ރެފްރީސް ކޮމެޓީން ބުނަނީ ޕޯލް ޓިއާނީ އަމަލު ކުރީ ރަނގަޅަށް ކަމަށް

އިނގިރޭސި ޕްރިމިއާ ލީގުގައި ލިވަޕޫލާއި ޓޮޓެންހަމް ކުޅުނު މެޗުގައި ރެފްރީ ޕޯލް ޓިއާނީ އަމަލުކޮށްފައި ވަނީ ރަނގަޅަށް ކަމަށް ޕްރޮފެޝަނަލް ގޭމްސް މެޗު އޮފިޝަލްސް ލިމިޓެޑު (ޕީޖީއެމްއޯއެލް) އިން ބުނެފި އެވެ.

ޕީޖީއެމްއޯއެލް އަކީ އިނގިރޭސި ޕްރިމިއާ ލީގުގެ މެޗުތަކުގައި އިންސާފު ކުރަން ތިބޭ ރެފްރީންގެ ކަންކަން ބަލަހައްޓަމުން އަންނަ ކޮމެޓީ އެވެ. އެ ކޮމެޓީން މިހެން ބުނީ، ޓޮޓެންހަމާ ދެކޮޅަށް ލިވަޕޫލުން ކުޅުނު މެޗުގައި ރެފްރީ އަކަށް ހުރި ޕޯލް ޓިއާނީ އަށް ތުހުމަތުކޮށް ލިވަޕޫލްގެ ކޯޗު ޔާގަލް ކްލޮޕް ދެއްކި ވާހަތަކުގެ ސަބަބުންނެވެ. މެޗަށްފަހު ކްލޮޕް ވަނީ ރެފްރީ އަމަލުކޮށްފައި ވަނީ އިންސާފުވެރިކޮށް ނޫން ކަމަށް ބުނެ، ރެފްރީ އަށް ނުރުހުން އަމާޒުކޮށްފަ އެވެ.

އެކަމާ ގުޅިގެން ޕީޖީއެމްއޯއެލް އިން ބުނީ، ކްލޮޕް ދެއްކި ވާހަކަތަށް އެ ކޮމެޓީން ވަރަށް ރަނގަޅަށް އަޑު އަހައިފައި ވާނެ ކަމަށެވެ. އެ ކޮމެޓީން ބުނީ މުވާސަލާތީ ވަސީލަތެއް މެދުވެރިކޮށް ޕްރިމިއާ ލީގުގައި ކުޅޭ މެޗުތަކުގެ އޮފިޝަލުންގެ ހުރިހާ ވާހަކައެއް ރެކޯޑު ކުރާ ކަމަށެވެ. އެހެންކަމުން އެ މެޗުގައި ރެފްރީ ޕޯލް ޓިއާނީ ދެއްކި އެންމެހާ ވާހަކަތަކުގެ ރެކޯޑިން ބެލި ކަމަށާއި، ރެފްރީ އަމަލުކޮށްފައި ވަނީ އެންމެ ޕްރޮފެޝަނަލް ގޮތުގައި ކަމުގެ ޔަޤީންކަން ދޭ ކަމަށެވެ. އެހެންކަމުން، ޓިއާނީގެ އަމަލުތަކަކީ ނާޖާއިޒު އަމަލުތަކެއް ކަމަށް ބުނާ އެންމެހައި ވާހަކަތައް ދޮގު ކުރާ ކަމަށް ވެސް އެ ކޮމެޓީން ވަނީ ބުނެފަ އެވެ. މީގެ އިތުރުން ރެފްރީންނާ ގުޅޭ ގޮތުން ހަގީގަތާ ޚިލާފު އެއްވެސް ވާހަކައެއް ނުދެއްކުމަށް އިލްތިމާސްކޮށްފަ އެވެ.

މިކަމާ ގުޅިގެން އިންގްލެންޑުގެ ކުރީގެ ކުޅުންތެރިޔާ އެލަން ޝިއަރާ ވެސް ވަނީ ކްލޮޕަށް ވަރަށް ބޮޑަށް ފާާޑު ކިޔައިފަ އެވެ. އޭނާ ބުނީ، މެޗުގައި ޑިއޭގޯ ޖޮޓާ އަށް ރަތް ކާޑު ދައްކައި ދަނޑުން ފޮނުވާލުމުގެ ފުރުސަތު ވެސް ރެފްރީ އަށް އޮތް ކަމަށާއި، ނަމަވެސް ކްލޮޕް އެ ވާހަކަ ދައްކަން ބޭނުންނުވާނެ ކަމަށެވެ. އަދި މެޗުގެ ހަތަރު ވަަނަ އޮފިޝަލާ ދިމާލަށް ދިޔުމުން ކްލޮޕަށް ރީނދޫ ކާޑެއް ދެއްކުން އެއީ އޭނާގެ "ނަސީބު" ކަމަށެވެ. ޝިއަރާ ބުނީ، އެކަމަކީ ކްލޮޕްގެ ފަރާތުން އަލަށް ފެނުނު ކަމެއް ނޫން ކަމަށާއި އެއީ އޭނާގެ ފަރާތުން އާންމު ގޮތެއްގަައި ވެސް ފެންނަ ކަންކަން ކަމަށެވެ.