ޕީޖީ އަށް މަސްދަރު ހާމަކުރަން ހައިކޯޓުގައި އެދެވޭ ގޮތަށް އިސްލާހެއް
ރައީސުލްޖުމްހޫރިއްޔާ ހެއްކާބެހޭ ޤާނޫނު ތަސްދީޤުކުރައްވާފައި ވަނީ 18 ޖުލައި 2022 ގައި
ނޫސްވެރިން
ތަހުގީގުގެ ހުރިހާ މަރުހަލާއެއްގައި ވެސް ނޫސްވެރިންގެ މަސްދަރު ހާމަކުރަން, ޕްރޮސެކިއުޓާ ޖެނެރަލްގެ އޮފީހަށް ހައިކޯޓުގައި އެދެވޭ ގޮތަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީން ފާސްކޮށްފިއެވެ.
ކޮމިޓީން އެފަދައިން ފާސްކޮށްފައި ވަނީ ހެއްކާ ބެހޭ ބިލު އެންމެ ފުރަތަމަ އެކުލަވާލި ގޮތުން ގާނޫނުއަސާސީން ނޫސްވެރިންނަށް ދީފައިވާ މަސްދަރު ރައްކާތެރިކުރުމުގެ ހައްގު ހަނިވާތީ ނޫސްވެރިންގެ ހުރި ކަންބޮޑުވުންތައް އަޑު އެހުމަށް ފަހުގައެވެ. ނޫސްވެރިންގެ ކަންބޮޑުވުންތަަކަށް ފަހު މަޖިލީހަށް ހުށަހެޅި އިސްލާހުގައި ވަނީ ޕްރޮސެކިއުޓާ ޖެނެރަލްގެ ފަރާތުން ހުށަހަޅައިގެން، ހައި ކޯޓުގެ އަމުރެއްގެ ދަށުން މަސްދަރު ހާމަކުރުމަށް ހުށަހަޅާފައެވެ. މީގެކުރިން ގާނޫނުގައި އޮތް ގޮތުން ނަމަ މަސްދަރު ހާމަކޮށްދިނުމަށް އެދި ދައުލަތުގެ އިތުރުން ދައުވާ ކުރާ މީހުންނަށް ވެސް ހުށަހެޅުމުގެ ފުރުސަތު އޮތެވެ.
މިހާރު ކޮމިޓީން ފާސްކޮށްފައި ވަނީ މަސްދަރު ހާމަކުރުމަށް އެދި ޕީޖީން އެދޭ ނަމަ ހައިކޯޓުގެ އަމުރަކާއެކު ވަކި ހާލަތުތަކެއްގައި މަސްދަރު ހާމަކުރެވިދާނެ ކަމަށެވެ. މީގެ އިތުުރުން މަޖިލީހުގެ ކޮމިޓީން ވަނީ ގައުމީ ސަލާމަތް މާނަ ކުރާ ގޮތަށް ބަދަލު ގެނެސްފައެވެ.
ރައީސުލްޖުމްހޫރިއްޔާ ހެއްކާބެހޭ ޤާނޫނު ތަސްދީޤުކުރައްވާފައި ވަނީ 18 ޖުލައި 2022 ގައެވެ. މި ބިލަކީ، 2022 ޖޫން 30 ވީ ބުރާސްފަތި ދުވަހު ބޭއްވެވި ރައްޔިތުންގެ މަޖިލީހުގެ 2022 ވަނަ އަހަރުގެ ދެވަނަ ދައުރުގެ 22 ވަނަ ޖަލްސާގައި ފާސްކުރެއްވި ބިލެކެވެ.
