ވައިކަރަދޫ ސްކޫލު އެއްދަންފަޅިއަށް ބަދަލުކުރެވޭނީ މިހާރު ހަދަމުންދާ އިމާރާތުގެ މަސައްކަތް ނިމުމުން: މިނިސްޓަރު
އެ މަސައްކަތް ކުރަމުންދާ ކުންފުންޏަށް ފުރަތަމަ ނޯޓިސް ވަނީ ފޮނުވާފައި
އެޑިއުކޭޝަން މިނިސްޓަރު ޑރ. އާއިޝަތު އަލީ
ހދ.ވައިކަރަދޫ ސްކޫލު އެއްދަންފަޅިއަށް ބަދަލުކުރެވޭނީ މިހާރު ހަދަމުންދާ އިމާރާތުގެ މަސައްކަތް ނިމުމުން ކަމަށް އެޑިޔުކޭޝަން މިނިސްޓްރީން ބުނެފިއެވެ.
މިމަހުގެ 10 ވީ ހޯމަ ދުވަހު ރައްޔިތުންގެ މަޖިލީހުގައި ވާހަކަފުޅުދައްކަވަމުން އެޑިޔުކޭޝަން މިނިސްޓަރު ޑރ.އާއިޝަތު އަލީ ވިދާޅުވީ ވައިކަރަދޫ ސްކޫލު އެއްދަންފަޅިއަށް ބަދަލުކުރުމަށް އިމާރާތެއް ބޭނުންވާ ކަމަށެވެ. އަދި އެ މަސައްކަތް ކުރެވޭނީ ހަދަމުންދާ އިމާރާތުގެ މަސައްކަތް ނިމުމުން ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ވައިކަރަދޫ ސްކޫލުގެ 12 ކްލާސް ރޫމް އިމާރާތް ކުރުމުގެ މަސައްކަތުގައި ލަސްތަކެއް އުޅޭކަން ފާހަގަކުރެވިފައިވާ ކަމަށެވެ. އެހެންކަމުން މިހާރު ފުރަތަމަ އެ މަސައްކަތް ކުރަމުންދާ ކުންފުންޏަށް ފުރަތަމަ ނޯޓިސް ފޮނުވާފައިވާ ކަމަށް މިނިސްޓަރު ވިދާޅުވިއެވެ.
ވަށާޖެހޭ ތައުލީމީ ނިޒާމެއްގެ ދަށުން ސުކޫލުތައް އެއް ދަންފަޅިއަށް ބަދަލު ކުރުމުގެ މަސައްކަތް އެޑިޔުކޭޝަން މިނިސްޓްރީން ކުރަމުންދާއިރު، ރާއްޖޭގެ ހުރިހާ ސުކޫލެއް އެއްދަންފަޅިއަށް ބަދަލު ކުރުމަކީ ރައީސް ސާލިހުގެ ރިޔާސީ ވައުދުފުޅެކެވެ.
އެގޮތުން މިހާތަނަށް އައިއިރު އެއްދަންފަޅިއަށް ބަދަލުކުރުމަށް 248 ޕްރޮޖެކްޓު ބަޖެޓު ކުރެވިފައިވެއެވެ. 48 ޕްރޮޖެކްޓެއް ނިމިފައިވާއިރު، 114 ޕްރޮޖެކްޓުގެ މަސައްކަތް ކުރިއަށްދާ ކަމަށް މިނިސްޓްރީން މައުލޫމާތު ދެއެވެ. އޭގެ ތެރޭގައި 1780 ކްލާސްރޫމްގެ އިތުރުން 95 މަލްޓިޕަރޕަސް ހޯލް އަދި 596 އެހެނިހެން އިމާރާތުގެ ޕްރޮޖެކްޓް ހިމެނެ އެވެ.
