ރާއްޖޭގެ އިގްތިސާދީ ސަރަހައްދުގެ ފުރިހަމަ އިންތައް ކަށަވަރުކުރެވިއްޖެ: ޝާހިދު

ރާއްޖޭގެ ހާއްސަ އިގްތިސާދީ ސަރަހައްދުގެ ފުރިހަމަ އިންތައް މިހާރު ކަށަވަރު ކުރެވިއްޖެ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

ޝާހިދު މިފަދައިން ވިދާޅުވީ އިޓްލޮސްގައި ކުރިއަށްދިޔަ އިމުގެ މައްސަލަ ރާއްޖެއިން ބޭނުންވި ގޮތަށް ނިމުމާ ގުޅިގެން ކުރެއްވި ޓްވީޓެއްގައެވެ. އެ ޓްވީޓުގައި މިނިސްޓަރު ވިދާޅުވީ ރާއްޖެއިން މިއަދު ކާމިޔާބުކަމާއެކު ރާއްޖޭގެ ދެކުނުން ކަނޑުގެ އިން ކަނޑަޅައިފި ކަމަށެވެ. އަދި އެކަން ކޮށްފައި ވަނީ ބައިނަލްއަޤުވާމީ ޤާނޫނުތަކާއި އަސާސްތަކަށް ފުރިހަމައަށް އަމަލު ކޮށްގެން ކަމަށް ވެސް ވިދާޅުވިއެވެ.

ޝާހިދު ވިދާޅުވި ގޮތުގައި ރާއްޖޭގެ ހާއްސަ އިގްތިސާދީ ސަރަހައްދުގެ ފުރިހަމަ އިންތައް ކަށަވަރު ކުރެވުނީ ބައިނަލްއަގުވާމީ ނިޒާމަށް އޮތް ފުރިހަމަ އިތުބާރުގެ ސަބަބުންނެވެ.

މިއީ ތާރީހީ މޮޅެއްކަން ފާހަގަކުރައްވައި ޝާހިދު ވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށާއި ބަންޑާރަނައިބު އިބްރާހިމް ރިފްއަތުއަށް މަރުހަބާ ވިދާޅުވެފައެވެ.

ހުކުރު ދުވަހު އިޓްލޮސް އިން ވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށް، ޗާގޯސް އާއި ރާއްޖޭގެ ފުށުއަރާ ސަރަހައްދުން ރާއްޖެއަށް 4،687 އަކަކިލޯމީޓަރުގެ އިތުރު ސަރަހައްދެއް ކަށަވަރުވާގޮތަށް ނިންމާފައެވެ.

މޮރިޝަސްގެ ފަރާތުން އިޓްލޮސްއަށް ހުށަހަޅާފައިވާ ހުށަހެޅުމުގައި ބޭސް ޕޮއިންޓް ކަނޑައަޅަން ފަށާނެ ހިސާބަކީ ތިލަ ދިޔަވަރުގައި ފެންނަން އޮތް ބްލެންހެމް ރީފް އިން ފެށިގެން ކަމުގައި ވަނީ ބަޔާންކޮށްފައެވެ. ނަމަވެސް ރާއްޖޭން ބުނެފައިވަނީ ބައިނަލްއަގުވާމީ ހަމަތަކަށް ބަލާއިރު، ތިލަ ދިޔަވަރުގައި ފެންނަން އޮންނަ ފަރަކުން ބޭސް ޕޮއިންޓު ކަނޑަނޭޅޭނެ ކަމަށެވެ. އިން ވަކިކުރުމުގެ މައްސަލައިގައި، ރާއްޖޭން ވަކާލާތުކުރީ، ކަނޑުގެ ސަރަހައްދުގެ އިން ވަކިކުރުމުގައި ބަލަން ޖެހޭނީ ޗާގޯސްގެ އައްސޭރިފަށުން ފެށިގެން ކަމަށް ބުނެއެވެ.