ވަގުތީ ކޯޗުކަމުން ފްރޭންކް ލަމްޕާޑު ވަކިކުރުމުގެ ވިސްނުން ޗެލްސީން ނުގެންގުޅޭކަމަށް ބޭރުގެ މީޑިއާ ރިޕޯޓުތައް ބުނެފިއެވެ.
ޗެލްސީގެ ކޯޗުކަމާ ދެވަނަ ފަހަރަށް ވަގުތީ ގޮތުން ލަމްޕާޑު ހަވާލުވީ މިހާރު ކުރިއަށްދާ ސީޒަންގެ ނިޔަލަށެވެ. އެއީ ކޯޗުކަމުން ގްރަހަމް ޕޮޓާ ވަކިކުރުމަށްފަހުއެވެ. ނަމަވެސް ލަމްޕާޑުއާއެކު ވެސް ޗެލްސީގެ ނަތީޖާތައް ވަނީ އިންތިހާއަށް ދަށްވެފައެވެ. ދެވަނަ ފަހަރަށް ޗެލްސީއާ ހަވާލުވެ، ލަމްޕާޑުގެ އިރުޝާދުގެ ދަށުން މިހާތަނަށް ކުޅުނު ފަސް މެޗުންވެސް ޗެލްސީ ވަނީ ބަލިވެފައެވެ. އެއާއެކު ސަޕޯޓަރުންގެ ނުރުހުން އަމާޒުވެ، ލަމްޕާޑަށް އަންނަނީ ޕްރެޝަރު ބޮޑުވަމުންނެވެ. އެއާއެކު ވަގުތީ ކޯޗުކަމުން ވެސް އޭނާ ވަކިކޮށްފާނެ ކަމަށް ގިނަ ފަރާތްތަކުން އަންނަނީ ބުނަމުންނެވެ. ނަމަވެސް، ޗެލްސީގެ ވެރިންގެ ވިސްނުމަކީ ސީޒަންގެ ނިޔަލަށް ލަމްޕާޑު މަގާމުގައި ބެހެއްޓުން ކަމަށާއި، އެއަށްފަހު އައު ސީޒަނަށް އައު ކޯޗެއް ހޯދާނެ ކަމަށްވެސް ރިޕޯޓުތައް ބުނެއެވެ.
ޗެލްސީން އަންނަނީ އައު ކޯޗަކު ހަމަޖެއްސުމުގެ މަޝްވަރާތައް ކުރަމުންނެވެ. އެގޮތުން ކުރިން ޕްރިމިއާ ލީގުގެ ޓޮޓެންހަމާއި، ފްރާންސް ލީގުގެ ޕެރިސް ސެއިންޓް ޖާމަން (ޕީއެސްޖީ) އަށް އިރުޝާދު ދީފައިވާ އާޖެންޓީނާގެ މައުރީސިއޯ ޕޮޗެޓީނޯއާއެކު ޗެލްސީން މަޝްވަރާކުރަމުން އަންނަކަމަށާއި، އެ މަޝްވަރާތައް ކުރިއަށްދަނީ ވަރަށް ކާމިޔާބުކަމާއެކު ކަމަށް ރިޕޯޓުތައް ބުނެއެވެ. އަނެއްކޮޅުން، ޕޮޗެޓީނޯ ޗެލްސީއާ ހަވާލުވާނީ އޭނާ ބޭނުންވާ ގޮތަށް ބައެއް ބާރުތައް އޭނާގެ އަތް މައްޗަށް ދޫކޮށްލަން ޗެލްސީން އެއްބަސްވުމުން ކަމަށްވެސް ރިޕޯޓުތައް ބުނެއެވެ. އައު ކޯޗެއްގެ ހޯދުމުގެ މަޝްވަރާގައި ޗެލްސީން ވަނީ މީގެ ކުރިން ޖަރުމަނުގެ ހޫލިއަން ނާގަލްސްމަނާއި، ސްޕެއިންގެ ލުއިސް އެންރީކޭއާއެކު ވެސް މަޝްވަރާކޮށްފައެވެ. ނަމަވެސް އެ ދެ މީހުންނާއެކު ކުރިއަށްދިޔަ މަޝްވަރާތަކުގައި އަލި މަގެއް ނުފެނި، ލިސްޓުން ދެ މީހުންވެސް ވަނީ ބޭރުވެފައެވެ.
ޗެލްސީ މިވަގުތު އޮތީވެސް އިނގިރޭސި ޕްރިމިއާ ލީގު ތާވަލްގެ 11 ވަނާގައެވެ. އެއީ މިހާތަނަށް ކުޅުނު 32 މެޗުން 39 ޕޮއިންޓާއެކުއެވެ.
