އަސަދުالله ކޮބާ؟ އިއްބެއާއި ރިލޭއަށް މިވީ ހިކިނެއް!

އަސަދުالله އަބުދުالله (އަސަކޮ) އަކީ ރާއްޖޭގައި އުފެދުނު އެންމެ މޮޅު އެއް ފޯވާޑެވެ. އެންމެ އިތުބާރު އެއް ނަމްބަރު ނައިންއެވެ. ކެރިއަރުގެ ކާމިޔާބީތައް ގުޅިފައިވަނީ މާޒިޔާއާއެވެ. އެއީ މާޒިޔާގެ ކެޕްޓަނެވެ.

ރާއްޖޭގެ މޮޅު ކުޅުންތެރިޔާގެ އެވޯޑް ހޯދިއެވެ. ރަންބޫޓް ހޯދިއެވެ. މާޒިޔާގައި ހޭދަކުރި ކާމިޔާބު 11 އަހަރަށްފަހު އޭނާ މާޒިޔާގެ ޖަރޒީ ބާލައިފިއެވެ. ސީޒަންގެ ފުރަތަމަ މުބާރާތުގެ ސެމީފައިނަލާ ހިސާބަށް އައިއިރު މާޒިޔާއަކުން އަދި އެހެން ޓީމަކުންވެސް އޭނާ ނުފެނެއެވެ. ޕްރެކްޓިސްއަކުންވެސް މެއެވެ. އެކަމަކު ހުރީ ފިޓްކޮށެވެ. އެހެންވިއްޔާ އަސަދުالله ކޮބައިހެއްޔެވެ.

ސީޒަން ފެށުމުގެ ކުރިން އޭނާ ފެންނާނީ ވެލެންސިޔާއިންކަމަށް ބުންޏެވެ. ފުރަތަމަ މުބާރާތުގެ ސެމީފައިނަލާ ހިސާބަށް ޓީމްތައް ދަތުރުކޮށްފައިވާއިރު ވެލެންސިޔާއަށް މުބާރާތް ނިމިއްޖެއެވެ. ދެ މެޗުންވެސް ބަލިވެ ޗެމްޕިއަން ވެލެންސިޔާ ކެޓީއެވެ. އަސަދުالله އެއް ނުފެނެއެވެ. އެކަމަކު އަދިވެސް އޭނާ ޔަޤީންކަން ދެނީ ވެލެންސިޔާއިން ފެންނާނެކަމެވެ. ވެލެންސިޔާއަށް ކުޅެން ނިންމައިގެން ހުރިކަމެވެ. ސޮއި ނުކުރިޔަސް ޕްރެކްޓިސްއަށް ނުނިކުތަސް މިސީޒަންގައި އޭނާގެ ކްލަބަކީ ވެލެންސިޔާއެވެ. ޓީމުން އޭނާ ނުފެނުމަކީ އަސަދުالله ގެ މައްސަލައެއް ނޫނެވެ.

ހަޤީޤަތުގައި އެހެން ޓީމްތަކުން ވެލެންސިޔާއަށް ބަދަލުވި އެއްވެސް ކުޅުންތެރިއަކަށް އަދި ވެލެންސިޔާއަށް ކުޅެވެން ނެތީއެވެ. އެއީ ރާއްޖޭގެ އެންމެ ބޮޑު އެއް ކްލަބް ވެއްޓިފައިވާ ހާލަތެވެ. ކްލަބަށް ކުރިން ކުޅުނު ކުޅުންތެރިންނަށް ނުދީހުރި މުސާރައިގެ މައްސަލަތައސް ހައްލުނުވާތީ އެކުޅުންތެރިންނަށް ކުޅުމުގެ ފުރުޞަތު ނުލިބެނީއެވެ. އެކަމަށް ހުރަސްތަކެއް ހުރީއެވެ. އަސަދުالله ވެސް ހުރީ އެލިސްޓްގައެވެ.

އަސަދުالله އަށް ވެލެންސިޔާއަށް ކުޅެވެން އޮތީ އެކަންކަން ހައްލުވެ ފެހި ސިގްނަލެއް ލިބިގެންނެވެ. މައުލޫމާތުލިބިފައިވާ ގޮތުގައި މުސާރައިގެ އެ މައްސަލަތައް ހައްލުކުރުމަށް ވެލެންސިޔާއިން މިހާރު ފައިސާ ދައްކައިފިއެވެ. އެކަމަކު ކަންކަން ފުރިހަމަވެ "ގޯ" ސިގްނަލް އަދި ނުލިބެނީއެވެ.

އަސަދުالله ގެ އިތުރުން އޭނާއާއެކު މިދިޔަ ތިން ސީޒަންގައި މާޒިޔާއަށް ކުޅުނު މިޑްފީލްޑަރ އިބްރާހީމް ވަހީދާއި, ގްރީން ސްޓްރީޓްސްގެ މިދިޔަ ސީޒަންގެ ކެޕްޓަން ރިލްވާން ވަހީދަށްވެސް ދިމާވެފައިވަނީ އެމައްސަލައެވެ. ތަފާތަކީ ރިލޭއާއި އިއްބެ ވެލެންސިޔާގެ ޕްރެކްޓިސްގައި ބައިވެރިވަމުން ދިއުމެވެ. އެކުޅުންތެރިންނަށް ނުކުޅެވުމަކީ ވެލެންސިޔާގެ ކޯޗު އަހުމަދު މުޖުތަބާ ތަކުރާރު ކުރާ ފަދައިން އެކްލަބަށް އޮތް ބޮޑު ޗެލެންޖެކެވެ. އެންމެ އަވަހަށްވެސް އެކުޅުންތެރިންނަށް ކުޅެވޭނީ ދިވެހި ޕްރިމިއަރ ލީގުގެ ތެރޭގައެވެ. ޕްރެޒިޑެންޓްކަޕް ވެލެންސިޔާއިން ނިންމާލީ "އިންޓަރ ސްކޫލް" ޓީމެއް ގޮވައިގެންނެވެ.

ވެލެންސިޔާއަށް ފުރަތަމަ މުބާރާތުގައި ކުޅމުގެ ފުރުޞަތު ނުލިބުނު ތިން ކުޅުންތެރިންނަކީވެސް ޤައުމީ ޓީމްގައި މުހިއްމު ދައުރެއް އަދާކުރި ރާއްޖޭގެ ފުޓްބޯޅައިގެ ސީނިއަރ ތިން ކުޅުންތެރިންނެވެ. މީގެތެރެއިން އިއްބެއަކީ އަދިވެސް ކުރިމަގު އޮތް ޒުވާން ކުޅުންތެރިއެކެވެ. ޤައުމީ ޓީމުން އަދިވެސް ފުރުޞަތު ހޯދޭވަރުގެ މޮޅު ތިން ކުޅުންތެރިންނަށް ނުކުޅެވި މުބާރާތެއް ނިމިގެން ދިއުން މިއީ ރާއްޖޭގެ ޒަމާންވީ ބޮޑު ތިން ކްލަބްގެ ތެރެއިން ފުރަތަމަ ޑިވިޝަންގައި އޮތް ހަމައެކަނި ކްލަބްގެ ހާލަތެވެ. އެއީ ރާއްޖޭގެ ފުޓްބޯޅައިގެ މިއަދުގެ ހާލަތެވެ.