ބޭނުންކޮށް ނިމިގެން އުކާލާ ތެޔޮގަނޑުން ވެށި ސަލާމަތް ކުރެވިދާނެ ކަން އެނގޭތަ؟

ވެއްޓަށް އެންމެ ގެއްލުން ދެނިވި އެއް ބާވަތް ކަމަށް ވާ ތެޔޮ އުފައްދާ ޤައުމުތަކުގެ ލިސްޓުގައި ހިމެނޭ އެކުވެރި ޢަރަބި ޢިމާރާތް (ޔޫއޭއީ) އިން ދަނީ، އެ ޤައުމުގެ ދަތުރުފަތުރުގެ ނިޒާމަކީ ދެމެހެއްޓެނިވި ވެއްޓަކަށް މަގުފަހި ކުރާ ސިނާޢަތަކަށް ހެދުމަށް ގިނަ މަސައްކަތްތަކެއް ކުރަމުންނެވެ. އެގޮތުން، ދުބާއީގައި މަރުކަޒުކޮށްގެން ހިންގާ ލޫތާ ބަޔޯފިއުލްސްއަކީ، ކެއްކުމުގެ ސިނާޢަތުގައި ބޭނުންކޮށްފައި ހުންނަ ކައްކާ ތެޔޮ ރީސައިކަލްކޮށް، އެ ތެލުން ބަޔޯޑީސަލް އުފައްދާ ކުންފުންޏެކެވެ.

2010 ވަނަ އަހަރު އުފެއްދި ލޫތާ ބަޔޯފިއުލްސްގެ މަސައްކަތަށް ބޭނުންވާ ތެޔޮ ހޯދަނީ އެކިއެކި ވިޔަފާރިތަކުންނެވެ. ބޭނުންކޮށްފައި ހުންނަ ކައްކާ ތެޔޮ ޖަމާކޮށް، ބަޔޯޑީސަލްއާއި އެނޫންވެސް އުފެއްދުންތަކަށް އެ ބަދަލު ކުރެއެވެ. މަޤްޞަދަކީ ދަތުރުފަތުރުގެ ސިނާޢަތުގައި އިޚްތިޔާރީ ހަކަތައިގެ މަސްދަރުތަކަށް މެދުއިރުމަތީގައި އިތުރު ވަމުން އަންނަ ޑިމާންޑަށް ސަޕްލައި ކޮށްދިނުމެވެ.

ބަޔޯޑީސަލްއަކީ ތަރުކާރީ ތެލާއި، ޖަނަވާރުގެ ސަރުބީ ނުވަތަ ރެސްޓޯރަންޓް ފަދަ ތަންތަނުގައި ބޭނުންކޮށްފައި ހުންނަ ކައްކާ ތެޔޮ ރީސައިކަލްކޮށްގެން، ދޭސީ ފެންވަރުގައި އިން އުފައްދާ އިއާދަކުރަނިވި، ބަޔޯޑިގްރޭޑަބަލް ތެލެކެވެ. ބަޔޯޑިގްރޭޑަބަލްއޭ ބުނާ ބަހުގެ މާނައަކީ، ދިރޭތަކެތީގެ އަމަލުން، ސީރިއަސް ގެއްލުމެއް ނެތް އުފެއްދުންތަކަށް ބެހިގެން ދިއުމުގެ ޤާބިލުކަން ހުރުމެވެ.

ލޫތާ ބަޔޯފިއުލްސްގެ ޗީފް އެގްޒެކެޓިވް، ޔޫސުފް ބިން ސައީލު އަލް ލޫތާ ސިފަ ކުރި ގޮތުގައި، ތިމާވެށި ހިމާޔަތް ކުރުމަކީ މިއަދު އޮތް އިޚްތިޔާރެއް ނޫނެވެ. އެއީ ކުރަން މަޖުބޫރުވެފައި އޮތް ކަމެކެވެ.

ނިމިދިޔަ 2023 އަހަރުގެ އުފެއްދުންތެރިކަމަށް ބަލައިލަމާ ހިނގާށެވެ. ބޭނުންކޮށްފައި ހުންނަ ކައްކާ ތެލުގެ 5 ލައްކަ ލީޓަރު، ކޮންމެ މަހަކުވެސް ލޫތާ ބަޔޯފިއުލްސްއަށް ޖަމާކުރިއެވެ. އަދި އަހަރު ނިމުނު އިރު އެ ކުންފުނިން ވަނީ 700 ޓަނުގެ ބަޔޯފިއުލް އުފައްދާފައެވެ.

ދެމެހެއްޓެނިވި ހަކަތައިގެ އިންޖިނޭރިންގް ޕްރޮފެސަރެއް ކަމަށްވާ ޕޯލް ހެލިއަރ ޤަބޫލުކުރާ ގޮތުގައި ބަޔޯފިއުލް ކަނޑުދަތުރުފަތުރުގެ ދާއިރާގައި ބޭނުން ކުރުމުގެ އިންތިހާ ފަހި ފުރުޞަތުތައް އެބަ ހުއްޓެވެ. ކަނޑުއުޅަނދުތަކުގައި ބޭނުންކުރާ އިންޖީނުތަކަކީ، އެކި ފެންވަރުގެ ތެޔޮ ބޭނުން ކުރުމުގެ ޤާބިލުކަން ލިބިފައިވާ އިންޖީނުތަކެއް ކަން ޕްރޮފެސަރ ހެލިއަރ ވަނީ ފާހަގަ ކޮށްފައެވެ.

ޔޫއޭއީގެ ހަކަތަ އިސްތިރާޖު 2050 އަމާޒުކޮށްފައިވަނީ އެޤައުމުގެ އިގްތިސާދީ ބޭނުންތަކާއި ތިމާވެށީގެ އަމާޒުތައް ހާސިލްކުރުމަށް އިއާދަކުރަނިވި ހަކަތައާއި ނިއުކްލިއާ އަދި ސާފު ހަކަތަ އުފައްދާ ވަސީލަތްތައް އެއްކޮށްލުމަށެވެ. 2023 ވަނަ އަހަރު ޔޫއޭއިން ވަނީ އެ ޤައުމުގެ ހަކަތައިގެ އިސްތިރާޖަށް އައު ލަނޑުދަނޑިތަކެއް އިތުރުކޮށް، އަދާހަމަކޮށްފައެވެ. އެގޮތުން ޔޫއޭއީއަށް ބޭނުންވާ އެކުވި ހަކަތައިގެ ސަޕްލައިގެ 30 ޕަސެންޓަކީ، 2030 ވަނަ އަހަރު އަންނައިރު ސާފު ހަކަތައަށް ހެދުމަށް ވަނީ އަމާޒު ކަނޑައަޅާފައެވެ. އަދި ކަރބަން ނިއުޓްރަލް ޤައުމަކަށް ވުމުގެ ސުންގަޑިއަކަށް 2050 ވަނީ ހަމަޖައްސާފައެވެ.