ފަހު ނޭވައަށް ދަންދެެން ރައީސް ޔާމީނާއި އެކު ހުންނާނަން: އަދުރޭ
7 ޖުލައި 2017 | ހުކުރު 12:55ސިޔާސީ މައިދާނަށް ނުކުންނެވީ ވެސް ރައީސް ޔާމީނާއެކު
ޕީޕީއެމްގެ ނައިބު ރައީސް އަބްދުއްރަހީމް އަބްދުﷲ (އަދުރޭ)
ފަހުނޭވަޔާ ޖެހެންދެން ވެސް ހުންނަވާނީ ރައީސް އަބްދުﷲ ޔާމީނާއިއެކުގައިކަމަށް ޕީޕީއެމްގެ ނައިބު ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އަބްދުއްރަހީމް އަބްދުﷲ ހުކުރުދުވަހު ކުރައްވާފައިވާ ޓްވީޓެއްގައި ވިދާޅުވީ، ރައީސް މައުމޫން އަބްދުލް ގައްޔޫމާއި ރައީސް މުހައްމަދު ނަޝީދުގެ އިތުރުން ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ފަހަތްޕުޅަށް ދުވަހަކު ވެސް އަރާވަޑައިނުގަންނަވާނެކަމަށެވެ.
އަބްދުއްރަހީމް ވިދާޅުވީ އޭނާ ސިޔާސީ މައިދާނަށް ނުކުންނެވީ ވެސް ރައީސް ޔާމީނާއެކު ކަމަށެވެ. އެހެންކަމުން ސިޔާސީ މައިދާނުން ދުރަށް ވަޑައިގަންނަވާނީ ވެސް ރައީސް ޔާމީނާއެކު ކަމަށް އޭނާ ވިދާޅުވި އެވެ.
އޭނާ ވިދާޅުވީ "އަޅުގަނޑުމެން މިތިބީ ވަރަށް ސާބިތުކަމާއެކު" ރައީސް ޔާމީންގެ ފަހަތްޕުޅުގައި ކަމަށާއި މާތްﷲ އިރާދަކުރެއްވިއްޔާ އެ ޓީމް ބަލި ނުކުރެވޭނެ ކަމަށެވެ. އަދުރޭ ވަނީ މި ޓްވީޓްތައް ގަލޮޅު ދެކުނު ދާއިރާގެ މެންބަރު އަހުމަދު މަޚްލޫފަށް ޓެގް ކުރައްވާފައެވެ.
އަދުރޭ މިފަދައިން ވިދާޅުވެފައި މިވަނީ ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތް ކަމަށް ހުށަހެޅި މައްސަލާގައި ޕީޕީއެމްގެ ދިހަ މެމްބަރުން ސޮއިކުރުމުން ކާމިޔާބު ލިބިއްޖެކަމަށް އިދިކޮޅު ފަރާތްތަކުން ބުނަމުން އަންނަ ދަނޑިވަޅެއްގައެވެ.
މަސީހުގެ އިތުބާރު ނެތްކަމުގެ މައްސަލާގައި ސޮއިކުރެއްވި ބައެއް މެމްބަރުން ވަނީ އޭގައި ވަނީ އެބޭފުޅުންގެ ސައްޙަ ސޮއި ކަމަށް ވިދާޅުވެ، އިސްލާހީ މަސައްކަތުގައި ދެމިތިއްބަވާނެކަމަށް އިއުލާން ކުރައްވާފައެވެ.
