އިޓާލިއަން ލީގުގައި ބޮލޯނިއާއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން އޭސީ މިލާން އެއްވަރުވެއްޖެ އެވެ.

ހޮނިހިރު ދުވަހުގެ ރޭ ބޮލޯނިއާގެ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗު ފަށައިގެން މިނެޓެއް ނުވަނީވެސް ބޮލޯނިއާ އިން ވަނީ ލަނޑު ޖަހައި ލީޑު ނަގައިފަ އެވެ. އެއީ އެ ޓީމުގެ ސްޓެފަން ޕޮޝް ހުރަސްކޮށްދިން ބޯޅައެއް މިލާންގެ ގޯލް ކުރިމަތީގައި ހުރެ ބޯޅަ ގޯލަށް ފޮނުވާލައިގެން ނިކޯލާ ސަންސޯނޭ ޖަހައިދިން ލަނޑެކެވެ. ނަމަވެސް ފުރަތަމަ ހާފު ނިމުމުގެ ކުރިން މިލާނުން ވަނީ ލަނޑު ޖަހައި ނަތީޖާ ހަމަހަމަކޮށްފަ އެވެ. ފުރަތަމަ ހާފުގެ 40 ވަނަ މިނެޓުގައި މިލާނަށް ނަތީޖާ ހަމަހަމަކޮށްދިނީ ތޮމާސޯ ޕޮބޭގާ އެވެ. އެއީ އޭރިޔާ ބޭރުން ލިބުނު ބޯޅައެއް ގޯލަށް ފޮނުވާލައިގެންނެވެ. ޕޮގޭބާ ފޮނުވާލި ބޯޅަ ގޯލަށް ވަނީ އަރިމަތީ ދަނޑީގައި ޖެހިފަ އެވެ.

ލީގުގެ އެއް ވަނަ ހިފަހައްޓަމުން އަންނަ ނަޕޯލީން ކުޅުނު މެޗު ވެސް ވަނީ އެއްވަރުވެފަ އެވެ. ނަޕޯލީގެ އަމިއްލަ ދަނޑުގައި ވެރޯނާއާ ދެކޮޅަށް ކުޅުނު މެޗު ނިމުނީ އެއްވެސް ޓީމަކަށް ލަނޑެއް ކާމިޔާބު ނުކުރެވި އެވެ.

ނަތީޖާއާއެކު ބޮލީނިއާ އޮތީ ތާވަލްގެ އަށް ވަނައިގަ އެވެ. އެއީ އެ ޓީމު ކުޅުނު 30 މެޗުން 44 ޕޮއިންޓާއެކު އެވެ. މިލާން އޮތީ 30 މެޗުން 53 ޕޮއިންޓާއެކު ހަތަރު ވަނައިގަ އެވެ.