އިންސާނީ ހަޟާރާތު ކުރިއަރާ ތަރައްގީވަމުން ދާ ދިއުމުގެ އަގަކަށް ވެފައި އޮންނަނީ ގުދުރަތީ ވަސީލަތްތައް ގުރުބާން ކުރުން ކަމުގައި ވަނީ ވެފައެވެ. ދިރިއުޅުމުގެ އެކި މައިދާންތަކުގައި ހޯދަމުންދާ ކުރިއެރުންތަކާއެކު، ދިރިއުޅުމަށް ބޭނުންވާ މުހިންމު ވަސީލަތްތަކެއްވެސް ދަނީ ނެތެމުންނެވެ. އެގޮތުން މިއަދު އެންމެ ތަދު އެކައްޗަކީ ސާފު ބޯފެން ކަމުގައި ދެންނެވިދާނެއެވެ.
ސާފު ބޯފެން ލިބުމުގެ ދަތިކަމާ ކުރިމަތިލާން ނުޖެހޭ ގައުމެއް ނެތޭވެސް ދެންނެވިދާނެއެވެ. މި ދެންނެވި ކުރިއެރުމާއި ތަރައްގީގެ ތެރެއިން، ގުދުރަތީ ވަސީލަތްތައް ބޭނުން ކޮށްގެން ސާފު ބޯފެން ހޯދާނެ ގޮތްތައް އީޖާދު ކުރުމަށް މިއަދު މަޖުބޫރު ވެފައި ވާ އިރު، އެ ކަން ކާމިޔާބު ކުރުމަށް އަތުކުރި އޮޅައިގެން އޮތް އެއް ކުންފުންޏަކީ، ޅަފަތުގެ މަރުހަލާގައި އޮތް "ކުމޫލުސް"އެވެ.
ފަރަންސޭސިވިލާތާއި ތޫނިސްއަށް ނިސްބަތްވާ "ކުމޫލުސް"އިން މިހާރުވެސް ދަނީ، ވައިގެ ތެރެއިން ސާފު ފެން ނެގުމަށް ހާއްސަ މެޝިނެއްގެ މަސައްކަތް ކުރަމުންނެވެ. އުއްމީދަކީ ތޫނިސްއާއި އެހެން ސަރަހައްދުތަކަށް ކުރިމަތިލާން ޖެހިފައިވާ ސާފު ބޯފެން ނުލިބުމުގެ މައްސަލައަށް ކޮންމެވެސް ވަރެއްގެ ހައްލެއް ހޯދާ ދިނުމެވެ.
މެޝިނެއްގެ ތެރެއިން ފައިބަމުން ދިޔަ ފެން، ކަރުދާސް ތައްޓަކަށް ފުރަން ހުރި އީހާބް ތުރީކީއަކީ "ކުމޫލުސް"ގެ ކޯ-ފައުންޑަރެކެވެ. އޭނާ ބުނާ ގޮތުގައި އެ މެޝިނަކީ ތޫނިސްއަށް މިއަދު ކުރިމަތިލާން ޖެހިފައިވާ ފެނުގެ ދަތިކަމަށް އޮތް ހައްލެވެ.
މީ ކުމޫލުސް. އަމާޒަކީ އިރުގެ އަވިން ލިބޭ ހަކަތައާއި ވައި ބޭނުންކޮށްގެން ބޯފެން އުފެއްދުން. ކޮންސެޕްޓަކީ ހެނދުނުގެ ފިނި ޝަބްނަމް ތިކިތައް. އެހެންވިއްޔާ މި ވަނީ ކިހިނެއް؟ މެޝިންގެ ތެރެއަށް ވައި ވަންނަނީ މިތަނުން، ދެން ފުރަތަމަ ފިލްޓަރުގައި ޖެހި، ވައިގައި ހުރި ތަޣައްޔަރުކަން ނައްތާލާ. އެއަށްފަހު މެޝިން ތެރެއަށް ވަދެގެން ދޭ. އެއަށްފަހު ވައި ފިނިވެ، ފެނަށް ބަދަލުވޭ. ފަތިހުގެ ޝަބްނަމް ތިކި އުފެދޭ ގޮތަށްއީހާބް ތުރީކީއަކީ "ކުމޫލުސް"ގެ ކޯ-ފައުންޑަރު
ކުމޫލުސް-1 ގެ ނަން ދީފައި ވާ ފުރަތަމަ މެޝިން ބަހައްޓާފައި ވަނީ އަލްޖަޒާއިރުގެ ބޯޑަރު ސަރަހައްދާ ދާދި ކައިރީގައި އޮންނަ އަވަށެއް ކަމަށް އަލް-ބަޔާދާގެ އެލެމެންޓްރީ ސްކޫލެއްގައެވެ. ނަމަވެސް މެޝިން ބޭނުން ކުރަން އަދި ފަށާފައި ނުވަނީ ތޫނިސް ސަރުކާރުގެ ހުއްދަ ނުލިބިގެން ކަމަށް ތުރީކީ ބުނެއެވެ.
ސްކޫލުގައި މެޝިން ބެހެއްޓުމަށް ހަރަދު ކުރީ މުއާސަލަތީ ހިދުމަތްދޭ އޮރެންޖު ކުންފުނިންނެވެ.
ތުރީކީގެ "ކުމޫލުސް" ވެބްސައިޓްގައި ބުނެފައި ވާ ގޮތުން، މި މޭޝިނުގެ އެހީގައި ދުވާލެއްގެ މައްޗަށް 20 ލީޓަރާއި 30 ލީޓަރާ ދެމެދު މިންވަރަކަށް ސާފު ބޯފެން އުފެއްދެއެވެ.
ވޯލްޑް ބޭންކުގެ ތަފާސް ހިސާބުތަކަށް ބަލާއިރު ތޫނިސްގެ އާބާދީގެ 21 ޕަސެންޓް މީހުންނާއި މަޣްރިބްކަރައިގެ އާބަދީގެ 20 ޕަސެންޓް އަދި އަލްޖަޒާއިރުގެ އާބަދީގެ 28 ޕަސެންޓް މީހުންނަކީ 2020 ވަނަ އަހަރު، ސާފު އަދި ރައްކާތެރި ބޯފެން ލިބޭނެ މަގެއް ނެތިފައި ތިބި މީހުންނެވެ.
