އިންޑިއާގެ ގުރުގާމް ސިޓީގެ ސްލަމް އޭރިއާގައި ދިރިއުޅެމުންދާ 200 އާއިލާއަކަށް އެކްޓަރ ރަކުލް ޕްރީތް ސިންގް ކާބޯތަކެތި ހަދިޔާކުރަމުންދާ ކަމަށް ރިޕޯޓުތައް ބުނެފިއެވެ.
ޓައިމްސް އޮފް އިންޑިއާއަށް ދިން އިންޓަވިއުއެއްގައި ރަކުލް ބުނެފައިވަނީ ކޮވިޑް 19 އާ ގުޅިގެން އިންޑިއާ ލޮކްޑައުން ކުރުމާއި ގުޅިގެން ގުރުގާމް ސިޓީގެ ސްލަމް އޭރިއާގައި ހުންނަ އޭނާގެ ގޭދޮށުގައި ދިރިއުޅެމުންދާ ކާބޯތަކެތީގެ ބޭނުން ޖެހިފައިވާ ފަރާތްތަކަށް ކާބޯތަކެތި ތައްޔާރު ކުރަމުންދަނީ އޭނާ ދިރިއުޅޭ އެޕާޓްމަންޓް ކޮމްޕްލެކްސްގައި ކަމަށެވެ.
އަދި މި ލޮކްޑައުން އޮތްހާ ހިނދަކު އެމީހުންނަށް ކާބޯތަކެތި ފޯރުކޮށްދެމުންދާނެ ކަމަށް ރަކުލް ވަނީ ބުނެފައެވެ. އެގޮތުން ކޮންމެ ދުވަހަކު ދެފަހަރު ކާބޯތަކެތި ފޯރުކޮށްދެމުންދާކަމަށް ވެސް އޭނާ ބުނެފައިވެއެވެ.
ރަކުލް އިތުރަށް ބުނެފައިވަނީ އެނާއަށް އެމަސައްކަތް ކުރެވެނީ އޭނާގެ މައިންބަފައިންގެ އެހީތެރިކަމާއި އެކުގައި ކަމަށާއި ކާބޯތަކެތި ތައްޔާރު ކުރާ ވަގުތު ކަން ހިނގާގޮތް ބެލުމަށް އޭނާގެ މައިންބަފައިން ހަރަކާތްތެރިވާކަމަށެވެ.
ކޮވިޑް-19 އާ ގުޅިގެން އިންޑިއާގައި ހުޅުވާފައިވާ ފަންޑަށް ގިނަ ތަރިންދަނީ އެހީތެރިވަމުންނެވެ. އެގޮތުން ޝާހުރުކް ޚާނާއި އަކްޝޭ ކުމާރު، ދީޕިކާ ޕަދުކޯން، ރަންވީރު ސިންގް އަދި ޕްރިޔަންކާ ޗޯޕްރާގެ އިތުރުންވެސް ގިނަ ތަރިން ވަނީ އެކި ގޮތްގޮތުން އެހީތެރިކަން ފޯރުކޮށްދެމުންނެވެ.
