ނާގަލްސްމަން ބުނަނީ ވިސްނާފައި ކަންކަން ބަދަލު ކުރާނެ ކަމަށް

ޖަރުމަނު ލީގުގައި އޮސްބާގް އަތުން ބަލިވެ ހަތަރު ވަނަ އަށް ވެއްޓުމުން ޗެމްޕިއަން ބަޔާން މިއުނިކްގެ ކޯޗު ހޫލިއަން ނާގަލްސްމަން ނުތަނަވަސްކަން ފާޅުކޮށްފިއެވެ.

ލީގުގައި ހޮނިހިރު ދުވަހުގެ ރޭ ބަޔާން ބަލިވީ 1-0 އިންނެވެ. މި ބައްޔާއެކު ބަޔާން އޮތީ ހަތް މެޗުން ލިބުނު 12 ޕޮއިންޓާއެކު ތާވަލްގެ ހަތަރު ވަނަ މަގާމުގައެވެ. އެއް ވަނަ މަގާމުގައި އޮތް ބޮރޫޝިއާ ޑޯޓްމަންޑަށް ލިބެނީ ހަތް މެޗުން 15 ޕޮއިންޓެވެ.

މެޗަށްފަހު ވާހަކަ ދައްކަމުން ނާގަލްސްމަން ބުނީ މެޗުގެ ނަތީޖާއަކީ ކަންބޮޑުވާ ނަތީޖާއެއް ކަމަށެވެ. މީގެ އިތުރުން އޭނާ ބުނީ، އެ މެޗު ނޫނަސް އެންމެ ފަހުން ލީގުގައި ކުޅުނު މެޗުތަކުގެ ނަތީޖާ ތަކަކީ ވެސް ރަނގަޅު ނަތީޖާތަކެއް ނޫން ކަމަށެވެ. އޭނާ ބުނީ އެކަންކަމާ މެދު އޭނާ ވަރަށް ބޮޑަށް ވިސްނާނެ ކަމަށާއި، އެއަށްފަހު ބަދަލުތަކެއް ގެންނާނެ ކަމަށެވެ. އިތުރަށް ނާގަލްސްމަން ބުނީ ގެންނަ ބަދަލުން ނިކުންނާނެ ނަތީޖާއެއް ވެސް ބަލަން ޖެހޭނެ ކަމަށެވެ.

ނާގަލްސްމަން ބުނީ ބަޔާނާ މެދު ވިސްނާ ފަދައިން، އޭނާގެ އަމިއްލަ ނަފްސާއި އެހެން ހުރިހާ ކަމަކަށް ވެސް ވިސްނާނެ ކަމަށެވެ. އޭނާ ފާހަގަ ކުރި ގޮތުގައި ވާދަވެރިކޮށް ލީގު ދާއިރު، މެޗެއް ގެއްލުވާލުމަކީ ވަރަށް ބޮޑު ގެއްލުމެއް ކަމަށެވެ. ނަމަވެސް ނާގަލްސްމަން ބުނީ ބައްޔާއެކު އޭނާ އެއްވެސް ކުޅުްތެރިޔަކު ކުށްވެރިކުރަން ބޭނުން ނުވާ ކަމަށާއި، ބޭނުންވަނީ ކަންކަން ރަނގަޅު ކުރަން ކަމަށެވެ.

ލީގުގައި ބަޔާނަށް ދެން އޮތީ މި މަހުގެ 30 ވަނަ ދުވަހު ލެވަކޫސަނާ ދެކޮޅަށް ކުޅޭ މެޗެވެ.