މާލެއާއި ހުޅުމާލޭގައި ފެނުގެ ކެޕޭސިޓީ އިތުރުކުރުމުގެ މަސައްކަތް ކުރިއަށް އެބަދޭ: ޝާހު
މާލޭގެ ރައްޔިތުން ދުވާލެއްގެ މައްޗަށް ގާތްގަނޑަކަށް 20،000 ޓަނުގެ ފެން ބޭނުންކުރޭ
އެމްޑަބްލިޔުއެސްސީގެ އެމްޑީ ހަސަން ޝާހު
މާލެއާއި ހުޅުމާލޭގައި ފެނުގެ ކެޕޭސިޓީ އިތުރުކުރުމުގެ މަސައްކަތް ކުރިއަށްދާ ކަމަށް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)ން މެނޭޖިންގ ޑިރެކްޓަރު ހަސަން ޝާހު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޝާހު ވިދާޅުވީ މާލެ އަދި ހުޅުމާލޭގައި އަންދާޒާ ކުރާ މިންވަރަށް ބޮޑަށް ފެން ބޭނުންކުރާ މިންވަރު އިތުރު ކަމަށެވެ. ޝާހު ވިދާޅުވީ މާލޭގައި ގާތްގަނޑަކަށް ދުވާލެއްގެ މައްޗަށް 30،000 ޓަނުގެ ފެން ވޭސްޓް ވޯޓަރގެ ގޮތުގައި ޑިސްޗާޖު ކުރާ ކަމަށާއި، މާލޭގެ ރައްޔިތުން ދުވާލެއްގެ މައްޗަށް ގާތްގަނޑަކަށް 20،000 ޓަނުގެ ފެން ބޭނުންކުރާ ކަަމެށެވެ. އެހެންކަމުން ސްޓޯރޭޖް ކެޕޭސިޓީ އަޕްގްރޭޑް ކުރުމަކީ ވަރަށް މުހިންމު ކަމެއް ކަމަށް ޝާހު ވިދާޅުވިއެވެ.
ޑިމާންޑާއި އެއްވަރަށް ފެން އުފެއްދޭކަން ފާހަގަކުރައްވައި ޝާހު ވިދާޅުވީ ޖަނަރޭޓަރު ނުވަތަ ފެން އުފައްދާ ނިޒާމު މައްސަލަ ޖެހޭ ފަހަރުތަކުގައި އެލާޓްގައި ތިބެންޖެހޭ ކަމަށެވެ. އަދި ވިދާޅުވީ އެ މައްސަލަ ހައްލު ކުރުމުގެ ގޮތުން ކެޕޭސިޓީ އިތުރު ކުރުމުގެ މަސައްކަތް ކުރަމުންދާ ކަމަށެވެ.
އެގޮތުން މާލޭގައި 13،000 ޓަނުގެ ދެފެން ތާންގި ބެހެއްޓުމުގެ މަސައްކަތް ކުރަމުންދާ ކަމަށާއި، ހުޅުމާލޭގައި 3000 ޓަނުގެ ފެން ޕްލާންޓެއް ބެހެއްޓުމުގެ މަސައްކަތް ކުރަމުންދާ ކަމަށެވެ.
ހުޅުމާލޭގައި ގާއިމްކުރެވޭ ފެން ޕްލާންޓަށް އިޝާރާތް ކުރައްވައި ޝާހު ވިދާޅުވީ ކަނޑައަޅާފައިވާ ތާރީހުތަކާއި އެއްގޮތަށް މަސައްކަތް ކުރިއަށްދާނަމަ އޮގަސްޓް މަހުގެ ތެރޭގައި ފެން ޕްލާންޓް ގާއިމްކުރުމުގެ މަސައްކަތް ނިމޭނެ ކަމަށެވެ.
