ދެ ލޯންޗު ޖެހި ހިނގި އެކްސިޑެންޓެއްގައި މީހަކު މަރުވެއްޖެ

ކ. ފޭދޫފިނޮޅު ކައިރީގައި ހޮނިހިރު ދުވަހުގެ ހަވީރު ހިނގި ލޯންޗު އެކްސިޑެންޓް އެއްގައި މީހަކު މަރު ވެއްޖެއެވެ.

މައުލޫމާތު ލިބިފައިވާ ގޮތުގައި މި އެކްސިޑެންޓުގައި އަނިޔާ ލިބުމުގެ ސަބަބުން އޭޑީކޭ ހޮސްޕިޓަލުގައި ފަރުވާދެމުން ދަނިކޮށް މިދުނިޔެ ދޫކޮށްފައިވަނީ ވިޔަފާރިވެރިޔާ ސައުދުﷲ އަހުމަދުއެވެ.

ބ. ކުޑަރިކިލަށް އުފަން އުމުރުން 53 އަހަރުގެ ސައުދުﷲ އަކީ ސަސް އީ ކޮންސްޓްރަކްޝަން ކުންފުނީގެ މެނޭޖިން ޑިރެކްޓަރެވެ. އޭނާ މިހާތަނަށް ވަނީ އަމީން ކޮންސްޓްރަކްޝަނާއި ރެއިންބޯ އެންޓަޕްރައިސަސްގައި ވެސް އިސް މަގާމުތަކެއް އަދާ ކުރައްވާފައެވެ.

ފުލުހުން ބުނެފައިވާ ގޮތުގައި މި އެކްސިޑެންޓުގެ މައުލޫމާތު އެ އިދާރާއަށް ލިބުނީ ހޮނިހިރު ދުވަހުގެ ހަވީރު 4:42 އެހާއިރުއެވެ.

މި އެކްސިޑެންޓުގައި ބަލަން ޖެހޭ ކަންކަން ބަލަމުން އަންނަ ކަމަށް ފުލުހުން ބުނެފައި ވެއެވެ،