ރަޝިއާ މީހުންނާމެދު ތަފާތުކުރާކަމަށް ބުނެ ކެނެޑާ އަށް ނުދާން އެ ގައުމުން ނަސޭހަތްތެރިވެއްޖެ

ރަޝިއާ މީހުންނާމެދު ތަފާތުކުރާކަމަށް ބުނެ ކެނެޑާ އަށް ނުދާން އެ ގައުމުން ނަސޭހަތްތެރިވެއްޖެއެވެ.

ކެނެޑާ އަށް ދަތުރުނުކުރުމަށް އެ ގައުމުން ނަސޭހަތްތެރިވެފައި މި ވަނީ ކެނެޑާ އަށް ދާ ރަޝިއާ މީހުންނާއި ދެކޮޅަށް ހިންގާ އަނިޔާވެރި އަމަލުތައް އިތުރުވަމުންދާތީ އެކަމާއި ގުޅިގެން ކަަމަށް ރަޝިއާގެ ފޮރިން މިނިސްޓްރީން ބުނެއެވެ. ކެނެޑާ އަކީ ރަޝިއާއާއި ޔޫކްރެއިނާ ދެމެދު ހިނގާ ހަނގުރާމައިގައި އެންމެ ފާޅުގައި ޔޫކްރެއިން އަށް ވާގިވެރިވާ އެއް ޤައުމެވެ. އެ ގައުމުން ވަނީ ވިޔަފާރީގެ ބޮޑެތި މުއާމަލާތްތައް ހުއްޓާލައި، ރަޝިއާ އަށް ނިސްބަތްވާ އެތައް ސަތޭކަ ކުންފުންޏަކާއި އޮފިޝަލުންނަށް ފިޔަވަޅު އަޅާފައެވެ.

ރަޝިއާ މީހުން ކެނެޑާ އަށް ނުދިއުމަށް ނަސޭހަތްތެރިވެ އެޑްވައިޒަރީއެއް ނެރެފައި ވަނީ ރަޝިއާ މީހުންނަށް ކެނެޑާގައި ކުރެވޭ ނޭދެވޭ ތަޖުރިބާތައް ގިނަވުމާއި ގުޅިގެން ކަމަށް އެ ގައުމުން ވަނީ ބުނެފައެވެ. މިދިޔަ އަހަރު ރަޝިއާ އާއި ޔުކްރެއިނާ ދެމެދު ހަނގުރާމަ ފެށިގެން ކުޑަ ދުވަސްކޮޅެއްގެ ތެރޭގައި ވެސް ރަޝިއާ އަށް ނުދިއުމަށް އެ ގައުމުން ވަނީ ގޮވާލާފައެވެ.

ރަޝިއާ އިން ވަނީ މިދިޔަ ހަފްތާގައި ކެނެޑާ އަށް ނިސްބަތްވާ 333 މީހަކަށް ދަތިކުރުމުގެ ފިޔަވަޅު އަޅާފައެވެ. އޭގެ ތެރޭގައި ހިމެނެނީ އޮފިޝަލުންނާއި، ޕަބްލިކް ފިގަރސް އަދި އޮލިމްޕިއަނުންނެވެ. މިއީ ކެނެޑާ އިން ރަޝިއާއާ ދެކޮޅަށް އަޅަމުންދާ ފިޔަވަޅުތަކަށް ރައްދު ދިނުމުގެ ގޮތުން އެ ގައުމުން އެޅި ފިޔަވަޅުތަކެކެވެ.