ސްޕެއިންގެ ބާސެލޯނާ އަށް ކުޅެމުން އަންނަ އައިވަރީ ކޯސްޓުގެ މިޑްފީލްޑަރު ފްރޭންކް ކެސިއޭ ހޯދުމުގެ ޝައުޤުވެރިކަން ޔުވެންޓަސް އިން ފާޅުކޮށްފައިވާ ކަމަށް އިޓަލީގެ މީޑިއާތަކުން ބުނެފި އެވެ.

ޔުވެންޓަސް އިން ކެސިއޭ ހޯދުމުގެ ޝައުޤުވެރިން ފާޅުކޮށްފައިވާއިރު، އޭނާގެ ކުރީގެ ކުލަބް އޭސީ މިލާން އަދި ވާދަވެރި އިންޓަ މިލާނުން ވެސް ކެސިއޭ ހޯދުމުގެ މަސައްކަތް ކުރާ ކަމަށް ރިޕޯޓުތައް ބުނެ އެވެ. މީގެ އިތުރުން އިނގިރޭސި ޕްރިމިއާ ލީގުގެ ޓޮޓެންހަމް އިން ކެސިއޭ ހޯދުމުގެ ޝައުޤުވެރިކަން ފާޅުކޮށްފައިވާ ކަމަށާއި، އެކުލަބުން މަޑުކުރަނީ ބާސެލޯނާގެ ނިންމުމަކަށް ކަމަށް ވެސް ރިޕޯޓުތައް ބުނެ އެވެ.

ޖުވެންޓަސް އިން ކެސިއޭ ހޯދުމަށް ބޭނުންވަނީ އަންނަ ސީޒަނުގައި އެ ޓީމުގެ މެދުތެރެއިން ކުޅޭނެ ރަނގަޅު ކުޅުންތެރިޔަކު ހޯދުމަށެވެ. އެގޮތުން ކެސިއޭ އަކީ ކުރިން އިޓާލިއަން ލީގުގައި ވެސް ކުޅެފައިވާ ކުޅުންތެރިޔަކަށްވާތީ، ޔުވެންޓަސް އިން ޤަބޫލު ކުރަނީ އެ ޓީމުގެ މެދުތެރޭގައި ކެސިއޭ އަށް މުހިންމު ދައުރެއް އަދާކުރެވޭނެ ކަމަށެވެ. އަނެއްކޮޅުން ސްޕެއިންގެ ބާސެލޯނާގައި އޭނާ ދައްކަމުން އަންނަ ކުޅުމުގެ ސަބަބުން ޔުވެންޓަސް އިން އޭނާ ހޯދަން ބޭނުންވާ ކަމަށް ވެސް ރިޕޯޓުތައް ބުނެ އެވެ. އެހެންކަމުން ޔުވެންޓަސް އިން އެ ކުލަބުގެ އެތެރޭގައި އެކަމުގެ މަޝްވަރާތައް ކުރިއަަށްގެންދާ ކަމަށް ވެސް ރިޕޯޓުތައް ބުނެ އެވެ.

ރިޕޯޓުތަކުގައިވާ ގޮތުން ބާސެލޯނާ އިން ވަނީ ކެސިއޭ އަށް މުސާރަ ކުޑަ ކުރުމަށް ހުށަހަޅައިފަ އެވެ. ނަމަވެސް ކެސިއޭ އަކަށް އެއްބަސްނުވާނެ ކަމަށާއި، މިހާރު އެކަމުގައި ގޮތެއް ނިންމާނީ ބާސެލޯނާ އިން ކަމަށެވެ. މީގެ އިތުރުން އަންނަ ސީޒަނަށް ބާސެލޯނާ އިން ވެސް ކުޅުންތެރިން ހޯދުމަށް މަސައްކަތް ކުރަމުން އަންނައިރު، ކެސިއޭ ދޫކޮށްލުމަކީ ވެސް ގާތް ކަމެއް ކަމަށް ރިޕޯޓުތައް ބުނެ އެވެ.

އޭސީ މިލާން ދޫކޮށް ކެސިއޭ ބާސެލޯނާ އަށް ބަދަލުވީ މިދިޔަ އަހަރުގެ ޖުލައި މަހު އެވެ. އޭނާ ބާސެލޯނާ އަށް ސޮއި ކުރީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އޭނާ ވަނީ މިހާތަނަށް ބާސެލޯނާ އަށް ކުޅެދިން 37 މެޗުގައި ތިން ލަނޑު ޖަހައިފަ އެވެ.