގ ޕްރައިވެޓް ލިމިޓެޑާއި، ސަން އިންވެސްޓްމަންޓް ޕްރައިވެޓް ލިމިޓެޑް ބޭނުންކޮށްގެން އެ ފައިސާ މަނީ ލޯންޑަރ ކުރުމަށްޓަކައި ފަށަލަކޮށްފައިވާ ކަމަށެވެ.

ދައުލަތުން ވަނީ އޭގެ ތެރެއިން ކްރިކް ރިޒާއަށް ލިބުނު ފައިސާގެ ތެރެއިން އޭނާ ބޭނުންކޮށްފައިވާ ފައިސާ ދައުލަތަށް ނަގައިދިނުމަށްވެސް އެދިފައެވެ. އޭގެ ތެރޭގައި 232،000ށް ވުރެ ގިނަ އެމެރިކާ ޑޮލަރު ހިމެނެއެވެ.

އިފްތިތާޙީ ބަޔާން އިއްވުމަށް ފުރުސަތު ދިނުމުން ދިފާއުން ވަނީ ޝަރީއަތް ކުރިއަށް ގެންދިއުމާ ގުޅޭގޮތުން އިއުތިރާޒެއް ނަންގަވާފައެވެ. އެގޮތުން ޝަރީއަތުގެ ކުރީގެ ހުށައެޅުންތަކާ ގުޅޭ ނިންމުން ސުޕްރީމް ކޯޓުގައި އިސްތިއުނާފު ކޮށްފައިވާތީ ކްރިކް ރިޒާގެ ފަރާތުން ވަނީ އަޑުއެހުން މަޑުޖައްސާލުމަށް އަނެއްކާވެސް އެދިފައެވެ.

ގާޒީ ވިދާޅުވީ، ދިފާއުން ހައިކޯޓުގައި އިސްތިއުނާފު ކުރި 5 ނުކުތާގެ ތެރެއިން 3 ނުކުތާއަކީ ދައުވާ އުފުލުމާ ގުޅޭ ނުކުތާތަކެއް ކަމަށެވެ. އެ ނުކުތާތައް ސުޕްރީމް ކޯޓުން ބަލައިގަނެ ދައުވާ ބާތިލުކޮށްފިނަމަ އެ ހިސާބުން އެގޮތުގެ މަތިން މައްސަލަ ނިމޭނެ ކަމަށާއި، ދެން ހިމެނެނީ ހެކިތަކާ ގުޅޭ ހުށައެޅުންތަކެއް ކަމަށް ގާޒީ ވިދާޅުވިއެވެ. އެ ނުކުތާތަކުގައިވެސް ސުޕްރީމް ކޯޓުން ނިންމާ ގޮތެއްގެ މަތިން ފުރުސަތު ލިބިގެންދާނެކަމަށް ގާޒީ ވިދާޅުވިއެވެ.

ގާޒީ ވަނީ ހެއްކާބެހޭ ޤާނޫނުގެ ދަށުން ހެއްކާ ގުޅޭ ނުކުތާތައް މިހާރުވެސް ހުށައެޅޭނެކަން ފާހަގަ ކުރައްވާފައެވެ.

އެއަށްފަހު ދިފާއުން ވަނީ އިފްތިތާޙީ ބަޔާން އިއްވާފައެވެ.

އޭގެ އިތުރުން، ހެކި ބަލައިނުގަތުމާ ގުޅޭގޮތުން އިއުތިރާޒެއް ކުރުމަށް ދިފާއުން ބޭނުންވާތީ، ލިއުމުން ހުށައެޅުމަށް ގާޒީ ވަނީ ފުރުސަތު ދެއްވާފައެވެ.