ގަދަ ހޫނަށްފަހު މެދުރާއްޖެތެރެއާއި ދެކުނަށް ވިއްސާރަކުރާނެކަމަށް މެޓުން ލަފާކޮށްފި
މެދުރާއްޖެތެރެއާއި ދެކުނުގެ އެކި ހިސާބަށް ވިއްސާރަކޮށް ގުގުރާނެ، ބައެއް ރަށްތަކަށް ބޯކޮށް ވާރޭވެހުން އެކަށީގެންވޭ
މާލެއަށް ބޯކޮށް ވާރޭވެހެނީ
ހޫނު ގަދަ ދުވަސްތަކަކަށްފަހު ކުރިޔަށް އޮތް ދުވަސްތަކުގައި ވިއްސާރަކުރާނެކަމަށް މެޓް އޮފީހުން ބުނެފިއެވެ.
މެޓް އޮފީހުން އަންގާރަ ދުވަހު ބުނީ މެދުރާއްޖެތެރެއާއި ދެކުނުގެ އެކި ހިސާބަށް ވިއްސާރަކޮށް ގުގުރާނެކަމަށާއި ބައެއް ރަށްތަކަށް ބޯކޮށް ވާރޭވެހުން އެކަށީގެންވާކަމަށެވެ. އަދި އުތުރުގެ ބައެއް ރަށްތަކަށް ކެރީގެ އަސަރުކުރާނެކަމަށް މެޓް އޮފީހުން ބުނެއެވެ.
ފާއިތުވި ތިން ދުވަހު ރާއްޖެއަށް ހޫނު ގަދަ ވުމަށްފަހު ހޯމަ ދުވަހުގެ ރޭ މެދުރާއްޖެތެރެއަށް ވަނީ ބާރަށް ގުގުރުމާއެކު ވިއްސާރަވެހިފައެވެ. މެޓް އޮފީހުން އާންމުކޮށްފައިވާ ރިކޯޑްތަކަށް ބަލާއިރު 24 އޭޕްރީލްގެ 8ން ފެށިގެން 25 އޭޕްރީލްގެ 8 އާ ހަމައަށް އެންމެ ގިނައިން ވާރޭވެހިފައިވަނީ ހުޅުލެއަށެވެ. އެއީ 32.6 މިލިމީޓަރުގެ ވާރޭއެވެ. ސ ގަމަށް 17.7 މިލިމީޓަރުގެ ވާރޭވެހިފައިވެއެވެ. މާލެ އަށް 10.1 މިލިމީޓަރުގެ ވާރޭ ވެހިފައިވެއެވެ. ސ.ހިތަދޫ އަށް 6.2 މިލިމީޓަރުގެ ވާރޭވެހިފައިވެއެވެ.
އިހުސާސްކުރެވޭ ހޫނު މިން އަންގާރަ ދުވަހު އެންމެ މަތީގައި ހުރީ 43 ޑިގްރީސެލްސިއަސް ގައެވެ.
