ސްޕޮންޖްބޮބް އުފެއްދި ސްޓެފަން ހިލަންބާގް މަރުވެއްޖެ
29 ނޮވެމްބަރު 2018 | ބުރާސްފަތި 15:51މި ކާޓޫން ސީރީޒް ޕްރިމިއަރ ކޮށްފައިވަނީ 1999 ވަނަ އަހަރު
ސްޓެފަން ހިލަންބާގް
ބެލުންތެރިންގެ މެދުގައި މަގްބޫލުކަން ހޯދާފައިވާ ކާޓޫން ސީރީޒް "ސްޕޮންޖްބޮބް ސްކޮޔާޕޭންޓްސް" އުފެއްދި ސްޓެފަން ހިލެންބާގް މަރުވެއްޖެ އެވެ.
ނިކްލޯޑިއަން އިން ދައްކަމުންދާ މި ކާޓޫން ސީރީޒް ޕްރިމިއަރ ކޮށްފައި ވަނީ 1999 ވަނަ އަހަރުގެ މެއި މަހުގެ 01 ވަނަ ދުވަހު އެވެ.
އުމުރުން 57 އަހަރުގައި ހިލެންބާގް މަރުވެފައި ވަނީ މޯޓޯ ނިއުރޯން އަށް ޖެހުނު ބައްޔެއްގެ ސަބަބުން ކަމަށް ނިކްލޯޑިއަން އިން ނެރެފައިވާ ބަޔާނެއްގައި ވަނީ ބުނެފައެވެ.
2004 ވަނަ އަހަރު ރިލީޒްކުރި "ސްޕްންޖްބޮބް ސްކޮޔާޕޭންޓް" މޫވީ ޑައިރެކްޓް ކޮށްފައި ވަނީ ވެސް ހިލެންބާގް އެވެ.
ނިކްލޯޑިއަންގެ އޮފިޝަލް ޓްވިޓާ އެކައުންޓުން ވެސް ވަނީ އެނާ މަރުވުމާއި ގުޅިގެން އެކަމާއި ހިތާމަފާޅުކޮށް ޓްވީޓް ކޮށްފައެވެ.
ހިލެންބާގް މަރުވުމާއި ގުޅިގެން ސްޕޮންޖްބޮބް ގޭ ފޭނުން ދަނީ ސޯޝަލް މީޑީއާގައި ބެލުންތެރިން ގަޔާވާ ހެއްވާ މަޖާ ސީރީޒް އެއް އުފެއްދިކަމަށްޓަކައި ޝުކުރު އަދާކުރަމުންނެވެ.
