ޖަރުމަނު ލީގުގެ އެންމެ ފަހުގެ ޗެމްޕިއަން ބަޔާން މިއުނިކް ބަލިވުމުގެ ފައިދާ ނަގައި، ބޮރޫޝިއާ ޑޯޓްމަންޑުން ލީގު ތާވަލްގެ އެއް ވަނަ އަށް ޖެހިލައިފި އެވެ.

ލީގުގައި މައިންޒާ ދެކޮޅަށް ބަޔާން ކުޅުނު މެޗުން ބަލިވުމުން، އެއިންޓްރަކްޓް ފްރޭންކްފާޓް ބަލިކޮށް އަލުން އެއް ވަނަ އަށް އަރަން ލިބުނު ފުރުސަތުގައި ޑޯޓްމަންޑުން ވަނީ 4-0 އިން ފްރޭންކްފާޓް ބަލިކޮށްފަ އެވެ. ޑޯޓްމަންޑުގެ ދަނޑުގައި ކުޅުނު މެޗު ފަށައިގެން 19 ވަނަ މިނެޓުގައި އެ ޓީމުން ވަނީ ލީޑު ނަގައިފަ އެވެ. ހޫލިއަން ބްރާންޓް ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ އިންގްލެންޑުގެ ޒުވާން ކުޅުންތެރިޔާ ޖޫޑް ބެލިންހަމް އެވެ. ފުރަތަމަ ހާފު ނިމުމުގެ ކުރިން ޑޯޓްމަންޑުން ވަނީ އިތުރު ދެ ލަނޑު ޖަހައިފަ އެވެ. ދެ ވަނަ ލަނޑު ޖަހައި ޑޯޓްމަންޑުގެ ލީޑު ފުޅާކޮށްދިނީ 24 ވަނަ މިނެޓުގައި ޑޮނިއެލް މާލެން އެވެ. އޭގެ ފަހުން 41 ވަނަ މިނެޓުގައި ޑޯޓްމަންޑުގެ ތިން ވަނަ ލަނޑު ޖެހީ ޖަރުމަނުގެ މެޓްސް ހަމެލްސް އެވެ. ޑޯޓްމަންޑުގެ ހަތަރު ވަނަ ލަނޑު ޖެހީ ދެ ވަނަ ހާފުގަ އެވެ. މެޗުގެ 66 ވަނަ މިނެޓުގައި އެ ލަނޑު ޖެހީ ދެ ވަނަ ލަނޑު ވެސް ޖެހި މާލެން އެވެ.

މެޗުން މޮޅުވެ ޑޯޓްމަންޑުން އެއް ވަނައިގައި އޮތީ ޕޮއިންޓުގެ ލީޑަކުންނެވެ. އެއީ މިހާތަނަށް ކުޅުނު 29 މެޗުން 60 ޕޮއިންޓާއެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ބަޔާނަށް ލިބެނީ 59 ޕޮއިންޓެވެ.