ބަޔާނުން ވެސް ބުނަނީ ރޮނާލްޑޯއަށް ނޫނެކޭ

މެންޗެސްޓަރ ޔުނައިޓެޑު ދޫކޮށްލަން ބޭނުންވާކަން ހާމަކޮށްފައިވާ ކްރިސްޓިއާނޯ ރޮނާލްޑޯ ހޯދުމުގެ ޝައުގުވެރިކަމެއް ނެތް ކަމަށް ބަޔާން މިއުނިކުން ބުނެފިއެވެ.

ޖަރުމަނުގެ ބަޔާނަށް ކުޅެމުން އައި ޕޮލޭންޑުގެ އިތުބާރު ފޯވާޑް ރޮބާޓް ލެވަންޑޯސްކީ އެ ޓީމު ދޫކޮށް ބާސެލޯނާއަށް ބަދަލުވާތީ، އޭނާގެ ބަދަލަށް އެ ޓީމުން ރޮނާލްޑޯ ގެންދަން އުޅޭކަމުގެ އަޑުތަކެއް ފެތުރުނެވެ. ރޮނާލްޑޯގެ އެޖެންޓު ޖޯޖް މެންޑޭސް އަންނަނީ ރޮނާލްޑޯ ދާނެ ކުލަބެއް ހޯދުމުގެ މަސައްކަތް ކުރަމުން ކަމަށާއި، އޭގެ ތެރެއިން ބަޔާނަށް ރޮނާލްޑޯ ގެންދަން އޭނާ މަސައްކަތް ކުރާ ކަމަށް ރިޕޯޓުތައް ބުނެއެވެ.

ބަޔާންގެ ސީއީއޯ އޮލިވާ ހާން ބުނީ ރޮނާލްޑޯ އަކީ އޭނާއަށް ވަރަށް ކަމުދާ، މޮޅު ކުޅުންތެރިއެއް ކަމަށެވެ. ކޮންމެ ކުލަބެއްގައި ވެސް ފިލޯސަފީއެއް އޮންނާނެކަން ފާހަގަކުރަމުން އޭނާ ބުނީ، މިވަގުތު ރޮނާލްޑޯގެ ސޮއި ހޯދުމަކީ ބަޔާނާއި، ބުންޑެސްލީގާއަށް އެންމެ ރަނގަޅު ގޮތް ނޫން ކަމަށެވެ. މީގެ އިތުރުން އޮލިވާ ހާން ބުނީ އެއީ ބަޔާންގެ އައިޑިއާ އާއި ޕްލޭންއަށް ވެސް ފިޓުވާނެ ބަދަލަކަށް ނުވާނެ ކަމަށެވެ.

އޮލިވާ ހާންގެ އިތުރުން ބަޔާންގެ ކޯޗު ހޫލިއަން ނާގަލްސްމަން ވެސް ވަނީ އެކަމާ ގުޅޭ ގޮތުން ވާހަކަ ދައްކާފައެވެ. އޭނާ ބުނީ، ރޮނާލްޑޯގެ ސޮއި ހޯދުމުގެ އޭނާގެ ޝައުގުވެރިކަން އޮތް ކަމަށް ބުނެ ފަތުރަމުންދާ ވާހަކަތައް އަޑުވިއްޖެ ކަމަށާއި، އެއީ ހަގީގަތެއް ނޫން ކަމަށެވެ. އޭނާ ވެސް ވަނީ މިވަގުތު ރޮނާލްޑޯގެ ސޮއި ހޯދުމަކީ އެންމެ ރަނގަޅުކަމެއް ނޫން ކަމަށް ބުނެފައެވެ.

ބަޔާނުން ރޮނާލްޑޯ ހޯދުމުގެ ޝައުގުވެރިކަމެއް ނެތް ކަމަށް ބުނިއިރު، ޕެރިސް ސެއިންޓް ޖާމަން (ޕީއެސްޖީ) އާއި ޗެލްސީން ވެސް ވަނީ ރޮނާލްޑޯ ހޯދުމުގެ ޝައުގުވެރިކަމެއް ނެތް ކަމަށް ބުނެފައެެވެ. ޔުނައިޓެޑު ދޫކޮށްލަން ބޭނުންވާކަން އެންގުމަށްފަހު، އެ ޓީމުން ކުރިއަށް ގެންދާ ޕްރީ ސީޒަންގެ ފަރިތަކުރުންތަކުގައި ވެސް ރޮނާލްޑޯ ބައިވެރިވެފައެއް ނުވެއެވެ.