ރަޝިއާއިން ޔޫކްރެއިންގައި ދެމުންދާ ހަމަލާތައް ބްރެޒިލްގެ ރައީސް ކުށްވެރިކުރައްވައިފި
19 އެޕްރީލު 2023 | ބުދަ 15:25ލޫލާ މިގޮތަށް ވާހަކަފުޅުދައްކަވާފައި މިވަނީ ހުޅަނގުން ޔޫކްރެއިނަށް ހަތިޔާރު ފޯރުކޮށްދީ، ހަނގުރާމަ ދިގުދަންމަމުންދާކަމުގެ ތުހުމަތުތައްވެސް ކުރެއްވުމަށްފަހު
ބްރެޒިލްގެ ރައީސް، ލުއިޒް އިނާސިއޯ ލޫލާ ޑަ ސިލްވާ
ރަޝިއާއިން ޔޫކްރެއިންގައި ދެމުންދާ ހަމަލާތައް، ބްރެޒިލްގެ ރައީސް ލުއިޒް އިނާސިއޯ ލޫލާ ޑަ ސިލްވާ ކުށްވެރިކުރައްވައިފިއެވެ.
ބްރެޒިލްގެ ރައީސް ލޫލާ ވަނީ ރަޝިއާއިން ޔޫކްރެއިންގައި ދެމުންދާ ހަމަލާތައް ކުށްވެރިކުރައްވައި، ހަނގުރާމަ ހުއްޓާލުމުގެ މަޝްވަރާތައް ކުރުމުގައި މެދުވެރިއެއްގެ ދައުރު އަދާކުރެއްވުމަށް ތައްޔާރަށް ހުންނެވި ކަމަށް ވިދާޅުވެފައެވެ. މިގޮތަށް ލޫލާ ވިދާޅުވެފައިވަނީ އަންގާރަ ދުވަހުއެވެ.
މީގެ ކުރިންވެސް ލޫލާ މިހެން ވިދާޅުވެފައިވާއިރު، ޔޫކްރެއިނުން ވަނީ އެކަމަށް ފާޑުކިޔާފައެވެ.
އަންގާރަ ދުވަހު ލޫލާ އަނެއްކާވެސް މިހެން ވިދާޅުވެފައިވަނީ ރުމޭނިއާގެ ރައީސް ކްލައުސް އިއޮހަނިސްއާ ބައްދަލުކުރައްވައި ވާހަކަފުޅުދައްކަވަމުންނެވެ. އެގޮތުން ރަޝިއާ-ޔޫކްރެއިން ހަނގުރާމަ ހުއްޓާލުމަށް ސުލްހައިގެ މަޝްވަރާތައް ކުރުމަށް، އެއްވެސް ކޮޅަކަށް ނުޖެހޭ ގައުމުތަކުން މެދުވެރިންގެ ރޯލު އަދާކުރަން ޖެހޭ ކަމަށެވެ.
ލޫލާ މިގޮތަށް ވާހަކަފުޅުދައްކަވާފައި މިވަނީ ހުޅަނގުން ޔޫކްރެއިނަށް ހަތިޔާރު ފޯރުކޮށްދީ، ހަނގުރާމަ ދިގުދަންމަމުންދާކަމުގެ ތުހުމަތުވެސް ކުރެއްވުމަށްފަހުއެވެ.
ލޫލާވެސް ގެންގުޅުއްވަނީ ރަޝިއާއާއި ޗައިނާއާ އެއްފަދަ ޕްރޮޕަގެންޑާއެއް ކަމަށް އެމެރިކާއިން ދަނީ ތުހުމަތުކުރަމުންނެވެ. ނަމަވެސް ރަޝިއާއާއި ޗައިނާގެ ސިޔާސަތުތައް'ކޮޕީކުރަމުން ނުދާކަމަށް ލޫލާ ވަނީ ވިދާޅުވެފައެވެ.
