ޕީޕީއެމްގެ މެމްބަރުންނަށް އުފާވެރި ޚަބަރުތަކެއް ވަރަށް އަވަހަށް ލިބިގެންދާނެ ކަމަށް، ލަންކާގައި ހުންނެވި ޕީޕީއެމް ޕާލިމެންޓްރީ ގުރޫޕްގެ ޑެޕިއުޓީ ލީޑަރު އިބްރާހިމް ފަލާޙް ވިދާޅުވެއްޖެ އެވެ.
ކުރިއަށް އޮތް 2018 ވަނަ އަހަރުގެ ކެމްޕޭން ކުރިއަށްގެންދިއުމަށްކަމަށް ވިދާޅުވެ ޕީޕީއެމް، ރައީސް އަބްދުﷲ ޔާމީން ފެކްޝަންގެ އިސް ވަފުދެއް މިވަގުތު ލަންކާގައި ހަރަކާތްތެރި ވަމުންދާވާއިރު، އެ ވަފުދުގައި ހިމެނިވަޑައިގަންނަވާ މެމްބަރު އިބްރާހިމް ފަލާޙް ކުރެއްވި ޓުވީޓެއްގައި އޭނާ ވިދާޅުވެފައި ވަނީ، ކުރިއަށް އޮތީ ޕީޕީއެމްގެ މެމްބަރުންނަށް އުފާވެރި ޚަބަރުތަކެއް ކަމަށެވެ.
އުފާވެރި ޚަބަރުގެ އިތުރު ތަފްސީލެއް ދެއްވުމެއް ނެތި، ފަލާޙް ވަނީ އެ ބޭފުޅުންގެ ހިތްވަރު ނޭލޭނެ ކަމާ މެދު ސުވާލު އުފައްދަވާފަ އެވެ. އަދި ވިދާޅުވެފައި ވަނީ، އޮޑީގައި ތިއްބެވީ ވަރަށް ގަޓު މީހުން ކަމަށެވެ.
Iraadhakurehviyya Kuriyah othy PPM member innah Ufaaveri Habaruthakeh! Alhugandumen Hihvareh neyleyne Ingeytho? Mi Odyga thibbevy Gut meehun
— Falaah MP (@MpFalaah) July 6, 2017
ރާއްޖެޓީވީއަށް އިތުބާރުހުރި މަސްދަރުތަކުން އެނގިފައިވާ ގޮތުގައި ޕީޕީއެމްގެ އިސް ވަފުދެއް ލަންކާގައި ހަރަކާތްތެރިވަމުންގެންދަވަނީ، ގުޅިފައިވާ ސިޔާސީ ޕާޓީތަކުގެ އިސްލާހީ މަސައްކަތްތަކާ ގުޅުނު މެމްބަރުންނާ ބައްދަލުކުރުމަށެވެ. އެގޮތުން އިހަވަންދޫ ދާއިރާގެ މެމްބަރު މުހައްމަދު އަބްދުﷲ އާއި، މަހިބަދޫ ދާއިރާގެ މެމްބަރު އަހްމަދު ތޯރިޤާ ބައްދަލުކުރުމަށް މަސައްކަތްކުރަމުން އަންނަކަން ރާއްޖެޓީވީއަށް އެނގިފައި ވެއެވެ.
