ޗެލްސީގެ ސަޕޯޓަރުން ކުލަބުގެ ވެރިޔާއާ ދިމާކޮށްލައިފި
16 އެޕްރީލު 2023 | އާދީއްތަ 03:56ކުލަބު މިވަގުތު އޮތީ 11 ވަނާގައި
ޗެލްސީގެ ސަޕޯޓަރުން ކުލަބުގެ ވެރިޔާ އަށް ނުުރުހުން ފާޅުކުރަނީ
ބްރައިޓަން އަތުން ރޭ ޗެލްސީ ބަލިވި މެޗަށް ފަހު ބައެއް ސަޕޯޓަރުން ކުލަބުގެ ވެރިޔާ ޓޮޑް ބޮއެލީއާ ދިމާކޮށްލައިފި އެވެ.
އިނގިރޭސި މީޑިއާތަކުގައި އާއްމުކޮށްފައިވާ ފޮޓޯތަކުން ފެންނަނީ ޗެލްސީގެ ދަނޑު ސްޓެމްފަޑް ބްރިޖްގައި ކުލަބުގެ ވެރިން ތިބޭ ޑިރެކްޓާސް ބޮކްސްގެ މަތީގައި ތިބި ސަޕޯޓަރުން ބޮއެލީ އަށް އަޑުލައި ހަޅޭއްލަވާ މަންޒަރެވެ. އެއް ފޮޓޯގައި އޭނާ އަތުގެ އިޝާރާތުން ސަޕޯޓަރުންނާ ވާހަކަ ދައްކާތަން ފެނެ އެވެ. އަނެއް ފޮޓޯއިން ފެންނަނީ ސަޕޯޓަރަކު ވަރަށް ބޮޑަށް ނުރުހުން ފާޅުކުރި ނަމަވެސް އެކަމާ އަޅާނުލައި ބޮއެލީ ބަލަން ހުންނަ މަންޒަރެވެ.
މިދިޔަ އަހަރު ޗެލްސީ ގަތުމަށްފަހު ބޮއެލީ ވަނީ ކުލަބު ވަރުގަދަ ކުރުމަށް މިހާތަނަށް 600 މިލިއަން ޕައުންޑަށްވުރެ ގިނައިން ހޭދަކޮށްފަ އެވެ. ނަމަވެސް މާބޮޑު ކާމިޔާބީއެއް ނުލިބި އެކުލަބު އޮތީ ޓޭބަލުގެ 11 ވަނާގަ އެވެ.
ކޯޗުކަމުން ގްރެހަމް ޕޮޓާ ވަކިކުރީ މީގެ ދެ ހަފުތާކުރިންނެވެ. އެއީ ނަތީޖާތައް ވަރަށް ބޮޑަށް ގޯސްވުމުންނެވެ. އެއަށްފަހު މި ސީޒަނުގެ ނިޔަލަށް ޓީމު ހަވާލުކޮށްފައިވަނީ ކުރީގެ ކޯޗު އަދި ކުޅުންތެރިޔާ ފްރޭންކް ލަމްޕާޑަށެވެ. ނަމަވެސް ރޭގެ މެޗަކީ އޭނާގެ ދެވަނަ ފަހަރަށް ހަވާލުވި ފަހުން ޗެލްސީ ކުޅުނު އަދި ބަލިވި ތިން ވަނަ މެޗަށެވެ.
ޗެލްސީގެ ނަތީޖާތައް މިހާބޮޑަށް ގޯސްވުމުން އަންނަ ސީޒަނުގައި ޔޫރަޕުގެ އެއްވެސް މުބާރާތަކުން ޖާގަ ނުލިބޭނެ އެވެ. މިހެންވެ ހަރަދު ކުޑަކުރުމުގެ ގޮތުން ބައެއް ކުޅުންތެރިން ވިއްކާލަން ކުލަބުން ވަނީ ނިންމާފަ އެވެ.
