ދިރިއުޅުމުގައި ދިމާވާ ކޮންމެ ހާލަތަކަށްވެސް ރުހެންޖެހޭ: ޝައިޚް ނަސްރުﷲ
15 އެޕްރީލު 2023 | ހޮނިހިރު 05:29މުސީބާތެއް ދިމާވުމުން އެއަށްވުރެ ހެޔޮގޮތެއް މެދުވެރިކުރައްވާތޯ ދުއާކުރުން މަތީ ދެމިތިބެންޖެހޭ
އިހްޔާ ފޯރަމްގެ ތެރެއިން
ދިރިއުޅުމުގައި ދިމާވާ ކޮންމެ ހާލަތަކަށްވެސް ރުހެންޖެހޭކަމަށް, މަސްޖިދުއް ސުލްތާން މުހައްމަދު ތަކުރުފާނުލް އައުޒަމްގެ އިމާމް، އައްޝައިޚް ނަސްރުﷲ އަލީ ވިދާޅުވެއްޖެވެ.
ޝައިޚް ނަސްރުﷲ މިހެން ވިދާޅުވީ 1444 ވަނަ އަހަރު އަތޮޅުތަކަށް ޚާއްސަކޮށްގެން ބޭއްވި އެންމެ ފަހު އިހްޔާ ފޯރަމްގައި، ފުވައްމުލައް ސިޓީގައި ތަގްރީރުކުރައްވަމުންނެވެ.
''ﷲގެ ނިޔާއަށް ރުހުން'' މި މައުލޫއަށް މި ފޯރަމްގައި ތަގްރީރުކުރައްވާފައިވަނީ އައްޝައިޚް ނަސްރުﷲ އަލީގެ އިތުރުން މިނިސްޓްރީ އޮފް އިސްލާމިކް އެފެއަރޒްގެ ސްޓޭޓް މިނިސްޓަރު އަލްއުސްތާޒް މުހައްމަދު އަނީލްއެވެ.
މި ފޯރަމްގައި ތަގްރީރުކުރައްވަމުން އައްޝައިޚް ނަސްރުﷲ ވިދާޅުވީ، ހަޔާތުގައި މުސީބާތެއް ދިމާވުމުން ދުއާކޮށް، އެ މުސީބާތުގެ ސަބަބުން ދަރުމަ ދެއްވައި، އަދި އެއަށްވުރެ ހެޔޮގޮތެއް މެދުވެރިކުރައްވާތޯ ދުއާކުރުން މަތީ ދެމިތިބެން ޖެހޭކަމަށެވެ.
ދުނިޔެމަތީގައި ތިމާއަށް ފައިދާހުރި ކަމެއް ކަމަށް ދެކޭ ކަންކަން އެއީ ތިމާއަށް ހުރި ގެއްލުމަކަަށްވެސް ވެދާނެކަމަށާއި، ހުރިހާ ކަމެއްގެ ހަގީގަތް އެންމެ މޮޅަށް ދެނެވޮޑިގެންވަނީ މާތްﷲ ކަން ފާހަގަކުރެއްވިއެވެ. އަދި ދިމާވާ ކަންކަމަކީ ދެރަ ކަންކަން ކަމަށް ނުވިސްނުމަށް އިރުޝާދުދެއްވަމުން، ދިރިއުޅުމުގައި ދިމާވާ ކޮންމެ ހާލަތަކަށްވެސް ރުހެންޖެހޭކަމަށް ވިދާޅުވިއެވެ. ކޮންމެ ކަމެއްވެސް ދިމާވާނީ އެކަމެއްގައި ހެވެއް އޮވެގެން ކަމަށާއި، މާތްﷲގެ މިންވަރުފުޅާމެދު ރުހެންވާނެކަމަށް ޝައިޚް ވިދާޅުވިއެވެ.
ޝައިޚްގެ ވާހަކަފުޅުގައި؛ މާތްﷲ އިންސާނަކަށް ދެރަގޮތެއް މެދުވެރި ނުކުރައްވާނެކަން ފާހަގަކުރައްވައި، ދިމާވާ ކޮންމެ ކަމަކީވެސް އިމްތިހާނެއްކަން ދެކިގެން ކުރިއަށްދިޔުމަށް ނަސޭހަތްތެރިވެވަޑައިގެންނެވިއެވެ. އަދި އެފަދަ ކޮންމެ ކަމެއްގެ ފަހަތުގައިވެސް ފޮރުވިފައިވާ ކަންތައްތަކެއް ވާނެކަން ފާހަގަކުރެއްވިއެވެ. މާތްﷲގެ މިންވަރުފުޅާއި ނިޔާއަށް ރުހިގެން ކުރިއަށް ދިޔުމުގެ މުހިންމުކަމަށް ބައްލަވައިލައްވައި ޝައިޚް ވަނީ، ދިމާވާ ކަންތައްތަކަށް ކެތްތެރިވެ، ދުލުން ބަދުބަސް ނުބުނުމަށްވެސް ނަސޭހަތްތެރިވެވަޑައިގެންފައެވެ. އަދި ވިސްނަންވީ ދުނިޔޭގައި ބަޔަކު ކިތަންމެ ބޮޑު ދެރައެއް ދޭން އުޅުނަސް މާތްﷲގެ އިރާދަފުޅާލައިގެން މެނުވީ އެފަދަކަމެއް ނުވާނެކަން ގަބޫލުކޮށް ވަކީލް ކުރުމަށްކަމަށް ވިދާޅުވިއެވެ.
މި ފޯރަމްގައި ތަގްރީރުކުރައްވަމުން މިނިސްޓްރީ އޮފް އިސްލާމިކް އެފެއަރޒްގެ ސްޓޭޓް މިނިސްޓަރު، އަލްއުސްތާޒް މުހައްމަދު އަނީލް ވަނީ ރަސޫލާގެ ހަޔާތްޕުޅުގައި ދިމާވި ހާދިސާތަކަށް ބައްލަވައިލައްވައި މާތްﷲގެ ނިޔާއަށް ރުހެންޖެހޭ ސަބަބުތައް ތަފްސީލްކޮށް ދެއްވާފައެވެ.
މާތްﷲއަށް ފުރިހަމައަށް އީމާންވާ މީހާ އޭނާގެ ހަޔާތުގައި ދިމާވާ ކަންކަމަށް ކެތްތެރިވެ، ދިމާވާ ކަންކަމަކީ ހެޔޮކަމެއްގެ ގޮތުގައި ބަލާނެކަމަށް ވިދާޅުވިއެވެ. ދުނިޔޭގައި ދިމާވާ ހިތްދަތި ކަންކަމަށް ކެތްތެެރިވެއްޖެނަމަ އެކަމުގެ އަޖުރު ލިބޭނެކަން ބަޔާންކުރައްވައި، ރަސޫލާ ﷺގެ ހަޔާތްޕުގައި ދިމާވި ހާދިސާތައް ކިޔައިދެއްވިއެވެ.
އެންމެ ބޮޑަށް އިންސާނުންދެކެ ލޯބިވެވޮޑިގަންނަވަނީ، އަދި އިންސާނުން ރައްކާތެރިކުރައްވަނީ މާތްﷲކަން ފާހަގަކުރައްވައި، ދިމާވާ ހިތާމަތަކާއި މުސީބާތްތަކަށް އަޖުރު ލިބެނީ ކެތްތެރިންނަށްކަމަށް ވިދާޅުވިއެވެ. ގާތްތިމާގެ މީހަކު ނިޔާވުމަކީ ލިބޭނެ ވަރަށް ބޮޑު ހިތާމައެއްކަން ފާހަގަކުރައްވައި ސްޓޭޓް މިނިސްޓަރ ވަނީ، މިފަދަ ކޮންމެ ކަމެއްގައި ކެތްތެރިވުމުގެ މުހިންމުކަމަށް އަލިއަޅުއްވައިލައްވާފައެވެ.
