ސަރުކާރު ހިއްސާވާ އޮފީސް ކުންފުނިތަކުގެ އިތުރުން އަމިއްލަ ފަރާތްތަކުން ހިންގާ އޮފީސްތަކަށް ވެސް ފުރުސަތު ދީގެން މިއަހަރުގެ އޮފީސް ބިލިއަޑް މުބާރާތް މެއި މަހުގެ 6 ވަނަ ދުވަހު ފެށުމަށް ހަމަޖެހިފައިވާ މޯލްޑިވްސް ޕޫލް ބިލިއަޑް އެސޯސިއޭޝަނުން ބުނެފި އެވެ.

ބިލިއަޑް އެސޯސިއޭޝަންގެ ޖެނެރަލް ސެކްރެޓަރީ އަބްދުﷲ ބިޝާރު ވިދާޅުވީ މިއަހަރުގެ މުބާރާތަށް ގެނެވުނު އެންމެ ބޮޑު ބަދަލަކީ އަމިއްލަ ފަރާތްތަކުން ހިންގާ އޮފީސް ކުންފުނިތަކަށް މުބާރާތުގައި ވާދަކުރުމަށް ހުޅުވާލި ފުރުސަތު ކަމަށެވެ.

ބިޝާރު ވިދާޅުވީ އެހެން ނަމަވެސް އަމިއްލަ އޮފީސް ތަކަށް މުބާރާތުގައި ބައިވެރި ވެވޭނީ އެ އޮފީހެއްގެ ޕޭރޯލްގައި 100 އަށްވުރެ ގިނަ މުވައްޒަފުން ވަޒީފާ އަދާކުރާ އޮފީސްތަކަށް ކަމަށެވެ.

އަމިއްލަ އޮފީސްތަކަށް ބައިވެރިވެވޭ ގޮތަށް ގެނައި މިބަދަލުގެ އިތުރުން މި މުބާރާތުގައި އަންހެން ކުޅުންތެރިން ވާދަކުރުމުގެ ފުރުސަތުވެސް ވަނީ ދީފަ އެވެ. އެގޮތުން ވީހާ ވެސް ގިނަ އޮފީސްތަކަކުން އަންހެން ކުޅުންތެރިން ބައިވެރިކުރުމަށް ބިލިއަޑް އެސޯސިއޭޝަނުން ވަނީ އެދިފަ އެވެ.

އަންހެން ކުޅުންތެރިންނަށް މުބާރާތްތަކުގައި ކުޅުމުގެ ފުރުސަތު ދިނުމާއި ގުޅޭ ގޮތުން ބިޝާރު ވިދާޅުވީ ރާއްޖޭގައި ބާއްވާ އެކި މުބާރާތްތަކުގައި އަންހެން ކުޅުންތެރިންނަށް ކުޅުމުގެ ފުރުސަތު ދިނުމަކީ އެ އެސޯސިއޭޝަނުން އަބަދުވެސް އިސްކަމެއްދީގެން ކުރަން މަސައްކަތް ކުރަމުން އަންނަ ކަމެއް ކަމަށާއި އެގޮތުން މިއަހަރަކީ އެކަމަށް މިސްރާބު ހިފައިގެން މަސައްކަތްކުރާ އަހަރެއް ކަމަށެވެ.

ބިޝާރު ވިދާޅުވީ ފިރިހެން ކުޅުންތެރިންނެކޭ އެއް ވަރަކަށް އަންހެން ކުޅުންތެރިންނަށް މި ކުޅިވަރުން ފުރުސަތު ދިނުމަށް ބޭނުންވާ ކަމަށާއި އަދި އެފަރާތްތަކަށް ބޭނުންވާ ތަމްރީނުތައް އެ އެސޯސިއޭޝަނުން ފޯރުކޮށްދެމުންދާނެ ކަމަށެވެ.

ގައުމީ ޓީމު ވާދަކުރާ ބައެއް އިންޓަނޭޝަނަލް މުބާރާތްތަކަށް އަލިއަޅުވާލަމުން ބިޝާރު ވިދާޅުވީ ގިނަ މުބާރާތްތަކަށް ދިއުމުގެ ފުރުސަތު އަބަދުވެސް ލިބެމުން އަންނަނީ އަންހެން ކުޅުންތެރިންނާއެކު ހިމެނޭ ޑަބަލްސް ޕެއާތަކަށް ކަމަށާއި އެގޮތުން އަންހެން ކުޅުންތެރިން ގައުމީ ލެވެލްގައި ކުޅެމުން ނުދިއުމުގެ ސަބަބުން އެފުރުސަތުތައް ގެއްލެމުންދާ ކަމަށެވެ.

އޮފީސް މުބާރާތުގެ އިތުރުން އެ އެސޯސިއޭޝަނުން އަންނަނީ އަންނަ އެޕްރިލް މަހު އިންޓަރ ރިސޯޓް ބިލިއަޑް މުބާރާތް ބޭއްވުމަށް މަސައްކަތް ކުރަމުންނެވެ. މި މުބާރާތަކީ އެ އެސޯސިއޭޝަނުން ރިސޯޓްތަކުގެ ކުޅުންތެރިންނަށް އަމާޒުކޮށްގެން ބާއްވަން މަސައްކަތްކުރާ ފުރަތަމަ މުބާރާތެވެ.

ކޮންމެ އަހަރަކުވެސް ބާއްވަމުން އަންނަ މި މުބާރާތުގައި ބައިވެރިވުމުގެ ފުރުސަތު މި ހިނގާ އޭޕްރިލް މަހުގެ 2 ވަނަ ދުވަހު ހުޅުވާލާފައިވާ އިރު، މުބާރާތުގައި ބައިވެރިވުމުގެ އެންމެ ފަހު ތާރީހަކީ މި މަހުގެ 27 ވަނަ ދުވަހެވެ. އަދި މުބާރާތް ކުރިއަށްދާނީ މެއި މަހުގެ 6 އިން 23 ގެ ނިޔަލަށް އެމްޕީބީއޭ ކްލަބު ހައުސްގަ އެވެ.