އިސްރާފަށް އުކާލާ ކާބޯތަކެތި، ފެޝަނަށް

ކިތަންމެ ބަލައިގެން އުޅުނު ކަމުގައި ވީ ނަމަވެސް ކާބޯތަކެތި އުކާލަން ޖެހޭ ފަހަރު އާދެއެވެ. ތައްޔާރު ކޮށްފައި ހުންނަ ކާބޯތަކެއްޗާއި، ކާބޯތަކެތި ތައްޔާރު ކުރަން ބޭނުން ކުރާ އެކި ކަހަލަ،ރޯ މޭވާއާއި ތަރުކާރީވެސް އޭގެ ތެރޭގައި ހިމެނެއެވެ. ކާބޯތަކެތި އިސްރާފު ކުރުމަކީ އެންމެ ރަނގަޅު ގޮތް ނޫން ކަމަށް ގިނަ ބަޔަކު އިއްތިފާޤު ވީ ނަމަވެސް، އެކަމަކަށް އަމަލީ ގޮތުން ހައްލެއް ހޯދެނީ މަދު ބަޔަކަށެވެ. ފަރުދީ ފެންވަރުގައި މިފަދަ މަސައްކަތެއް ކުރަމުން އަންނަ އެކަކީ، ޢުރުދުންގެ ޒުވާނެއް ކަމަށްވާ ބަޠޫލް އަލްރަޝްދާންއެވެ.

މޭވާއާއި ތަރުކާވީ ވިއްކާ މީހުންގެ އިތުރުން އެކިއެކި ގޭބިސީތަކާ ގުޅިގެން، ޢުމުރުން 28 އަހަރުގެ ބަޠޫލް ކުރަމުން އަންނަ މަސައްކަތަކީ، އުކާލާ ކާބޯތަކެތި ފެޝަނަށް ބަދަލު ކުރުމެވެ. ނުވަތަ ފެޝަންގެ ގޮތުގައި ބޭނުން ކުރެވިދާނެ އެކި ކަހަލަ ސާމާނުތައް އުފެއްދުމުގެ މަސައްކަތެވެ.

ފިޔާ، އޮރެންޖު، އަނބު އަދި ކީވީ ފުރުޓުގެ ތޮށި ފަދަ ބާވަތްތައް ބޭނުންކޮށްގެން ބަޠޫލް އުފައްދަނީ ބަޔޮޓެކްސްޓައިލް ނުވަތަ ސިއްހީ ދާއިރާ ފަދަ ހާއްސަ ދާއިރާތަކުގައި ބޭނުން ކުރާ ފޮއްޗާއި، ހެދުން ފަހާ ފޮއްޗާއި، ފެޝަންގެ ގޮތުގައި ބޭނުން ކުރެވިދާނެ އެކި ކަހަލަ ގަހަނާގެ ސާމާނުތަކެވެ.

ބަޠޫލް މި މަސައްކަތް ކުރަނީ "ބަޔޮ ބޯރ"ގެ ނަމުގައި ފޮތި ފަރުމާކުރާ ބަޔޮޓެކްނޮލޮޖީ ކުންފުންޏެއް ހަދައިގެންނެވެ.

ބަޠޫލް ބުނާ ގޮތުގައި އޭނާގެ އަމާޒަކީ، ފެޝަންގެ ސިނާޢަތުން ވެއްޓަށް ލިބޭ ގެއްލުން ވީހާވެސް ކުޑަ ކުރުމެވެ. އަދި ފެޝަނަކީ، ތިމާވެށީގެ މައްސަލަތަކަށް މީހުން ހޭލުންތެރި ކުރުވޭނެ މައިދާނެކަން ސާބިތު ކޮށްދިނުމެވެ.

ތުރީ-ޑީ ޕްރިންޓަރެއްގެ އެހީގައި ބަޠޫލް އުފެއްދުމެއް ތައްޔާރު ކުރިއެވެ. ހުދު ކުލައިގެ ތިކިތަކެއްވެސް ހުރި އެ އުފެއްދުން ރަމްޒުކޮށް ދެނީ، ދުނިޔޭގެ ކަނޑުތަކުގެ ތެރެއިން ލޮނުގެ އަސަރު އެންމެ ގަދައަށް ހުންނަ ޑެޑްސީގެ ލޮނުފުށްތަކެވެ.

އަރކިޓެކްޗަރގެ ރޮނގުން މަތީ ތަޢުލީމު ހާސިލުކޮށްފައި ވާ ބަޠޫލްއަކީ ސައެންސްއާއި ޓެކްނޮލޮޖީ އަދި ފަރުމާ ކުރުމުގެ ރޮނގުން އިތުރު ދިރާސާތައް ކުރަމުންދާ ރިސަރޗަރއެއްވެސްމެއެވެ. އަރކިޓެކްޓެއްގެ ގޮތުގައި މީގެ ކުރިން މަސައްކަތް ކުރުމަށްފަހު، އޭނާ އެ މަސައްކަތް ދޫކޮށްލީ، ފަރުމާތަކަށް ބޭނުންވާ އެކިއެކި ސަމާނުތައް، އެނާގެ އަމިއްލަ މަސައްކަތުން އުފެއްދުމަށްޓަކައެވެ.

ބަޠޫލް ވަނީ އޭނާގެ އުފެއްދުންތައް، ވިލާތާއި ދުބާއީގައި ދައްކާލާފައެވެ. އަދި އޮންލައިންކޮށްވެސް ބަޠޫލް ދަނީ، އޭނާގެ އުފެއްދުންތައް ވިއްކަމުންނެވެ.

ކިތަންމެ ބަޔަކު ކިތަންމެ ގޮތަކަށް ނަޞޭޙަތް ދިން ކަމުގައި ވީ ނަމަވެސް، ކާބޯތަކެތީގެ އިސްރާފުގެ މައްސަލައަކީ މި ކުޑަކުޑަ ދިވެހިރާއްޖޭގައިވެސް ހައްލެއް ނުލިބި އޮތް މައްސަލައެކެވެ. ދީނީ ފެންވަރުގައި ދޭ ދަރުސްތަކާއި، އިޖުތިމާޢީ ފެންވަރުގައި ހިންގާ ހޭލުންތެރި ކުރުމުގެ ކެމްޕޭންތަކާ އެކުވެސް، ކުނީގެ ގޮތުގައި އުކާލާ ކާބޯތަކެތީގެ މައްސަލައަށް އެދެވޭ ހައްލެއް ނުހޯދެއެވެ. ވަކިން ހާއްސަކޮށް، ރަމަޟާން މަހާ ދިމާކޮށް، ގޭބިސީތަކާއި ހޯޓާ ރެސްޓޯރަންޓް ފަދަ ކެއިންބުއިމުގެ ޚިދުމަތް ދޭ ތަންތަނުން، ކުނީގެ ގޮތުގައި އުކާލާ ކާބޯތަކެތީގެ މިންވަރު، އަހަރުގެ އެހެން މަސްމަހާ އަޅާ ބަލާއިރު އެތައް ގުނައެއް އިތުރުވެގެން ދެއެވެ.