މީމު އެއަރޕޯޓުގެ ރަންވޭގެ މަސައްކަތް ފަށައިފި

މ. މުލީގައި ތަރައްގީކުރަމުންދާ "މީމު އެއަރޕޯޓު"ގެ ރަންވޭގެ މަސައްކަތް ފަށައިފިއެވެ.

މި އެއަރޕޯޓުގެ މަސައްކަތް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއެވެ.

އެއަރޕޯޓުގެ މަސައްކަތްތައް ކުރިއަށްދާގޮތް ހިއްސާކުރަމުން އެކުންފުނިން ބުނީ މީމު އެއަރޕޯރޓް ތަރައްޤީ ކުރުމުގެ މަޝްރޫއުގެ ދަށުން، ރަންވޭގެ އޭބީސީ މަސައްކަތްތައް 27 އޭޕްރީލް 2023 ވަނަ ދުވަހު ފަށާފައިވާކަމަށެވެ. އަދި އަލިފާން ނިއްވާ އިމާރާތުގެ 90 އިންސައްތަ މަސައްކަތް ނިމިފައިވާކަމަށް އެމްޓީސީސީން ބުނެފައިވެއެވެ.

މ. އަތޮޅުގައި އެއަރޕޯޓެއް ނެތުމަކީ އެއަތޮޅު ރައްޔިތުންގެ ވަރަށް ބޮޑު ކަންބޮޑުވުމެއް އޮތް ކަމެކެވެ. އެހެންކަމުން ވީހާވެސް އަވަހަކަށް މި މަސައްކަތްވެސް ނިންމުމަސް ސަރުކާރުން ވަނީ އަމާޒު ހިފާފައެވެ. މިގޮތުން މުލީ އެއާޕޯޓުގެ ރަންވޭގައި ތާރު އެޅުމުގެ މަސައްކަތް، އެޕްރީލްމަހު ފަށާނެ ކަމަށް އެމްޓީސީސީގެ ސީއީއޯ އާދަމް އާޒިމް މީގެ ކުރިން ވަނީ ވިދާޅުވެފައެވެ.

މި މަޝްރޫޢުގެ ދަށުން، 14 ހެކްޓަރުގެ ބިން ހިއްކުމާއި، 1812 މީޓަރުގެ ސަރަޙައްދެއްގެ ގޮނޑުދޮށް ހިމާޔަތް ކުރުމާއި، 1200 މީޓަރު ދިގު 30 މީޓަރު ފުޅާ ރަންވޭއެއް ޤާއިމުކުރުމާއި، ޓެކްސީވޭއަކާއި އޭޕްރަންއެއް ހެދުމުގެ މަސައްކަތް އެމްޓީސީސީން ދަނީ ކުރަމުންނެވެ. މި މަޝްރޫއަކީ 230.10 މިލިއަން ރުފިޔާގެ މަޝްރޫޢެއް.